കൊച്ചി: അധ്യാപക പുനർ നിയമനത്തിനായി കൈക്കൂലി വാങ്ങിയ കേസിൽ സെക്രട്ടറിയേറ്റ് കേന്ദ്രീകരിച്ചും വിജിലൻസ് അന്വേഷണം നടത്തും. കേസിലെ പ്രതിയായ വടകര സ്വദേശിയായ റിട്ടയേർഡ് അധ്യാപകൻ കെ.പി വിജയനെ അറസ്റ്റ് ചെയ്തതിന് പിന്നാലെയാണ് അന്വേഷണം സെക്രട്ടറിയേറ്റിലേക്ക് നീങ്ങുന്നത്. സെക്രട്ടറിയേറ്റിൽ പൊതു വിദ്യാഭ്യാസ വകുപ്പിലെ ഉദ്യോഗസ്ഥരുടെ ഏജന്റാണ് വിജയനെന്ന് വിജിലൻസ് അന്വേഷണത്തിൽ വ്യക്തമായിരുന്നു. കൂടുതൽ വിവരങ്ങൾക്കായി വിജയനെ ഇന്ന് കസ്റ്റഡിയിൽ വാങ്ങി ചോദ്യം ചെയ്യും. 

കേസിലെ പ്രതിയായായ കെ.പി വിജയന്റെ ഫോൺ രേഖകൾ പരിശോധനക്ക് അയച്ചിട്ടുണ്ട്. ഇതിൽ നിന്ന് ലഭിക്കുന്ന വിവരങ്ങൾക്ക് അനുസരിച്ച് ആകും കേസുമായി ബന്ധമുള്ള മറ്റുവരിലേക്ക് കൂടി കേസ് എത്തുക. മുൻ ഹെഡ്മാസ്റ്റർ ആയ ഇയാൾ ഈ സംഘത്തിലെ ചെറിയൊരു കണ്ണി മാത്രമാണെന്നാണ് അന്വേഷണ സംഘത്തിന്റെ നിഗമനം. പരാതിക്കാരായ അധ്യാപകരുടെ ഫയലുകൾ സെക്രട്ടറിയേറ്റിൽ നിന്നും ഇയാൾക്ക് നൽകിയതിന് പിന്നിൽ ഉന്നത ഉദ്യോഗസ്ഥർ അടക്കം ഉണ്ടെന്നാണ് വിജിലൻസ് കണക്കുകൂട്ടൽ. വിജയനെ കൂടുതൽ ചോദ്യം ചെയ്യുന്നതിലൂടെ ഇവർ ആരൊക്കെ എന്ന് പുറത്തുകൊണ്ടുവരാനാണ് നീക്കം.

പാലാ ഉപജില്ലയിലെ മൂന്ന് അധ്യാപകരുടെ പുനർ നിയമനം സംബന്ധിച്ച ഫയലുകൾ ശരിയാക്കി നൽകാമെന്നു പറഞ്ഞാണ് പ്രതി കെ.പി വിജയൻ കൈകൂലി ആവശ്യപ്പെട്ടത്. ഒരാൾക്ക് രണ്ട് ലക്ഷം രൂപ വീതം ആകെ ആറ് ലക്ഷ്യമായിരുന്നു കൈക്കൂലി. ഇതിൽ ഒന്നര ലക്ഷം രൂപ ഓരോ ആളുകളും ആദ്യം നൽകണം. നിയമന നടപടികൾ പൂർത്തിയാകുമ്പോൾ ഓരോരുത്തരും രണ്ട് ലക്ഷം രൂപ വീതം നൽകണം. ഇത്തരത്തിൽ ഒന്നര ലക്ഷം രൂപ കഴിഞ്ഞ ദിവസം കൊച്ചിയിൽ വെച്ച് കൈമാറുന്നതിനിടെയാണ് ഇയാൾ വിജിലസിന്റെ വലയിലായത്. കോട്ടയം വിജിലൻസ് ഡിവൈഎസ്പി രവികുമാറും സംഘവുമാണ് ഇയാളെ പിടികൂടിയത്.

അതേസമയം, റിമാൻഡിലുള്ള പ്രതിയെ കസ്സ്റ്റഡിയിൽ ലഭിക്കുന്നതിന് അന്വേഷണ സംഘം കോടതിയിൽ അപേക്ഷ നൽകിയിട്ടുണ്ട്. പ്രതിയുടെ ഫോൺ വിശദാംശങ്ങളും വിജിലൻസ് തേടിയിട്ടുണ്ട്. സെക്രട്ടറിയേറ്റിലെ പൊതു വിദ്യാഭ്യാസ വകുപ്പ് അസിസ്റ്റന്റ് സെഷൻ ഓഫീസർ സുരേഷ് ബാബു ആണ് കേസിലെ രണ്ടാം പ്രതി. കൂടുതൽ ഉന്നതരുണ്ടോ എന്ന് വൈകാതെ പുറത്തുവരുമെന്ന് വിജിലസ്റൺ വിഭാഗം കണക്കാക്കുന്നു.