പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയിൽ നിന്നും ലഭിച്ച ഒരു നിർണായകമായ ഉപദേശത്തെക്കുറിച്ച് തുറന്നു പറഞ്ഞിരിക്കുകയാണ് റയൽ മാഡ്രിഡിന്റെ ബ്രസീലിയൻ സൂപ്പർതാരം വിനീഷ്യസ് ജൂനിയർ. കളിക്കളത്തിൽ വളരെ എളുപ്പത്തിൽ എങ്ങനെ ഗോളുകൾ നേടാൻ സാധിക്കുമെന്നതിനെക്കുറിച്ചാണ് റൊണാൾഡോ  പറഞ്ഞതെന്നാണ് ബ്രസീലിയൻ താരം വെളിപ്പെടുത്തിയത്. 

"റൊണാൾഡോ എനിക്ക് നൽകിയ ഉപദേശം ഞാൻ എപ്പോഴും ഓർക്കുന്നുണ്ട്. ഗോളുകൾ നേടുന്നത് വളരെ എളുപ്പമാണെന്ന് അദ്ദേഹം എപ്പോഴും എന്നോട് പറയുമായിരുന്നു. എന്നാൽ ഞാൻ അത് ഒരിക്കലും വിശ്വസിച്ചിരുന്നില്ല. പിന്നീടാണ് ഞാൻ ഇതിനെക്കുറിച്ച് ചിന്തിച്ചത്. ഇത് മത്സരത്തിൽ എനിക്ക് കൂടുതൽ ആശ്വാസം നൽകി. ഫുട്ബോളിൽ അദ്ദേഹം നേടിയ എല്ലാ അനുഭവ സമ്പത്തും എന്നെ നന്നായി സ്വാധീനിച്ചു. കളിക്കളത്തിൽ ഗോൾകീപ്പറെ നേരിടുന്ന കാര്യം ഏറ്റവും എളുപ്പമുള്ള നിമിഷം ആണെന്നാണ് റൊണാൾഡോ എന്നോട് പറഞ്ഞത്. ഇതാണ് എന്റെ ഫിനിഷിംഗ് എളുപ്പമാക്കിയത്" വിനീഷ്യസ് ജൂനിയർ ഡാസന് നൽകിയ അഭിമുഖത്തിൽ പറഞ്ഞു.

2018ൽ ബ്രസീലിയൻ ക്ലബ്ബ് ഫ്ലെമെങ്കോയിൽ നിന്നാണ് വിനീഷ്യസ് ജൂനിയർ റയൽ മാഡ്രിഡിന്റെ തട്ടകത്തിൽ എത്തുന്നത്. റയലിൽ മികച്ച പ്രകടനങ്ങൾ നടത്തി വിനീഷ്യസ് ജൂനിയർ ലോകത്തിലെ ഏറ്റവും മികച്ച താരമായി സ്വയം അടയാളപ്പെടുത്തുകയായിരുന്നു. ഇതിനോടകം തന്നെ റയൽ മാഡ്രിഡിന് വേണ്ടി 320 മത്സരങ്ങളിൽ നിന്നും 106 ഗോളുകളും 86 അസിസ്റ്റുകളും ആണ് വിനേഷ്യസ് ജൂനിയർ സ്വന്തമാക്കിയിട്ടുള്ളത്.

നിലവിലെ ഫിഫ ബെസ്റ്റ് മെൻസ് പ്ലെയർ അവാർഡ് ജേതാവും വിനീഷ്യസ് ജൂനിയർ ആണ്. 2024 സീസണിൽ റയൽ മാഡ്രിഡിന് വേണ്ടി നടത്തിയ തകർപ്പൻ പ്രകടനങ്ങളാണ് വിനീഷ്യസിനെ ഈ അവാർഡിന് അർഹനാക്കിയത്. സ്പാനിഷ് വമ്പന്മാർ ആ സീസണിൽ നേടിയ മൂന്ന് കിരീടങ്ങളിലും നിർണായകമായ പങ്കു വഹിച്ച താരമാണ് വിനീഷ്യസ് ജൂനിയർ. യുവേഫ ചാമ്പ്യൻസ് ലീഗ്, ലാ ലീഗ, സൂപ്പർകോപ്പാ ഡി എസ്പാന എന്നീ കിരീടങ്ങളാണ് റയൽ മാഡ്രിഡ് സാന്റിയാഗോ ബെർണാബുവിന്റെ മണ്ണിലെത്തിച്ചത്. 

Real Madrids Brazilian superstar Vinicius Junior has opened up about a crucial piece of advice he received from Portuguese legend Cristiano Ronaldo