അഹമ്മദാബാദ്: ലണ്ടനിലെ ഗാറ്റ്വിക്ക് വിമാനത്താവളത്തിലേക്ക് പുറപ്പെട്ട എയർ ഇന്ത്യയുടെ ബോയിംഗ് 787 ഡ്രീംലൈനർ (എഐ 171) ഇന്ന് ഉച്ചയ്ക്ക് അഹമ്മദാബാദിൽ നിന്ന് പറന്നുയർന്ന് മിനിറ്റുകൾക്കകം തകർന്നുവീണു. വിമാനത്തിൽ 230 യാത്രക്കാരും രണ്ട് പൈലറ്റുമാരും 10 ക്യാബിൻ ക്രൂ അംഗങ്ങളും ഉൾപ്പെടെ 242 പേർ ഉണ്ടായിരുന്നതായി എയർ ഇന്ത്യ എക്‌സിൽ പോസ്റ്റ് ചെയ്ത ഔദ്യോഗിക പ്രസ്താവനയിൽ സ്ഥിരീകരിച്ചു. മുൻ ഗുജറാത്ത് മുഖ്യമന്ത്രി വിജയ് രൂപാണിയും യാത്ര ചെയ്തിരുന്നു. നിർഭാ​ഗ്യകരമെന്ന് പറയേണ്ടി വരും വിമാനത്തിലുണ്ടായിരുന്ന മുഴുവൻ യാത്രക്കാരും മരിച്ചതായാണ് വിവരം. 

അഹമ്മദാബാദിൽ വിമാന ദുരന്തത്തിൽ മരിച്ചവരിൽ മലയാളിയും ഉൾപ്പെടുന്നു. പത്തനംതിട്ട തിരുവല്ല പുല്ലാട്ട് സ്വദേശിയായ രഞ്ജിത ആർ നായർ ആണ് മരിച്ചത്.  പത്തനംതിട്ട തിരുവല്ല പുല്ലാട്ട് സ്വദേശിയായ യുവതിയുടെ മരണവിവരം ജില്ലാ കളക്ടർ അറിയിച്ചു. ലണ്ടനിൽ നഴ്സായ രജ്‍ഞിത, നാട്ടിൽ സർക്കാർ ജോലി ലഭിച്ചതിനെ തുടർന്ന് തിരുവല്ലയിലെത്തിയിരുന്നു. എന്നാൽ സർക്കാർ ജോലിയിൽ നിന്ന് അവധിയെടുത്ത ശേഷം  ലണ്ടനിലേക്ക് അവധി കഴിഞ്ഞ് മടങ്ങുന്നതിനിടെയാണ് ദാരുണമായ അപകടം സംഭവിച്ചത്.

വിമാനത്തിലുണ്ടായിരുന്നവരിൽ 169 ഇന്ത്യക്കാർ, 53 ബ്രിട്ടീഷ് പൗരന്മാർ, 7 പോർച്ചുഗീസ് പൗരന്മാർ, ഒരു കനേഡിയൻ എന്നിവർ ഉൾപ്പെടുന്നു. ദീർഘദൂര യാത്രയ്ക്കായി വിമാനത്തിൽ വലിയ അളവിൽ ഇന്ധനം നിറച്ചിരുന്നതായും, ഇത് അപകടത്തിന് ശേഷമുണ്ടായ തീപിടിത്തത്തിന്റെ തീവ്രത വർധിപ്പിച്ചതായും ഉദ്യോഗസ്ഥർ വ്യക്തമാക്കി. 

വിമാനം സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിന് സമീപമുള്ള മെഡിക്കൽ കോളേജ് ഹോസ്റ്റലിലേക്കാണ് ഇടിച്ചിറങ്ങിയത്, ഇവിടെയുണ്ടായിരുന്ന മെ‍ഡിക്കൽ വിദ്യാർത്ഥികളിൽ അഞ്ചേ പേർ മരിച്ചതായി റിപ്പോർട്ടുകൾ സൂചിപ്പിക്കുന്നു. ഉച്ചയ്ക്ക് 1:38ന് തീജ്വാലകളും പുകപടലവും ഉയർന്നതായി ദൃക്സാക്ഷി വീഡിയോകളിൽ വ്യക്തമാണ്. അഗ്നിശമന സേന, ആംബുലൻസ്, ദുരന്ത നിവാരണ യൂണിറ്റുകൾ എന്നിവ സ്ഥലത്തെത്തി രക്ഷാപ്രവർത്തനം ആരംഭിച്ചിരുന്നു. ഗാന്ധിനഗറിൽ നിന്നും വഡോദരയിൽ നിന്നും ആറ് എൻഡിആർഎഫ് ടീമുകൾ രക്ഷാദൗത്യത്തിനായി എത്തി.

