ഹൈദരാബാദ്: തെലങ്കാനയില്‍ പുതുതായി മൂന്ന് മന്ത്രിമാരെ ഉള്‍പ്പെടുത്തി രേവന്ത് റെഡ്ഡിയുടെ നേതൃത്വത്തിലുള്ള കോണ്‍ഗ്രസ് മന്ത്രിസഭ പുനഃസംഘടിപ്പിച്ചു. ദലിത്, പിന്നാക്ക വിഭാഗങ്ങളില്‍ നിന്നുള്ള മൂന്ന് എം.എല്‍.എമാരെയാണ് മന്ത്രിയാക്കിയത്. അദ്‌ലൂരി ലക്ഷ്മണ്‍ കുമാര്‍, ഗദ്ദം വിവേക് വെങ്കടസ്വാമി, വൈകിതി ശ്രീഹരി എന്നിവര്‍ പുതിയ മന്ത്രിമാരായി സത്യപ്രതിജ്ഞ ചെയ്തു. പട്ടികജാതി വിഭാഗങ്ങളായ മാഡിഗ, മാല എന്നിവയില്‍ നിന്നും പിന്നാക്ക വിഭാഗത്തില്‍പ്പെടുന്ന മുദിരാജ് സമുദായത്തില്‍ നിന്നമുള്ളവരാണ് പുതിയ മന്ത്രിമാര്‍. രാജ്ഭവനില്‍ നടന്ന ചടങ്ങില്‍ ഗവര്‍ണര്‍ ജിഷ്ണു ദേവ് വര്‍മ്മ സത്യപ്രതിജ്ഞ ചൊല്ലിക്കൊടുത്തു. രേവന്ത് റെഡ്ഡിയും അദ്ദേഹത്തിന്റെ മന്ത്രിസഭയിലെ അംഗങ്ങളും പാര്‍ട്ടി എം.എല്‍.എമാരും നേതാക്കളും ചടങ്ങില്‍ പങ്കെടുത്തു.

മുതിര്‍ന്ന കോണ്‍ഗ്രസ് നേതാവ് ജി. വെങ്കടസ്വാമിയുടെ മകന്‍ വിവേക് വെങ്കട സ്വാമി മുന്‍ എം.പിയാണ്. കോണ്‍ഗ്രസിലൂടെയാണ് അദ്ദേഹം രാഷ്ട്രീയം തുടങ്ങിയതെങ്കിലും ഇടക്കാലത്ത് ബി.ജെ.പിയിലെത്തിയെങ്കിലും ഈയടുത്താണ് പാര്‍ട്ടിയില്‍ തിരിച്ചെത്തിയത്. ഹൈദരാബാദ് ക്രിക്കറ്റ് അസോസിയേഷന്‍ പ്രസിഡന്റായും അദ്ദേഹം സേവനമനുഷ്ഠിച്ചു.

ഇതോടെ തെലങ്കാന മന്ത്രിസഭയിലെ ആകെ മന്ത്രിമാരുടെ എണ്ണം 15 ആയി. അനുവദനീയമായ പൂര്‍ണ്ണ അംഗബലം 18 ആയതിനാല്‍ ഇപ്പോഴും മൂന്ന് തസ്തികകള്‍ ഒഴിഞ്ഞുകിടക്കുകയാണ്. പട്ടികവര്‍ഗ വിഭാഗത്തില്‍നിന്നുള്ള രാംചന്ദര്‍ നായിക്കിനെ നിയമസഭാ ഡെപ്യൂട്ടി സ്പീക്കറായും നിയമിച്ചു. തെലങ്കാനയുടെ ചുമതലയുള്ള എ.ഐ.സി.സി ജനറല്‍ സെക്രട്ടറി മീനാക്ഷി നടരാജനുമായി നടന്ന കൂടിയാലോചനകള്‍ക്ക് ശേഷം രേവന്ത് റെഡ്ഡിയാണ് പുതിയ മന്ത്രിമാരെ പ്രഖ്യാപിച്ചത്. 

The Congress cabinet led by Revanth Reddy has been reshuffled in Telangana with the inclusion of three new ministers.