മലപ്പുറം: സകൂൾ കോമ്പൗണ്ടിനുള്ളിൽ അധ്യാപികയുടെ വാഹനം തട്ടി വിദ്യാർഥിനിക്ക് പരുക്കേറ്റ സംഭവത്തിൽ പ്രതിഷേധവുമായി വിദ്യാർഥികൾ. മലപ്പുറം എം.എസ്.പി സ്‌കൂൾ വിദ്യാർഥികളാണ് സഹപാഠിയുടെ ചികിത്സാ ചെലവും പഠന ചിലവും അധ്യാപിക ഏറ്റെടുക്കണമെന്നാവശ്യപ്പെട്ട് പ്രതിഷേധ സമരം നടത്തിയത്. വിദ്യാർഥിയുടെ രക്ഷിതാവിന്റെ പരാതിയുടെ അടിസ്ഥാനത്തിൽ മലപ്പുറം പൊലിസ് കേസെടുത്ത് അന്വേഷണം ആരംഭിച്ചു.

വെള്ളിയാഴ്ചയായിരുന്നു കേസിനാസ്പദമായ സംഭവം. സ്‌കൂൾ കഴിഞ്ഞ് വീട്ടിലേക്ക് പോവാൻ ബസ് ലഭിക്കാത്തതിനാൽ താമരക്കുഴിയിലെ മാതാവിന്റെ വീട്ടിലേക്ക് പോവുന്നതിനായി സുഹൃത്തിനെ വിളിക്കാൻ തിരികെ സ്‌കൂളിലെത്തിയതായിരുന്നു പത്താം ക്ലാസ് വിദ്യാർഥിനിയായ മിർഷ ഫാത്തിമ.

സ്‌കൂളിലെ ബാസ്‌ക്കറ്റ് ബോൾ കോർട്ടിന് സമീപത്ത് വച്ച് അധ്യാപികയായ ബീഗത്തിന്റെ കാർ നിയന്ത്രണം വിട്ട് വിദ്യാർഥിനിയെ ഇടിക്കുകയും സമീപത്തെ മതിലിനടുത്തേക്ക് തെറിച്ചുവീണ വിദ്യാർഥിനിയുടെ കാലിലേക്ക് മതിലിൽ നിന്നും കല്ല് വീഴുകയുമായിരുന്നു.

പരുക്കേറ്റ വിദ്യാർഥിനിയെ ആദ്യം മലപ്പുറത്തെ സ്വകാര്യ ആശുപത്രികളിലും പിന്നീട് വിദഗ്ധ ചികിത്സക്കായി കോയമ്പത്തൂരിലെ സ്വകാര്യ ആശുപത്രിയിലേക്കും മാറ്റി. കാൽ വിരലുകൾ ചലിപ്പിക്കാനാവാത്തതിനാൽ ശനിയാഴ്ച ന്യൂറോ ശസ്ത്രക്രിയക്ക് വിധേയമാക്കി. ഇന്നലെ എല്ലിനും ഓപ്പറേഷൻ ചെയ്തു. വിദ്യാർഥിനിയുടെ ഇടത് തുടയെല്ലിനും കാൽമുട്ടിന് താഴെയും കാൽ പാദത്തിലുമായി പൊട്ടലുകളുണ്ട്.

പരുക്കേറ്റ തന്റെ മകളെ സ്വാധീനിച്ച് കാറിടിച്ചല്ല, മതിലിടിഞ്ഞാണ് പരുക്കേറ്റതെന്ന് വരുത്തിത്തീർക്കാൻ കാറോടിച്ച അധ്യാപികയുടെ സഹോദരനും മറ്റ് അധ്യാപകരുമുൾപ്പെടെ ശ്രമിച്ചിരുന്നതായി പെൺകുട്ടിയുടെ പിതാവ് മിഖ്ദാൽ അലി ആരോപിച്ചു. മകളെ ആശുപത്രിയിലെത്തിക്കുന്നതിന് പകരം കാറോടിച്ചിരുന്ന അധ്യാപികയെ സംരക്ഷിക്കാനായിരുന്നു മറ്റ് അധ്യാപകർ ശ്രമിച്ചിരുന്നതെന്നും, ആശുപത്രിയിലെത്തിയ സഹപാഠികളെ അധ്യാപകർ നിർബന്ധിച്ച് വീട്ടിലേക്കയക്കുകയായിരുന്നുവെന്നും അദ്ദേഹം പറഞ്ഞു.

മകളുടെ ചികിത്സക്കായി അഞ്ച് ലക്ഷത്തോളം രൂപ ഇതുവരെ ചിലവായെന്നും വാടക വീട്ടിൽ സാമ്പത്തിക ബുദ്ധിമുട്ടുകൾ അനുഭവിച്ച് കഴിയുന്ന തനിക്കും കുടുംബത്തിനും ഇത് താങ്ങാനാവുന്നില്ലെന്നും, ചികിത്സാ ചിലവുകൾ അധ്യാപിക ഏറ്റെടുക്കണമെന്നും അദ്ദേഹം ആവശ്യപ്പെട്ടു. നീതിക്കായി മനുഷ്യാവകാശ കമ്മിഷൻ ഉൾപ്പെടെ സാധ്യമായ വഴികളെല്ലാം തേടുമെന്നും അദ്ദേഹം പറഞ്ഞു. 

വിദ്യാർഥിനിയുടെ ചികിത്സാ ചിലവും പഠന ചിലവും പൂർണമായും അധ്യാപിക ഏറ്റെടുക്കണമെന്നാവശ്യപ്പെട്ട് ഇന്നലെ സഹപാഠികൾ സ്‌കൂളിന് മുൻപിൽ പ്രതിഷേധിച്ചു. അധ്യാപകരുടെ വാഹനം പാർക്ക് ചെയ്യാനെന്ന പേരിൽ ഗ്രൗണ്ടിൽ വിദ്യാർഥികളെ കളിക്കാൻ അനുവദിക്കാത്ത സ്ഥിതിയുണ്ടെന്നും അവർ ആരോപിച്ചു.
 വിദ്യാർഥികളുടെ ജീവനു ഭീഷണിയാവുന്ന തരത്തിൽ അധ്യാപകരുടെ വാഹനങ്ങൾ സ്‌കൂൾ കോമ്പൗണ്ടിൽ പ്രവേശിക്കുന്നത് തടയണമെന്നും അവർ ആവശ്യപ്പെട്ടു. പൊലിസ് എത്തി അനുനയിപ്പിക്കാൻ ശ്രമിച്ചെങ്കിലും ഉച്ചക്ക് 12ഓടെയാണ് വിദ്യാർഥികൾ സമരം അവസാനിപ്പിച്ചത്.

വിദ്യാർഥിനിയുടെ ബന്ധുക്കളുമായി അധ്യാപകരും സ്‌കൂൾ അധികൃതരും ചർച്ചകൾ നടത്തിയെങ്കിലും ഫലമുണ്ടായില്ല. നഷ്ടപരിഹാരം നൽകാനാവില്ലെന്നാണ് അധ്യാപികയുടെ ഭാഷ്യം.