ഇന്നത്തെ കാലത്തെ ജീവിതശൈലിയും ശരിയല്ലാത്ത ഭക്ഷണക്രമവും ചെറുപ്രായത്തില്‍ തന്നെ പലരുടെയും മുടി നരയ്ക്കാന്‍ കാരണമാകുന്നു. ഇത്തരത്തിലുള്ള പ്രശ്‌നങ്ങള്‍ ഒഴിവാക്കാനായി പല തരത്തിലുള്ള വില കൂടിയ ഹെയര്‍ ഡൈകളും കളറുകളും ഉപയോഗിക്കുകയും ചെയ്യുന്നു. എന്നിട്ടോ മുടി  കറുക്കുന്നുമില്ല, ഒരാഴ്ചയ്ക്കുള്ളില്‍ തന്നെ വീണ്ടും വെള്ള മുടിയായി മാറുന്നു. അപ്പോള്‍ മുടി വീണ്ടും കളര്‍ ചെയ്യണം. ഇങ്ങനെ നിരന്തരമായി ഇത് ചെയ്തു കൊണ്ടിരിക്കണം. 

എന്നാല്‍ വിലയേറിയതോ രാസവസ്തുക്കള്‍ അടങ്ങിയതോ ആയ ഡൈയോ കളറോ ഉപയോഗിക്കാതെ നിങ്ങളുടെ മുടി കറുപ്പിക്കാന്‍ ആഗ്രഹിക്കുന്നുണ്ടെങ്കില്‍ നമുക്കിതൊന്ന് പരീക്ഷിച്ചു നോക്കാം. യാതൊരു സൈഡഫെക്ടുമുണ്ടാവില്ല.
രാസവസ്തുക്കള്‍ ഇല്ലാതെ സ്വാഭാവികമായി മുടി എങ്ങനെ കറുപ്പിക്കാമെന്ന് നോക്കാം. ഇത് മുടി പൊട്ടുന്നത് തടയാനും മുടി കൊഴിച്ചില്‍ തടയാനും സഹായിക്കും. 

മുടി നരയ്ക്കുന്നത്

മുടി നരയ്ക്കുന്നതിന് നിരവധി കാരണങ്ങളുണ്ട്. ഇതിനു പ്രധാന കാരണം രോമകൂപങ്ങളിലെ മെലാനിന്‍ ഉല്‍പാദനത്തിലെ കുറവാണ്. മുടി, ചര്‍മം, കണ്ണുകള്‍ എന്നിവയ്ക്ക് നിറം നല്‍കുന്നത് മെലാനിന്‍ ആണ്. പ്രായം കൂടുന്നതിനനുസരിച്ച് നരയ്ക്കുന്ന ഈ പ്രക്രിയ അനിവാര്യമായിത്തീരുന്നു. എന്നാല്‍ മറ്റ് ചില കാരണങ്ങളുമുണ്ടാകാം. ജനിതക കാരണങ്ങള്‍, സമ്മര്‍ദം, പോഷകങ്ങളുടെ കുറവ് അല്ലെങ്കില്‍ ആരോഗ്യ പ്രശ്‌നങ്ങള്‍ പോലുള്ളവ. 

ചേരുവ

ഉള്ളിയുടെ തൊലി - ഒരു പിടി
കരിഞ്ചീരകം- ഒരു സ്പൂണ്‍
ഉലുവ- ഒരു സ്പൂണ്‍
തേയില - ഒരു സ്പൂണ്‍
വെള്ളം- 4 കപ്പ്

തയ്യാറാക്കുന്ന രീതി

ഒരു പാത്രത്തില്‍ 4 കപ്പ് വെള്ളം ചൂടാക്കുക. അതിലേക്ക് ഉള്ളിയുടെ തൊലിയും കരിഞ്ചീരകവും തേയിലയും ഉലുവയും  ചേര്‍ക്കുക. ശേഷം, ഇവയെല്ലാം നന്നായി വേവിക്കുക. ഈ വെള്ളം തണുക്കാന്‍ വയ്ക്കുക. നിങ്ങളുടെ മുടി കറുപ്പിക്കാനുള്ള വെള്ളം തയ്യാറായി.

ഉപയോഗിക്കുന്ന രീതി

തണുത്തു കഴിഞ്ഞ വെള്ളം നിങ്ങള്‍ ഒരു സ്‌പ്രേ കുപ്പിയില്‍ നിറയ്ക്കണം. ഈ വെള്ളം നിങ്ങള്‍ ദിവസവും മുടിയുടെ വേരുകളില്‍ തളിക്കണം. ഇത് തല മുടിയില്‍ മാത്രമല്ല, താടി രോമങ്ങളിലും ഉപയോഗിക്കാം. ഈ വെള്ളം മൂന്നോ നാലോ ദിവസം തുടര്‍ച്ചയായി മുടിയില്‍ സ്‌പ്രേ ചെയ്യുക. ശേഷം നിങ്ങള്‍ക്കു മുടി കഴുകാം.

ചെറിയ പ്രായത്തില്‍ തന്നെ നിങ്ങളുടെ മുടി വളരെ പെട്ടെന്ന് വെളുത്തതായി മാറുന്നുണ്ടെങ്കില്‍ ഒരു ഡോക്ടറെയോ ഡെര്‍മറ്റോളജിസ്റ്റിനെയോ കാണാന്‍ മറക്കരുത്. 

In today’s fast-paced lifestyle, poor dietary habits and stress are causing premature greying of hair, even in young people. To counter this, many turn to expensive and chemical-based hair dyes and colors.