നിലമ്പൂർ ഉപതെരഞ്ഞെടുപ്പ് വോട്ടെണ്ണൽ തുടങ്ങി. 356 വോട്ടിന് യുഡിഎഫിന്റെ ആര്യാടൻ ഷൗക്കത്ത് ലീഡ് ചെയ്യുന്നു. രാവിലെ എട്ടു മണിയോടെ തന്നെ വോട്ടെണ്ണൽ ആരംഭിച്ചു. ചുങ്കത്തറ മാർത്തോമാ ഹയർ സെക്കണ്ടറി സ്‌കൂളിലാണ് വോട്ടെണ്ണൽ. ആദ്യം പോസ്റ്റൽ സർവീസ് വോട്ടുകളാണ് എണ്ണുന്നത്. പിന്നീട് 14 ടേബിളുകളിൽ ആയി ഇ.വി.എം വോട്ടുകളും എണ്ണും. 

results.eci.gov.in എന്ന വെബ്‌സൈറ്റ് വഴി ഫലസൂചകൾ അറിയാം. 

നിർണായക പഞ്ചായത്തുകൾ

നിലമ്പൂർ ഉപതിരഞ്ഞെടുപ്പിൽ അമരമ്പലം, കരുളായി, മൂത്തേടം തുടങ്ങിയ പഞ്ചായത്തുകൾ ഫലത്തിൽ നിർണായക പങ്കുവഹിക്കും. 2021ൽ എൽഡിഎഫ് സ്ഥാനാർഥി പി.വി. അൻവർ 1492 വോട്ടിന്റെ ഭൂരിപക്ഷം നേടിയ അമരമ്പലം പഞ്ചായത്തിൽ ഇത്തവണ ഇതിലും വലിയ ലീഡ് എൽഡിഎഫ് പ്രതീക്ഷിക്കുന്നു. കരുളായി പഞ്ചായത്തിൽ 2021ൽ 1446 വോട്ടിന്റെ ലീഡ് ലഭിച്ചിരുന്നു. സ്വരാജിന്റെ സ്ഥാനാർഥിത്വം ഇവിടെ 100 വോട്ടിന്റെ അധിക ലീഡ് നേടുമെന്നാണ് ഇടതുമുന്നണിയുടെ കണക്കുകൂട്ടൽ. പോത്തുകല്ല്, നിലമ്പൂർ നഗരസഭ എന്നിവിടങ്ങളിലും എൽഡിഎഫിന് ലീഡ് ലഭിക്കുമെന്നാണ് വിലയിരുത്തൽ.