തിരുവനന്തപുരം: വർഗീയത ആളിക്കത്തുന്ന കാലത്ത് സമസ്ത കേരളജംഇയ്യത്തുൽ ഉലമയുടെ സാന്നിധ്യം നാടിന് ആശ്വാസകരമാണെന്ന് പ്രതിപക്ഷ നേതാവ് വി.ഡി സതീശൻ. പച്ചവെള്ളത്തിനുപോലും തീപിടിപ്പിക്കുന്ന കാലമാണ്. എവിടെയും വർഗീയതയെ ആളിക്കത്തിക്കാൻ പലരും നോക്കി നിൽക്കുന്നുണ്ട്. എന്നാൽ എല്ലാവരെയും ചേർത്തുനിർത്തുക എന്ന പ്രവാചക സന്ദേശംപകരുന്ന സമസ്തയുടെ ആശ്വാസകരമായ സാന്നിധ്യമാണെന്നും സമസ്തയില്ലാത്ത കേരളത്തെ ചിന്തിക്കാൻ പോലും കഴിയുന്നില്ലെന്നും പ്രതിപക്ഷ നേതാവ് പറഞ്ഞു.

മനുഷ്യർക്കിടയിൽ വിടവുണ്ടാക്കാൻ ഒരിക്കൽ പോലും സമസ്തശ്രമിച്ചിട്ടില്ലെന്ന് പ്രതിപക്ഷ നേതാവ് ചൂണ്ടിക്കാണിച്ചു. പാരമ്പര്യ ഇസ്ലാമിൻ്റെ യഥാർഥ സന്ദേശം കുഞ്ഞുങ്ങളെ പഠിപ്പിച്ചുകൊണ്ടാണ് സമസ്ത വളർത്തിയെടുക്കുന്നത്. എന്താണ് യഥാർഥ ഇസ്ലാം എന്നു കുട്ടികളെ പഠിപ്പിക്കാൻ സമസ്തയ്ക്ക് കഴിഞ്ഞുവെന്നും തലമുറയിൽ തലമുറകളിലേക്ക് വെളിച്ചം കൈമാറിയ മുഴുവൻ നേതാക്കളെയും ഓർമിക്കുന്നുവെന്നും പ്രതിപക്ഷ നേതാവ് പറഞ്ഞു.