അഹമ്മദാബാദ്: അഹമ്മദാബാദ് വിമാനാപകടത്തിൽ ഉൾപ്പെട്ട മെഡിക്കൽ വിദ്യാർഥികൾക്ക് സഹായം ആവശ്യപ്പെട്ട്  ഇന്ത്യൻ മെഡിക്കൽ അസോസിയേഷൻ (ഐ.എം.എ). ഇക്കാര്യമുന്നയിച്ച് ഐ.എം.എ ടാറ്റാ ഗ്രൂപ്പിന് കത്തയച്ചു. വിമാനം പറന്നിറങ്ങിയ ബി.ജെ മെഡിക്കൽ കോളേജിലെ പരിക്കേറ്റവരും മരിച്ചവരുമായ മെഡിക്കൽ വിദ്യാർഥികൾക്ക് സഹായം നൽകണമെന്നാണ് ഐ.എം.എയുടെ ആവശ്യം. ഐഎംഎ ഗുജറാത്ത് സംസ്ഥാന ഘടകമാണ് ടാറ്റ ഗ്രൂപ്പിന് കത്തയച്ചത്. നേരത്തെ, അപകടത്തിൽ മരിച്ച വിമാന യാത്രക്കാർക്ക് എയർ ഇന്ത്യയുടെ ഉടമകളായ ടാറ്റ ഗ്രൂപ്പ് ഓരോ കോടി രൂപ വീതം സഹായം വാഗ്ദാനം ചെയ്തിരുന്നു. 

അതേസമയം, വിമാന ദുരന്തം അന്വേഷിക്കാൻ കേന്ദ്ര സർക്കാർ ഉന്നതതല സമിതി രൂപീകരിച്ചു. മൂന്നുമാസത്തിനുള്ളിൽ അന്വേഷണം പൂർത്തിയാക്കി സമിതി റിപ്പോർട്ട് സമർപ്പിക്കണം. വ്യോമ സുരക്ഷയെക്കുറിച്ച് ചർച്ച ചെയ്യാൻ ഇന്ന് ഉന്നതല യോഗം ചേരുന്നുണ്ട്. 

ഇതിനിടെ, കോൺഗ്രസ്‌ അധ്യക്ഷൻ മല്ലികാർജുൻ ഖർഗെ ഇന്ന് അഹമ്മദാബാദിലെ ദുരന്തഭൂമി സന്ദർശിക്കും. അപകടത്തിൽ ഇതുവരെ 270- പേരുടെ മരണമാണ് സ്ഥിരീകരിച്ചത്. മലയാളി രഞ്ജിതയുടെ സഹോദരൻ രതീഷും അമ്മാവനും അഹമ്മദാബാദിലെത്തി. ഡിഎൻഎ പരിശോധനയ്ക്കായി സാമ്പിൾ നൽകി. പരിശോധന പൂർത്തിയാക്കിയ ശേഷം മൃതദേഹം വിട്ടുനൽകും.