ലഖ്‌നോ: ഒരു വിമാനാപകടത്തിന്റെ ആഘാതമൊഴിയും മുമ്പ് ആശങ്ക ഉയര്‍ത്തി മറ്റൊരു സംഭവം കൂടി. ലാന്‍ഡിങ്ങിനിടെ വിമാനത്തിന്റെ ടയറില്‍ പുക കണ്ടതാണ് ആശങ്ക ഉയര്‍ത്തിയത്. 

ഹജ്ജ് നിര്‍വഹിച്ച ഇന്ത്യന്‍ തീര്‍ഥാടകരുമായി തിരികെ വന്ന സഊദിയ എയര്‍ലൈന്‍സ് വിമാനത്തിലാണ് പുക കണ്ടത്. ലഖ്നോ വിമാനത്താവളത്തില്‍ ഇറങ്ങുമ്പോഴായിരുന്നു സംഭവം. ഇടതു ചക്രത്തിന്റെ ഭാഗത്തു നിന്നാണ് പുകയര്‍ന്നത്. വിമാനം സുരക്ഷിതമായി ലാന്‍ഡ് ചെയ്യുകയും ഉടന്‍തന്നെ യാത്രക്കാരെ ഒഴിപ്പിക്കുകയും ചെയ്തു. 250 പേരാണ് വിമാനത്തില്‍ ഉണ്ടായിരുന്നത്.

ശനിയാഴ്ച രാവിലെ ജിദ്ദയില്‍ നിന്നുള്ള സഊദിയ എയര്‍ലൈന്‍സ് വിമാനം ലഖ്നോവിലെ ചൗധരി ചരണ്‍ സിങ് അന്താരാഷ്ട്ര വിമാനത്താവളത്തില്‍ ടഢ 312 വിമാനം ലാന്‍ഡ് ചെയ്തതിന് തൊട്ടുപിന്നാലെയാണ് പുക ഉയരുന്നത്  ശ്രദ്ധയില്‍പെട്ടത്.  ഉടന്‍ ഗ്രൗണ്ട് സ്റ്റാഫ് എയര്‍പോര്‍ട്ട് റെസ്‌ക്യൂ ആന്‍ഡ് ഫയര്‍ ഫൈറ്റിംഗ് (ARFF) ടീമിനെ അറിയിച്ചു. സഊദിയ എയര്‍ലൈന്‍സ് ടെക്‌നിക്കല്‍ ടീമിന്റെ സഹകരണത്തോടെ എമര്‍ജന്‍സി റെസ്‌പോണ്‍സ് ടീം രക്ഷാപ്രവര്‍ത്തനം നടത്തി. സ്ഥിതിഗതികള്‍ നിയന്ത്രണ വിധേയമാക്കി.

എല്ലാ യാത്രക്കാരെയും സുരക്ഷിതമായി ഇറക്കിയതായി അറിയിച്ച അധികൃതര്‍ വിമാനത്താവള പ്രവര്‍ത്തനങ്ങള്‍ക്ക് ഒരു തടസ്സവും ഉണ്ടായിട്ടില്ലെന്നും വ്യക്തമാക്കി. വിമാനത്തിന്റെ ഇടതുചക്രത്തിലെ ഹൈഡ്രോളിക് സംവിധാനത്തിലുണ്ടായ ചോര്‍ച്ചയാണ് പുക ഉയരാന്‍ ഇടയാക്കിയതെന്നാണ് പ്രാഥമിക നിഗമനം. സംഭവത്തെ കുറിച്ച് ഔദ്യോഗിക അന്വേഷണത്തിന് എയര്‍പോര്‍ട്ട് അതോറിറ്റി ഉത്തരവിട്ടിട്ടുണ്ട്.

A Saudia Airlines flight carrying 250 Hajj pilgrims from Jeddah caused alarm during landing at Lucknow Airport after smoke was seen from the left landing gear. Emergency response teams acted swiftly and safely evacuated all passengers. Preliminary reports suggest a hydraulic system leak.