തിരുവനന്തപുരം:സമസ്തയുടെ ഒരു നൂറ്റാണ്ടുകാലത്തെ ചരിത്രം പ്രതിപാദിക്കുന്ന 'കോൺഫ്ലുവൻസ് ' കോഫി ടേബിൾ ബുക്കിൻ്റെപ്രകാശനച്ചടങ്ങിൽ സമസ്തയുടെ ചരിത്രം പറഞ്ഞും സ്ഥാപക നേതാക്കളെ സ്മരിച്ചും മുഖ്യമന്ത്രി പിണറായി വിജയൻ.വരക്കൽ മുല്ലക്കോയ തങ്ങൾ ഉൾപ്പെടെയുള്ള സമസ്തയുടെ സ്ഥാപക നേതാക്കളെ പേരെടുത്ത് പറഞ്ഞ മുഖ്യമന്ത്രി സമസ്തയുടെ പ്രവർത്തനങ്ങൾക്കു പിന്നിൽ ഈ പണ്ഡിതന്മാരുടെയൊക്കെ സംഘാടന, പ്രവർത്തന മികവ് പ്രധാന പങ്കുവഹിച്ചിട്ടുണ്ടെന്നും പറഞ്ഞു.

നാടിനും രാജ്യത്തിനും അഭിമാനകരമായ വലിയൊരു സാംസ്കാരിക, വൈജ്ഞാനിക പാരമ്പര്യം സമസ്തക്കുണ്ട്. രാജ്യത്ത് ന്യൂനപക്ഷങ്ങൾക്ക് ആരാധനാ സ്വാതന്ത്ര്യവും വസ്ത്രസ്വാതന്ത്ര്യവും നിഷേധിക്കപ്പെടുന്ന കാലമാണ്. എല്ലാതരത്തിലുമുള്ള വർഗീയ പ്രവണതകളെയും എതിർക്കപ്പെടേണ്ടതാണ്. എല്ലാ വിഭാഗം ജനങ്ങളെയും ചേർത്തുനിർത്തുന്ന സമീപനമാണ് സമസ്ത സ്വീകരിച്ചിട്ടുള്ളതെന്നും അതാണ് മനുഷ്യത്വമെന്നും മുഖ്യമന്ത്രി പറഞ്ഞു. സാമൂഹിക ഐക്യം കാത്തുസൂക്ഷിക്കാൻ സഹായകരമായിട്ടുള്ള നിരവധി ഇടപെടലുകൾ സമസ്ത പ്രസിഡൻ്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ നടത്തിയിട്ടുണ്ടെന്നും മുഖ്യമന്ത്രി പറഞ്ഞു.

സമസ്തയുടെ ചരിത്രം പറയുന്നതിനൊപ്പം പതിനാല് ഭാഗങ്ങളിലായി വിവിധ വിഷയങ്ങളിൽ സമസ്തയ്ക്കുള്ള കാഴ്ച്ചപ്പാടും പുസ്തകത്തിൽ അവതരിപ്പിക്കുന്നുണ്ട്. അതിൽ ചില വിഷയങ്ങളിൽ തനിക്ക് വിയോജിപ്പുണ്ടെന്നും അതിനുളള ഇടംകൂടി ജനാധിപത്യത്തിൽ ഉണ്ടെന്നും മുഖ്യമന്ത്രി പറഞ്ഞു.