കൊച്ചി: കേരള തീരത്ത് അറബിക്കടലിൽ ചരക്ക് കപ്പൽ അപകടത്തിൽ പെട്ട സംഭവത്തിൽ കേസെടുത്ത് കേരളം. ലൈ​ബീ​രി​യ​ൻ കപ്പലായ എംഎസ്‌സി എൽസ 3 കണ്ടെയ്‌നർ കപ്പൽ അപകടത്തിലാണ് സംസ്ഥാന പൊലിസ് കേസെടുത്തത്. എംഎസ്‌സി എൽസ 3 കണ്ടെയ്‌നർ കപ്പൽ ഉടമയാണ് കേസിലെ ഒന്നാം പ്രതി. ഷിപ്പ് മാസ്റ്റർ രണ്ടാം പ്രതിയും ഷിപ്പിംഗ് ക്രൂ മൂന്നാം പ്രതിയുമാണ്. മനുഷ്യജീവന് അപകടം ഉണ്ടാക്കും വിധം ചരക്ക് കപ്പൽ കൈകാര്യം ചെയ്തു എന്ന നിലയിൽ ഫോർട്ട് കൊച്ചി കോസ്റ്റൽ പൊലിസാണ് കേസെടുത്തത്. 

ആലപ്പുഴ സ്വദേശിയായ മത്സ്യത്തൊഴിലാളി സി. ഷാംജി നൽകിയ പരാതിയുടെ അടിസ്ഥാനത്തിലാണ് കേസെടുത്തത്. കപ്പൽ അപകടത്തിൽ കേസെടുക്കേണ്ടതില്ലെന്ന നിലപാടിലായിരുന്നു സംസ്ഥാന സർക്കാർ. കേന്ദ്ര സർക്കാരും ഈ തീരുമാനത്തിന് ഒപ്പമായിരുന്നു. കേസെടുക്കേണ്ടെന്നും നഷ്ടപരിഹാരം വാങ്ങിയെടുക്കാമെന്നും മുഖ്യമന്ത്രിയും സംസ്ഥാന ചീഫ് സെക്രട്ടറിയും കേ​ന്ദ്ര ഷി​പ്പി​ങ്​ മന്ത്രാലയം സെക്രട്ടറിയും തമ്മിലുണ്ടായ ചർച്ചയിൽ തീരുമാനമെടുക്കുകയും ചെയ്തിരുന്നു. സർക്കാറിൻറെ ഈ നിലപാടിനെതിരെ പ്രതിപക്ഷം അടക്കമുള്ളവർ വിമർശനവുമായി രംഗത്തുവന്നിരുന്നു.

ഇതിനിടെ, എംഎസ്‌സി എൽസ 3 കപ്പലിന്റെ ഉടമ ഇന്ത്യൻ വ്യവസായി ഗൗതം അദാനിയുടെ വ്യാപാര പങ്കാളിയെന്ന് റിപ്പോർട്ടുകൾ പുറത്തുവരുന്നു. അദാനിയുടെ മുന്ദ്ര, എന്നൂർ തുറമുഖങ്ങളിൽ എംഎസ്‌സിക്ക് ഓഹരി പങ്കാളിത്തമുണ്ട്. ഗുജറാത്തിലെ മുന്ദ്ര തുറമുഖത്തെ അദാനി കണ്ടെയ്‌നർ ടെർമിനലിൽ 50% ഓഹരിയാണ് എംഎസ്‌സിക്ക് ഉള്ളത്. ചെന്നൈയിലെ അദാനിയുടെ എന്നൂർ തുറമുഖത്തിൽ എംഎസ്‌സിയുടെ ഉപകമ്പനിക്ക് 49% ഓഹരിയും ഉണ്ട്. 

മെ​യ് 24ന് ​ആണ് ലൈ​ബീ​രി​യ​ൻ ച​ര​ക്ക് ക​പ്പ​ലാ​യ എം.​എ​സ്.​സി എ​ൽ​സ ഒ​രു വ​ശ​ത്തേ​ക്ക് ചെ​രി​ഞ്ഞ​ത്. അ​പ​ക​ടം ന​ട​ന്ന ശ​നി​യാ​ഴ്ച​യും ക​പ്പ​ൽ പൂ​ർ​ണ​മാ​യും മു​ങ്ങി​യ ഞാ​യ​റാ​ഴ്ച​യി​ലു​മാ​യി ക​പ്പ​ലി​ലു​ള്ള 24 ജീ​വ​ന​ക്കാ​രെ​യും ര​ക്ഷ​പ്പെ​ടു​ത്തി. തുടക്കത്തിൽ ഏതാനും കണ്ടയ്നറുകൾ വെള്ളത്തിൽ വീണൊള്ളൂവെങ്കിലും ക​പ്പ​ൽ പ​തി​യെ പ​തി​യെ ചെ​രി​യു​ക​യും മ​ണി​ക്കൂ​റു​ക​ൾ​ക്ക​കം പൂ​ർ​ണ​മാ​യും മു​ങ്ങു​ക​യും ചെയ്തു. കൊ​ച്ചി തീ​ര​ത്ത് നി​ന്നും തെ​ക്ക് പ​ടി​ഞ്ഞാ​റ​ൻ ദി​ശ​യി​ൽ 38 നോ​ട്ടി​ക്ക​ൽ മൈ​ൽ അ​ക​ലെ​യാ​ണ്​ അപകടമുണ്ടായത്.