കൊച്ചി: മുനമ്പം ജുഡിഷ്യൽ കമ്മിഷൻ നിയമനം റദ്ദാക്കിയ ഹൈക്കോടതി സിംഗിൾ ബെഞ്ച് ഉത്തരവിനെതിരെ സർക്കാർ നൽകിയ അപ്പീൽ ഹരജിയിൽ വിധി പറയുന്നത് ഹൈക്കോടതി മാറ്റിവച്ചു. കേരള വഖ്ഫ് സംരക്ഷണ വേദി ഉൾപ്പെടെയുള്ള കക്ഷികൾക്ക് ഹരജി നൽകാൻ അവകാശമില്ലെന്ന സർക്കാർ വാദത്തെ അടിസ്ഥാനമാക്കിയാണ് വിധി പുറപ്പെടുവിക്കുക.

2024 നവംബർ 27ലെ സർക്കാർ വിജ്ഞാപനം സിംഗിൾ ബെഞ്ച് റദ്ദാക്കിയിരുന്നു. എന്നാൽ, ഡിവിഷൻ ബെഞ്ച് ഈ ഉത്തരവ് സ്റ്റേ ചെയ്ത്, സർക്കാർ അനുമതിയില്ലാതെ മറ്റ് നടപടികൾ സ്വീകരിക്കരുതെന്ന് നിർദേശിച്ചുകൊണ്ട് കമ്മിഷന് പ്രവർത്തനം തുടരാനും റിപ്പോർട്ട് സമർപ്പിക്കാനും അനുമതി നൽകി. മുനമ്പം ഭൂമി വഖ്ഫ് ആണോ എന്നല്ല, വസ്തുതാന്വേഷണം നടത്താനാണ് റിട്ട. ഹൈക്കോടതി ജഡ്ജി ജസ്റ്റിസ് സി.എൻ. രാമചന്ദ്രനെ പൊതുതാൽപര്യത്തിന്റെ അടിസ്ഥാനത്തിൽ കമ്മിഷനായി നിയമിച്ചതെന്ന് സർക്കാർ വാദിച്ചു.

ഹരജിക്കാർ വഖ്ഫ് ഭൂമിയുമായോ കേസുമായോ ബന്ധപ്പെട്ട കക്ഷികളോ ആനുകൂല്യത്തിന് അർഹരോ അല്ലെന്നും സർക്കാർ ചൂണ്ടിക്കാട്ടി. ഈ വാദം തള്ളിയാൽ അപ്പീൽ ഹരജിയിൽ വിശദമായ വാദം തുടരും. അല്ലെങ്കിൽ, സിംഗിൾ ബെഞ്ച് ഉത്തരവ് റദ്ദാക്കി അപ്പീൽ ഹരജി തീർപ്പാക്കും.

The Kerala High Court has postponed its verdict on the state government's appeal against the single bench order quashing the Munambam Judicial Commission’s appointment. The commission, led by retired Justice C.N. Ramachandran, was formed to probe the Munambam land issue. The court will rule on whether petitioners, including the Kerala Waqf Protection Forum, have the locus standi to challenge the commission’s formation.