ദുബൈ: ജൂലൈ 1 മുതല്‍ റെസിഡന്‍സി വിസയുള്ള യുഎഇയിലെ താമസക്കാര്‍ക്കും അര്‍മേനിയ വിസ രഹിത പ്രവേശനം അനുവദിക്കുമെന്ന് ഖലീജ് ടൈംസ് റിപ്പോര്‍ട്ട്.

യാത്രക്കാരുടെ റെസിഡന്‍സി വിസകള്‍ പ്രവേശന തീയതി മുതല്‍ കുറഞ്ഞത് ആറ് മാസത്തേക്ക് സാധുതയുള്ളതായിരിക്കണം. മുമ്പ്, യുഎഇയിലെ പൗരന്മാര്‍ക്ക് മാത്രമേ അര്‍മേനിയയിലേക്ക് വിസയില്ലാതെ യാത്ര ചെയ്യാന്‍ കഴിയുമായിരുന്നുള്ളൂ.  അതേസമയം താമസക്കാര്‍ക്ക് വിസ ഓണ്‍ അറൈവലിന് അര്‍ഹതയുണ്ടായിരുന്നു. ഈ നയത്തിലാണ് അര്‍മേനിയന്‍ സര്‍ക്കാര്‍ മാറ്റം വരുത്തിയിരിക്കുന്നത്.

ALSO READ: UAE Job Alert: ദുബൈയിൽ ആറു ലക്ഷം രൂപയ്ക്ക് മുകളിൽ ശമ്പളമുള്ള പ്രവാസികൾക്ക് അപേക്ഷിക്കാവുന്ന 10 സർക്കാർ ജോലികൾ; അപേക്ഷിക്കേണ്ട വിധം ഇങ്ങനെ

പുതിയ വിസ രഹിതനയം ടൂറിസം, വിനോദം, ബിസിനസ് എന്നീ ആവശ്യങ്ങള്‍ക്കായി 180 ദിവസത്തെ കാലയളവില്‍ 90 ദിവസം വരെ താമസിക്കാം. ഇതിന് വിസയുടെ ആവശ്യമുണ്ടാകില്ല. ജിസിസി രാജ്യങ്ങളില്‍ നിന്നുള്ള എല്ലാ പാസ്‌പോര്‍ട്ട് ഉടമകള്‍ക്കും ആറ് ഗള്‍ഫ് രാജ്യങ്ങളില്‍ ഏതെങ്കിലും ഒരു രാജ്യത്തെ സാധുവായ റെസിഡന്‍സി പെര്‍മിറ്റ് കൈവശമുള്ള വ്യക്തികള്‍ക്കും ഈ ആനുകൂല്യം ലഭിക്കും. താമസക്കാര്‍ക്കായി വിസ ഫ്രീ എന്‍ട്രി സംരംഭം വിപുലീകരിക്കുന്നത് ജിസിസി പ്രവാസി സമൂഹങ്ങളിലെ ഒരു പ്രധാന വിഭാഗത്തിന്റെ പ്രവേശനക്ഷമത വിശാലമാക്കുമെന്ന് രാജ്യത്തെ ടൂറിസം കമ്മിറ്റി പറഞ്ഞു.

ജിസിസി, യൂറോപ്യന്‍ യൂണിയന്‍ (ഇയു), ഷെങ്കന്‍ ഏരിയ എന്നിവിടങ്ങളിലെ രാജ്യങ്ങള്‍ നല്‍കുന്ന കുറഞ്ഞത് ആറ് മാസത്തേക്ക് സാധുതയുള്ള റെസിഡന്‍സി പെര്‍മിറ്റുകള്‍ കൈവശമുള്ള യാത്രക്കാര്‍ക്ക് വിസ രഹിത നയം വ്യാപിപ്പിക്കുന്നതിനുള്ള അര്‍മേനിയന്‍ സര്‍ക്കാരിന്റെ വിശാലമായ സംരംഭത്തിന്റെ ഭാഗമാണ് ഈ മാറ്റം.

കഴിഞ്ഞ മാസം നടന്ന അര്‍മേനിയന്‍ മന്ത്രിസഭാ യോഗത്തിലാണ് ഈ തീരുമാനം കൈകൊണ്ടത്. പുതിയ നയത്തിലൂടെ സാമ്പത്തിക ബന്ധങ്ങള്‍ ശക്തിപ്പെടുത്തുന്നതിനും ടൂറിസം വര്‍ധിപ്പിക്കുന്നതിനും അര്‍മേനിയയ്ക്കും ജിസിസി അംഗരാജ്യങ്ങള്‍ക്കും ഇടയിലുള്ള ബിസിനസ് അവസരങ്ങള്‍ സുഗമമാക്കുന്നതിനും സഹായിക്കുമെന്നാണ് പ്രതീക്ഷിക്കുന്നത്.

യൂറോപ്പിന്റെയും ഏഷ്യയുടെയും സംഗമസ്ഥാനത്ത് സ്ഥിതി ചെയ്യുന്ന അര്‍മേനിയ, യുഎഇ നിവാസികളുടെ, പ്രത്യേകിച്ച് പ്രവാസികളുടെ ഒരു ഡ്രീം ഡെസ്റ്റിനേഷനാണ്. യുഎഇയില്‍ നിന്ന് മൂന്ന് മണിക്കൂര്‍ നേരത്തെ വിമാനയാത്ര മതി അര്‍മേനിയയില്‍ എത്താന്‍. ഫ്‌ലൈദുബൈ, എയര്‍ അറേബ്യ, വിസ് എയര്‍ തുടങ്ങിയ വിമാനക്കമ്പനികള്‍ അര്‍മേനിയയിലേക്ക് നേരിട്ട് വിമാന സര്‍വീസുകള്‍ നടത്തുന്നുണ്ട്.

ALSO READ: പ്രവാസികളുടെ പ്രത്യേക ശ്രദ്ധയ്ക്ക്, വിദേശത്ത് പോകുന്നത് നാട്ടുകാരെ അറിയിക്കാൻ ബോർഡിംഗ് പാസ് ഫോട്ടോ എടുത്ത് സോഷ്യൽ മീഡിയയിൽ ഇടേണ്ട; മുന്നറിയിപ്പ് നൽകി വിദഗ്ധർ

മനോഹരമായ പ്രകൃതിദൃശ്യങ്ങളാല്‍ സമ്പന്നമായി അര്‍മേനിയയിലെ പല ആശ്രമങ്ങളും യുനെസ്‌കോ പട്ടികയില്‍ ഇടം നേടിയിട്ടുണ്ട്. 2017ല്‍ യുഎഇയിലെയും 2019ല്‍ ഖത്തറിലെയും 2022ല്‍ കുവൈത്തിലെയും പൗരന്മാര്‍ക്ക് അര്‍മേനിയ വിസ ഫ്രീ എന്‍ട്രി അവതരിപ്പിച്ചിരുന്നു.

UAE expatriates with valid residency visas can now travel to Armenia without a visa. Learn more about the updated visa-free entry policy and eligibility requirements.