ടെഹ്‌റാന്‍: വെടിനിര്‍ത്തല്‍ കരാറിന് തൊട്ടുമുന്‍പായി ഇസ്രാഈല്‍ നടത്തിയ ആക്രമണത്തില്‍ ഇറാനിലെ മുതിര്‍ന്ന ആണവ ശാസ്ത്രജ്ഞന്‍ കൊല്ലപ്പെട്ടതായി റിപ്പോര്‍ട്ട്. മുഹമ്മദ് റെസ സിദ്ധീഖി സാബെര്‍ എന്ന ആണവ ശാസ്ത്രജ്ഞനാണ് വടക്കന്‍ ടെഹ്‌റാനിലുണ്ടായ ആക്രമണത്തില്‍ കൊല്ലപ്പെട്ടതെന്ന് ഇറാന്‍ മാധ്യമങ്ങള്‍ അറിയിച്ചു. 

ആണവ പദ്ധതികള്‍ക്ക് പുറമെ ഇസ്‌ലാമിക് റെവല്യൂഷനറി ഗാര്‍ഡ് (IRGC) ലെ സീനിയര്‍ റാങ്കില്‍ ഓഫീസറാണ് സാബെറെന്നും ബിബിസി റിപ്പോര്‍ട്ട് ചെയ്തു. ആക്രമണത്തില്‍ സാബെര്‍ ഉള്‍പ്പെടെ ഒന്‍പത് പേര്‍ കൊല്ലപ്പെട്ടതായാണ് വിവരം. നാലോളം അപ്പാര്‍ട്ട്‌മെന്റുകള്‍ നശിച്ചതായും റിപ്പോര്‍ട്ടുണ്ട്.

 നിലവില്‍ ഇരുരാജ്യങ്ങളും വെടിനിര്‍ത്തലിന് സമ്മതിച്ചതായാണ് റിപ്പോര്‍ട്ട്. അമേരിക്കയുടെ ഇടപെടലില്‍ ഇസ്രാഈലും, ഇറാനും വെടിനിര്‍ത്തല്‍ കരാര്‍ അംഗീകരിച്ചതായി ഡൊണാള്‍ഡ് ട്രംപ് നേരത്തെ പറഞ്ഞിരുന്നു. എന്നാല്‍ കരാര്‍ ലംഘിച്ച് ഇസ്രാഈല്‍ വീണ്ടും ആക്രമണം നടത്തുകയും പ്രദേശത്ത് വീണ്ടും സംഘര്‍ഷാവസ്ഥ നിലനില്‍ക്കുകയും ചെയ്യുന്നുണ്ട്. 

ALSO READ: അഹമ്മദാബാദ് വിമാന ദുരന്തം; ആകെ മരണം 275; ഔദ്യോഗിക കണക്ക് പുറത്തുവിട്ട് കേന്ദ്ര സര്‍ക്കാര്‍ 

അതേസമയം വെടിനിര്‍ത്തല്‍ കരാര്‍ പ്രാബല്യത്തില്‍ വന്നതിനു ശേഷവും ആക്രമണം തുടര്‍ന്ന ഇസ്റാഈലിനെ രൂക്ഷമായി വിമര്‍ശിച്ച് അമേരിക്കന്‍ പ്രസിഡന്റ് ഡോണാള്‍ഡ് ട്രംപ്. ഇരു രാജ്യങ്ങളുടെയും നടപടികളില്‍ കടുത്ത അതൃപ്തി പ്രകടിപ്പിച്ച ട്രംപ്, വെടിനിര്‍ത്തല്‍ കരാറിന്റെ ലംഘനം മേഖലയിലെ സമാധാന ശ്രമങ്ങള്‍ക്ക് തിരിച്ചടിയാണെന്ന് വ്യക്തമാക്കി.

ഇറാനും ഇസ്റാഈലും തമ്മിലുള്ള 12 ദിവസത്തെ സംഘര്‍ഷത്തിനു ശേഷം കരാര്‍ നിലവില്‍ വന്നെങ്കിലും ഇസ്റാഈല്‍ നടത്തിയ പുതിയ ആക്രമണങ്ങള്‍ സംഘര്‍ഷം വീണ്ടും വര്‍ധിപ്പിച്ചിരുന്നു. ട്രംപിന്റെ മധ്യസ്ഥതയില്‍ രൂപപ്പെടുത്തിയ വെടിനിര്‍ത്തല്‍, മേഖലയില്‍ സ്ഥിരത കൈവരിക്കാന്‍ ലക്ഷ്യമിട്ടിരുന്നു. എന്നാല്‍, ഇസ്റാഈലിന്റെ തുടര്‍ച്ചയായ ആക്രമണങ്ങള്‍ ഈ ശ്രമങ്ങളെ തകര്‍ത്തതായി ട്രംപ് ആരോപിച്ചു. ഇസ്റാഈലിന്റെ ആക്രമണങ്ങളില്‍ താന്‍ സന്തുഷ്ടനല്ലെന്നും ട്രംപ് കൂട്ടിച്ചേര്‍ത്തു.

Just ahead of a ceasefire agreement, a senior Iranian nuclear scientist was reportedly killed in an Israeli attack, according to Iranian media.