മൂന്നാറിലെ നീലക്കുറിഞ്ഞി പോലെ കോട്ടയത്തുകാരുടെ ആമ്പല്‍വസന്തവും ആരംഭിച്ചു. ആമ്പല്‍ പൂക്കളാല്‍ മലരിക്കല്‍ വീണ്ടും സജീവമായി. കണ്ണെത്താ ദൂരത്തോളമാണ് ആമ്പല്‍പ്പൂക്കള്‍ വിരിഞ്ഞു നില്‍ക്കുന്നത്. നയന മനോഹരമായ ഈ കാഴ്ച കാണാന്‍ നിരവധി സഞ്ചാരികളും എത്തിത്തുടങ്ങി. 

എല്ലാ വര്‍ഷവും കൊയ്ത്തു കഴിഞ്ഞു പാടത്ത് വെള്ളം കയറ്റുമ്പോഴാണ് ആമ്പല്‍ കിളിര്‍ത്തു തുടങ്ങുക. വര്‍ഷത്തില്‍ ഒരിക്കല്‍ മാത്രമാണ് പൂ വസന്തമുണ്ടാവുന്നത്. രാവിലെ 6 മുതല്‍ 10 വരെയാണ് മലരിക്കലില്‍ ആളുകള്‍ എത്തുന്നത്. പത്ത് മണിക്കു ശേഷം പൂക്കള്‍ വാടിപ്പോവും.

ദൂരെ നിന്നു നോക്കുമ്പോള്‍ പിങ്ക് പരവതാനി വിരിച്ചതാണോ എന്നു തോന്നിപ്പോവുന്ന കാഴ്ച തന്നെയാണ് അതിമനോഹരം. ഈ ആമ്പല്‍ വസന്തം കാണാനും ഫോട്ടോ എടുക്കാനും വഞ്ചിയിലിരുന്നുള്ള ഫോട്ടോയും കല്യാണ ഫോട്ടോകളും സേവ് ദ ഡേറ്റും ബേബി ഷവര്‍ മുതല്‍ ഫാഷന്‍ ഫോട്ടോ ഷൂട്ട് വരെ ഇവിടെ നടക്കുന്നുണ്ട്. 

തിരുവായ്ക്കരി പാടത്താണ് ഏറ്റവും കൂടുതല്‍ ആമ്പല്‍പൂവുള്ളത്. പൂ വില്‍പന നടത്തുന്നത് തൊഴിലുറപ്പ് തൊഴിലാളികളായ സ്ത്രീകളും. തിരുവാര്‍പ്പ് പഞ്ചായത്തിലെ 1800 ഏക്കറുള്ള ജെ ബ്ലോക്ക് ഒമ്പതിനായിരം, 950 ഏക്കറുള്ള തിരുവായിക്കരി പാടശേഖരത്താണ് ആമ്പല്‍ വിരിയുന്നത്.