പ്രധാനമന്ത്രി നരേന്ദ്ര മോദി ആഭ്യന്തര മന്ത്രി അമിത് ഷായുമായും സിവിൽ ഏവിയേഷൻ മന്ത്രി രാംമോഹൻ നായിഡുവുമായും സംസാരിച്ചു. രണ്ട് മന്ത്രിമാർക്കും അഹമ്മദാബാദിലേക്ക് പോയി ദുരിതബാധിതർക്ക് എല്ലാ സഹായവും ഉറപ്പാക്കാൻ അദ്ദേഹം നിർദേശിച്ചു. കേന്ദ്ര ആഭ്യന്തര മന്ത്രി അമിത് ഷാ ഗുജറാത്ത് മുഖ്യമന്ത്രി ഭൂപേന്ദ്ര പട്ടേലുമായി ചർച്ച നടത്തി, അടിയന്തര രക്ഷാപ്രവർത്തനങ്ങൾക്കും അതിജീവിച്ചവർക്ക് ചികിത്സ ഉറപ്പാക്കുന്നതിന് ഹരിത ഇടനാഴി സ്ഥാപിക്കാനും നിർദേശിച്ചു.

ഗുജറാത്ത് മുഖ്യമന്ത്രി ഭൂപേന്ദ്ര പട്ടേൽ എക്‌സിൽ പോസ്റ്റ് ചെയ്ത പ്രസ്താവനയിൽ അഗാധമായ ദുഃഖം രേഖപ്പെടുത്തി. "പരുക്കേറ്റവർക്ക്  ചികിത്സ ഉറപ്പാക്കാൻ എല്ലാ ശ്രമങ്ങളും നടക്കുന്നു," അദ്ദേഹം വ്യക്തമാക്കി. എയർ ഇന്ത്യ ചെയർമാൻ എൻ. ചന്ദ്രശേഖരൻ ദുഃഖം പ്രകടിപ്പിക്കുന്ന കുറിപ്പ് പുറത്തിറക്കി, ദുരിതബാധിത കുടുംബങ്ങൾക്ക് പൂർണ്ണ പിന്തുണ വാഗ്ദാനം ചെയ്തു.

അപകടത്തിന്റെ കാരണം വ്യക്തമല്ലെങ്കിലും, വിമാനം അസാധാരണമാം വിധം താഴ്ന്ന് പറക്കുന്നത് ദൃക്സാക്ഷികൾ പങ്കുവെച്ച ദൃശ്യങ്ങളിൽ കാണാം. തീപിടിത്തത്തിന്റെയും അപകടത്തിന്റെയും തീവ്രത കാരണം സർദാർ വല്ലഭായ് പട്ടേൽ വിമാനത്താവളം താൽക്കാലികമായി അടച്ചു. യാത്രക്കാർ വിമാനക്കമ്പനികളുമായി ബന്ധപ്പെടണമെന്നും അധികൃതർ നിർദേശിച്ചു.

ബോയിംഗ് 787 ഡ്രീംലൈനറിന്റെ ആദ്യ മാരക അപകടമാണിത്. 2011ൽ വാണിജ്യാടിസ്ഥാനത്തിൽ സർവീസ് ആരംഭിച്ച ഡ്രീംലൈനർ ഇന്ധനക്ഷമതയ്കും സാങ്കേതിക മികവിനും പേര് കേട്ടതാണ്. എന്നാൽ, ബോയിംഗിന്റെ സുരക്ഷാ ചരിത്രം, പ്രത്യേകിച്ച് 737 MAX അപകടങ്ങൾ, കമ്പനിയെ വിമർശനത്തിന് വിധേയമാക്കിയിരുന്നു. 2018ലും 2019ലും നടന്ന ലയൺ എയർ, എത്യോപ്യൻ എയർലൈൻസ് അപകടങ്ങളിൽ 346 പേർ മരിച്ചിരുന്നു.

എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (എഎഐബി)) അപകടത്തെക്കുറിച്ച് അന്വേഷണം ആരംഭിച്ചിട്ടുണ്ട്. പ്രധാനമന്ത്രി മോദിയുടെ നിർദേശപ്രകാരം, മന്ത്രിമാർ അഹമ്മദാബാബദിലേക്ക് തിരിച്ചു. ദുരന്തത്തിൽ ദുഃഖം രേഖപ്പെടുത്തി, രക്ഷാപ്രവർത്തനങ്ങൾ പുരോഗമിക്കുകയാണ്.