ശ്രീവിജയപുരം: ആന്‍ഡമാന്‍ നിക്കോബാര്‍ ദ്വീപ് സമൂഹത്തിലെ മുസ്ലിംകള്‍ക്കെതിരേ തുടര്‍ച്ചയായി വിദ്വേഷപ്രചാരണം നടത്തിയ തീവ്രഹിന്ദുത്വ പ്രവര്‍ത്തകനെതിരേ കൂട്ട പരാതി നല്‍കി മുസ്ലിം സംഘടനകള്‍. സോഷ്യല്‍മീഡിയകളിലൂടെ വിദ്വേഷപ്രചാരണം പതിവാക്കിയ അഭിഭാഷകനായ മനോജ് പാല്‍ എന്നയാള്‍ക്കെതിരേയാണ് പരാതി നല്‍കിയത്. ആന്‍ഡമാന്‍ സുന്നി മുസ്ലിം ജമാഅത്ത്, ആന്‍ഡമാന്‍ മുസ്ലിം ഫെഡറേഷന്‍, ആന്‍ഡമാന്‍ മാപ്ല അസോസിയേഷന്‍ ഉള്‍പ്പെടെയുള്ള സംഘടനകളും മണ്ണാര്‍ക്കാട് മഹല്ല് കമ്മിറ്റിയുമാണ് പരാതി നല്‍കിയത്.

ആന്‍ഡമാനിലെ പള്ളികളില്‍ ബംഗ്ലാദേശി പൗരന്‍മാരെയും രോഹിംഗ്യകളെയും പാകിസ്ഥാനികളെയും താമസിപ്പിക്കുന്നു എന്നതുള്‍പ്പെടെയുള്ള ആരോപണങ്ങള്‍ പതിവായി സോഷ്യല്‍ മീഡിയകളിലൂടെ ഉന്നയിച്ച് സമുദായിക സൗഹാര്‍ദം തകര്‍ക്കാന്‍ ശ്രമിക്കുന്ന മനോജ് പാലിനെതിരേ ഭാരതീയ ന്യായ് സംഹിതയിലെ (ബി.എന്‍.എസ്) പ്രസക്തമായ വകുപ്പുകള്‍ പ്രകാരം കേസെടുക്കണമെന്നാണ് പരാതിയിലെ ആവശ്യം.

പ്രതിയുടെ ആരോപണങ്ങളെല്ലാം വാസ്തവവിരുദ്ധവും മുസ്ലിംവിഭാഗത്തിന് നേരെ മനപ്പൂര്‍വം പ്രകോപനം സൃഷ്ടിക്കുകയെന്ന ലക്ഷ്യത്തോടെയുള്ളതാണെന്നും സൗത്ത് ആന്‍ഡമാനിലെ ബംബൂഫ്‌ലാറ്റ് പൊലിസ് സ്റ്റേഷന്‍ മേധാവിക്ക് നല്‍കിയ പരാതിയില്‍ മണ്ണാര്‍ക്കാട് മസ്ജിദ് കമ്മിറ്റി സെക്രട്ടറി പി.കെ കുഞ്ഞിതു ചൂണ്ടിക്കാട്ടി.

കഴിഞ്ഞ ലോക്‌സഭാ തെരഞ്ഞെടുപ്പില്‍ സ്വതന്ത്രസ്ഥാനാര്‍ഥിയായി മത്സരിച്ച മനോജ് പാല്‍, വിദ്വേഷപ്രചാരണത്തിന്റെയും വിവാദ പരാമര്‍ശങ്ങളുടെയും പേരില്‍ നേരത്തെയും വിവാദത്തില്‍പ്പെട്ട വ്യക്തിയാണ്.

mass complaint filed against Hate propaganda targeting Muslims in Andaman Island community