ഇടുക്കി: ചെല്ലാർകോവിലിൽ വാഹനാപകടത്തിൽ മരിച്ച അണക്കര സ്വദേശി ഷാനറ്റിന്റെ സംസ്കാരം നടത്തി. കുവൈത്തിൽ  തടങ്കലിൽ കഴിഞ്ഞിരുന്ന ഷാനറ്റിന്റെ അമ്മ ജിനു തിങ്കളാഴ്ച നാട്ടിലെത്തിയതിന് പിന്നാലെയാണ് സംസ്കാരം നടന്നത്. കഴിഞ്ഞ ചൊവ്വാഴ്ച ഉണ്ടായ അപകടത്തിൽ ഷാനറ്റിനൊപ്പം സുഹൃത്ത് അലനും മരിച്ചിരുന്നു.

മലയാളി ഏജന്റുമാരുടെ വഞ്ചനയിൽ കുവൈത്തിൽ തടങ്കലിൽപ്പെട്ട ജിനു, രണ്ടര മാസം മുമ്പ് ഒരു വീട്ടിൽ കുട്ടിയെ നോക്കാനുള്ള ജോലിക്കായി പോയതാണ്. ജോലിഭാരവും ആരോഗ്യപ്രശ്നങ്ങളും മൂലം തുടരാൻ കഴിയാതെ വന്നു. വാഗ്ദാനം ചെയ്ത ശമ്പളവും ലഭിച്ചില്ല. ഏജന്റിനെ അറിയിച്ചപ്പോൾ, ജീവനക്കാർ അവരെ മറ്റൊരു സ്ഥലത്തേക്ക് മാറ്റി തടവിലാക്കി. കുവൈത്ത് മലയാളി അസോസിയേഷന്റെയും ഇന്ത്യൻ എംബസിയുടെയും ഇടപെടലോടെ ജിനു രക്ഷപ്പെട്ടു. എന്നാൽ, കോടതി നടപടികളും യുദ്ധം, കോവിഡ് പ്രതിസന്ധികളും മൂലം താൽക്കാലിക പാസ്‌പോർട്ട് ലഭിക്കുന്നതിന് കാലതാമസം നേരിട്ടു. കേരളത്തിൽ നിന്നുള്ള എംപിമാരുടെ ഇടപെടലിനെ തുടർന്ന് തിങ്കളാഴ്ച ജിനു നാട്ടിലെത്തി.

ഷാനറ്റിന്റെ മൃതദേഹം രാവിലെ 10 മണിയോടെ അണക്കരയിലെ വീട്ടിലെത്തിച്ചു. പൊതുദർശനത്തിന് ശേഷം വൈകിട്ട് 4 മണിക്ക് അണക്കര ഏഴാംമൈൽ ഒലിവുമല യാക്കോബായ പള്ളിയിൽ സംസ്കാരം നടത്തി. അലന്റെ സംസ്കാരം നേരത്തെ നടന്നെങ്കിലും, കുടുംബത്തിന്റെ ആഗ്രഹപ്രകാരംഅമ്മയെ കാത്ത് ഷാനറ്റിന്റെ സംസ്കാരം വൈകുകയായിരുന്നു.

Shannet, killed in a car accident in Idukki’s Chellarkovil, was laid to rest after his mother Jinu returned from detention in Kuwait. Trapped by deceitful Malayali agents, Jinu arrived home Monday, enabling the funeral at Annakara’s Olivumala Jacobite Church. Shannet and friend Alan died last Tuesday.