തിരുവനന്തപുരം: പ്ലസ് ടു പരീക്ഷയിൽ ചില വിദ്യാർത്ഥികളുടെ സർട്ടിഫിക്കറ്റുകളിൽ കണ്ടെത്തിയ പിഴവ് തിരുത്തി, ഉടൻ പുതുതായി ശരിയായ സർട്ടിഫിക്കറ്റുകൾ വിതരണം ചെയ്യാൻ വിദ്യാഭ്യാസ മന്ത്രി വി. ശിവൻകുട്ടി നിർദ്ദേശം നൽകി. ഇതിനൊപ്പം സംഭവത്തിൽ വിശദമായ അന്വേഷണം നടത്താനും നിർദേശം നൽകിയിട്ടുണ്ട്.

പൊതു വിദ്യാഭ്യാസ വകുപ്പ് മന്ത്രിയുടെ അധ്യക്ഷതയിൽ ചേർന്ന യോഗത്തിലാണ് നിർണായക തീരുമാനം ഉണ്ടായത്. ഹയർസെക്കൻഡറി അക്കാദമിക് വിഭാഗം ജോയിന്റ് ഡയറക്ടർ, സംസ്ഥാന ഐടി സെൽ പ്രതിനിധി, സർക്കാർ പ്രസ് പ്രതിനിധി എന്നിവരടങ്ങിയ പ്രത്യേക സമിതിയാണ് പിശക് സംഭവിച്ചത് സംബന്ധിച്ച് അന്വേഷണം നടത്തുക.

ഏകദേശം 30,000 സർട്ടിഫിക്കറ്റുകളിലാണ് പിശക്

സർട്ടിഫിക്കറ്റിൽ നാലാമത്തെ വിഷയമായി സൂചിപ്പിച്ച വിഷയത്തിൽ ഒന്നാം വർഷത്തിലും രണ്ടാം വർഷത്തിലും വിദ്യാർത്ഥികൾ നേടിയ മാർക്കുകൾ തമ്മിൽ ഗണ്യമായ വ്യത്യാസം ഉണ്ടായിരുന്നുവെന്നാണ് റിപ്പോർട്ട്. ഈ പിശക് മുപ്പതിനായിരത്തോളം വിദ്യാർത്ഥികളുടെ സർട്ടിഫിക്കറ്റുകളിൽ ഉൾപ്പെട്ടിട്ടുണ്ട്. സർട്ടിഫിക്കറ്റുകൾ പ്രിന്റ് ചെയ്യുന്നതിനായി 4.5 ലക്ഷം വിദ്യാർത്ഥികളുടെ ഡാറ്റാ സർക്കാർ പ്രസിലേക്ക് കൈമാറിയിരുന്നു.

പഴയ സർട്ടിഫിക്കറ്റ് തിരികെ വാങ്ങി പുതിയത് നൽകും

പിശക് സംഭവിച്ച സർട്ടിഫിക്കറ്റുകൾ ഇതിനോടകം വിതരണം ചെയ്‌തിട്ടുണ്ടെങ്കിൽ, അവ വിദ്യാർത്ഥികളിൽ നിന്ന് തിരികെ വാങ്ങണമെന്ന് സ്കൂളുകൾക്ക് നിര്‍ദേശം നല്‍കിയിട്ടുണ്ട്. പിശക് തിരുത്തിയ പുതിയ സർട്ടിഫിക്കറ്റുകൾ സ്കൂളിൽ ലഭിച്ച ശേഷം മാത്രമേ വിതരണം ചെയ്യാവൂ എന്നും നിര്‍ദേശം വ്യക്തമാക്കുന്നു.

ഇതുവരെ സർട്ടിഫിക്കറ്റ് വിതരണം പൂർത്തിയാക്കിയിട്ടില്ലാത്ത സ്കൂളുകളുടെ പ്രിൻസിപ്പൽമാർ, നൽകുന്ന സർട്ടിഫിക്കറ്റുകളിൽ പിശക് ഇല്ലെന്ന് ഉറപ്പു വരുത്തിയ ശേഷമേ വിതരണം തുടരാവൂ. പിശക് സംഭവിച്ച സർട്ടിഫിക്കറ്റുകൾ തിരികെ ശേഖരിച്ചു സ്കൂളുകളിൽ സൂക്ഷിക്കണമെന്നും നിർദേശം നല്‍കിയിട്ടുണ്ട്.

യോഗത്തിൽ പൊതുവിദ്യാഭ്യാസ വകുപ്പ് സെക്രട്ടറി കെ. വാസുകി, ഹയർസെക്കണ്ടറി അക്കാദമിക് ജോയിന്റ് ഡയറക്ടർ ഡോ. എസ്. ഷാജിത, പരീക്ഷാ വിഭാഗം ജോയിന്റ് ഡയറക്ടർ ഡോ. കെ. മാണിക്യരാജ് എന്നിവരും പങ്കെടുത്തു.

Education Minister V. Sivankutty has directed officials to correct errors found in Plus Two certificates and issue revised versions. The error affected around 30,000 students whose subject marks differed between the first and second years. Certificates already distributed will be recalled. A committee has been appointed to investigate the incident, including representatives from the Higher Secondary Directorate, State IT Cell, and Government Press.