യുവേഫ നേഷൻസ് ലീഗ് കിരീടം സ്വന്തമാക്കി പോർച്ചുഗൽ. ഫൈനലിൽ സ്‌പെയിനെ പെനൽറ്റി ഷൂട്ടൗട്ടിൽ 5-3 ന് തോൽപ്പിച്ചാണ് റോണോയുടെയും സംഘത്തിന്റെയും വിജയം. നിശ്ചിത സമയത്തും അധിക സമയത്തും 2-2 എന്ന സ്‌കോറിൽ സമനിലയിൽ പിരിഞ്ഞ മത്സരത്തിൽ, പെനൽറ്റി ഷൂട്ടൗട്ടിലൂടെയാണ് പോർച്ചുഗൽ വിജയികളായത്. മത്സരത്തിൽ സൂപ്പർതാരം ക്രിസ്റ്റ്യാനോ റൊണാൾഡോ ലക്ഷ്യം കണ്ടിരുന്നു. പോർച്ചുഗലിന് സമനില നേടിക്കൊടുത്തത് റൊണാൾഡോയായിരുന്നു. 

എന്നാൽ മത്സരം പൂർത്തിയാക്കുന്നതിനു മുമ്പേ റൊണാൾഡോ പരുക്ക് പറ്റി കളംവിട്ടിരുന്നു. മത്സരശേഷം തന്റെ പരിക്കിനെക്കുറിച്ച് റൊണാൾഡോ സംസാരിച്ചു. ഒരു കാൽ ഒടിഞ്ഞുപോയെങ്കിലും താൻ ഫൈനലിൽ കളിക്കാൻ ഇറങ്ങുമായിരുന്നുവെന്നാണ് റൊണാൾഡോ പറഞ്ഞത്. മത്സരത്തിൽ ഗോൾ നേടാൻ സാധിച്ചതിൽ സന്തോഷമുണ്ടെന്നും റൊണാൾഡോ പറഞ്ഞു. 

"സന്നാഹ മത്സരത്തിൽ എനിക്ക് പരുക്ക് അനുഭവപ്പെട്ടു തുടങ്ങിയിരുന്നു. കുറച്ചു ദിവസങ്ങളിൽ പരുക്ക് സംഭവിക്കാൻ തുടങ്ങിയിരുന്നു. എന്നാൽ ദേശീയ ടീമിനെ സംബന്ധിച്ചിടത്തോളം എന്റെ ഒരു കാൽ ഒടിഞ്ഞാൽ പോലും ഞാൻ കളിക്കാൻ പോകുമായിരുന്നു. ഇതൊരു കിരീടമാണ്. അതുകൊണ്ട് തന്നെ എനിക്ക് കളിക്കണമായിരുന്നു. ഫൈനലിൽ എനിക്ക് ചെയ്യാൻ കഴിയുന്നതെല്ലാം ഞാൻ നൽകി. എനിക്ക് കളിക്കാൻ കഴിയുന്ന വരെ ഞാൻ കളിച്ചു. ടീമിനായി ഒരു ഗോൾ നേടാനും എനിക്ക് സാധിച്ചു'' റൊണാൾഡോ മത്സരശേഷം പറഞ്ഞു. 

സെമി ഫൈനലിൽ ജർമ്മനിയെ ഒന്നിനെതിരെ രണ്ടു ഗോളുകൾക്ക് തകർത്ത റൊണാൾഡോയും സംഘവും ഫൈനലിലേക്ക് മുന്നേറിയത്. മത്സരത്തിൽ ഒരു ഗോളിന് പുറകിൽ നിന്ന് ശേഷമായിരുന്നു പോർച്ചുഗൽ വിജയം പിടിച്ചെടുത്തത്. ഈ മത്സരത്തിലും പോർച്ചുഗലിനായി വിജയഗോൾ നേടിയത് റൊണാൾഡോയായിരുന്നു. ഇനി റൊണാൾഡോയുടെ മുന്നിലുള്ളത് അടുത്ത വർഷം നടക്കുന്ന ലോകകപ്പാണ്. 

അടുത്ത വർഷം നടക്കുന്ന ഫിഫ ലോകകപ്പിലും റൊണാൾഡോ കളിക്കുമെന്നാണ് പ്രതീക്ഷിക്കുന്നത്. ലോകകപ്പിൽ പോർച്ചുഗലിനായി 22 മത്സരങ്ങളിൽ നിന്നും എട്ട് ഗോളുകളാണ് റൊണാൾഡോ നേടിയിട്ടുള്ളത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്. 

Cristaino Ronaldo Talks His Dedication of Portugal Football Team