ഗസ്സ: ഗസ്സയില്‍ ഭക്ഷണം വാങ്ങാന്‍ സഹായ കേന്ദ്രത്തിലെത്തുന്നവരെ വെടിവച്ചു കൊല്ലുന്ന ഇസ്റാഈല്‍ ക്രൂരത തുടരുന്നു. വ്യാഴാഴ്ച നടത്തിയ വെടിവെപ്പില്‍ 18 പേരെങ്കിലും കൊല്ലപ്പെട്ടതായി മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇതില്‍ 15 പേര്‍ സഹായ കേന്ദ്രത്തില്‍ വെച്ചാണ് കൊല്ലപ്പെട്ടത്. 

പുലര്‍ച്ചെ ആരംഭിച്ച ഇസ്‌റാഈലി ഷെല്ലാക്രമണത്തിലാണ് മരണങ്ങള്‍ സംഭവിച്ചതെന്ന് മുതിര്‍ന്ന സിവില്‍ ഡിഫന്‍സ് ഉദ്യോഗസ്ഥനായ മുഹമ്മദ് അല്‍-മുഗ്ഗയ്യിര്‍ എ.എഫ്.പിയോട് പറഞ്ഞു. സഹായത്തിനായി കാത്തിരിക്കുന്നതിനിടെ കുറഞ്ഞത് 15 പേരെങ്കിലും കൊല്ലപ്പെട്ടുവെന്നും ഗസ്സ നഗരത്തിന് സമീപം നടന്ന വ്യത്യസ്ത ഷെല്ലാക്രമണങ്ങളില്‍ മൂന്ന് പേര്‍ മരിച്ചതായും അദ്ദേഹം പറഞ്ഞു.

ALSO READ: ഇസ്‌റാഈലിന്റെ പ്രതിരോധ സംവിധാനം ഉപയോഗശൂന്യം, തങ്ങളുടെ കൃത്യത ലോകത്തിന് ബോധ്യപ്പെട്ടുവെന്നും ഇറാന്‍ 

ബുധനാഴ്ച ഗസ്സയിലൂടനീളം നടത്തിയ ആക്രമണങ്ങളില്‍ 30 പേരെയാണ് ഇസ്റാഈല്‍ കൊലപ്പെടുത്തിയത്. ഇസ്റാഈല്‍- ഇറാന്‍ യുദ്ധത്തിന്റെ പശ്ചാത്തലത്തില്‍ ഗസ്സയില്‍ വംശഹത്യ വ്യാപിപ്പിച്ചിരിക്കുകയാണ് ഇസ്റാഈല്‍. മാധ്യമങ്ങളുടെ ശ്രദ്ധ ഇറാന്‍ യുദ്ധത്തിലേക്ക് മാറിയതോടെയാണിത്. ചൊവ്വാഴ്ചയും 70 പേരെ ഇസ്റാഈല്‍ ഗസ്സയില്‍ വെടിവച്ചു കൊന്നിരുന്നു. 

മധ്യ, വടക്കന്‍ ഗസ്സയിലെ സെയ്ത്തൂനിനടുത്തുള്ള മഗാസി അഭയാര്‍ഥി ക്യാംപില്‍ ഇസ്റാഈല്‍ നടത്തിയ വ്യോമാക്രമണത്തില്‍ 14 പേര്‍ കൊല്ലപ്പെട്ടു. തെക്കന്‍ ഗസ്സയിലെ ഖാന്‍ യൂനിസില്‍ ടെന്റിനു നേരെ നടത്തിയ വ്യോമാക്രമണത്തില്‍ അഞ്ചു പേരും കൊല്ലപ്പെട്ടു. മധ്യ ഗസ്സയില്‍ യു.എന്‍ സഹായം പ്രതീക്ഷിച്ച് സലാഹുദ്ദീന്‍ റോഡില്‍ കാത്തിരുന്ന ജനക്കൂട്ടത്തിനു നേരെ ഇസ്റാഈല്‍ സേന വെടിവച്ചു. ഇതില്‍ 11 പേര്‍ കൊല്ലപ്പെട്ടു. ഭക്ഷണത്തിന് കാത്തു നിന്നവരാണ് കൊല്ലപ്പെട്ടത്. 

ഇതുവരെ ഗസ്സയില്‍ ഭക്ഷണത്തിന് കാത്തു നിന്ന് 397 പേരെ ഇസ്റാഈല്‍ വെടിവച്ചു കൊന്നിട്ടുണ്ട്. 3000 പേര്‍ക്ക് ആക്രമണത്തില്‍ പരുക്കേറ്റു.