മനാമ: അമേരിക്കയുമായി സമാധാനപരമായ ആണവോര്‍ജ്ജ മേഖലയിലെ സഹകരണ കരാറില്‍ ബഹ്‌റൈന്‍ ഒപ്പുവച്ചു. യുഎസ് പ്രസിഡന്റ് ഡൊണാള്‍ഡ് ട്രംപും ബഹ്‌റൈന്‍ കിരീടാവകാശിയും പ്രധാനമന്ത്രിയുമായ സല്‍മാന്‍ ബിന്‍ ഹമദ് അല്‍ ഖലീഫ വൈറ്റ് ഹൗസില്‍ കൂടിക്കാഴ്ച നടത്തുന്നതിനോടനുബന്ധിച്ചായിരുന്നു ഒപ്പുവയ്ക്കല്‍. യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോയും ബഹ്‌റൈന്‍ പ്രതിനിധി ഡോ. അബ്ദുല്ലത്തീഫ് ബിന്‍ റാഷിദ് അല്‍ സയാനിയുമാണ് ഒപ്പുവെച്ചത്. ഇതൊരു സുപ്രധാന കരാറാണെന്ന് മാര്‍ക്കോ റൂബിയോയും പറഞ്ഞു.

ആഴത്തിലുള്ള സിവില്‍ ആണവ സഹകരണത്തിലേക്കുള്ള ആദ്യപടിയായി കരാര്‍ വര്‍ത്തിക്കുന്നു. ആയുധവല്‍ക്കരണത്തിനോ അവരുടെ അയല്‍രാജ്യങ്ങളുടെ സുരക്ഷയ്ക്ക് ഭീഷണിയാകുന്നതിനോ വ്യക്തമായി സജ്ജമല്ലാത്ത ആണവ പദ്ധതി പിന്തുടരാന്‍ ആഗ്രഹിക്കുന്ന ഭൂമിയിലെ ഏത് രാജ്യവുമായും പങ്കാളികളാകാന്‍ അമേരിക്ക തയ്യാറാണെന്നതിന്റെ ഒരു ഉദാഹരണമാണിതെന്നും അദ്ദേഹം പറഞ്ഞു. എന്നാല്‍ ആണവായുധങ്ങള്‍ വികസിപ്പിക്കുന്നുവെന്ന് ഇസ്രായേലും വാഷിംഗ്ടണും ആരോപിക്കുന്ന ഇറാന്റെ പേര് റൂബിയോ പരാമര്‍ശിച്ചില്ല.

ട്രംപുമായുള്ള കൂടിക്കാഴ്ചയില്‍ ബഹ്‌റൈന്‍ കിരീടാവകാശി അമേരിക്കയില്‍ 17 ബില്യണ്‍ ഡോളറിലധികം നിക്ഷേപിക്കാനുള്ള പദ്ധതികള്‍ പ്രഖ്യാപിച്ചു.

അമേരിക്കയിലേക്ക് വരുന്ന 17 ബില്യണ്‍ ഡോളറിന്റെ കരാറുകള്‍ പ്രഖ്യാപിക്കുന്നതില്‍ ഞങ്ങള്‍ക്ക് അതിയായ സന്തോഷമുണ്ടെന്ന് കിരീടാവകാശി സല്‍മാന്‍ ബിന്‍ ഹമദ് അല്‍ ഖലീഫ പറഞ്ഞു. 2023ല്‍ ഇരുരാജ്യങ്ങളും തമ്മില്‍ ഒപ്പുവെച്ച സമഗ്ര സുരക്ഷാ സംയോജന, സമൃദ്ധി കരാറിനെ (സിഎസ്.ഐ.പി.എ) അടിസ്ഥാനമാക്കിയാണ് ഈ കരാര്‍ രൂപപ്പെടുത്തിയത്. രാജാവ് ഹമദ് ബിന്‍ ഈസ ആല്‍ ഖലീഫയുടെയും കിരീടാവകാശിയും പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ ഖലീഫയുടെയും നേതൃത്വത്തിലുള്ള സര്‍ക്കാറിന്റെ നിര്‍ദേശങ്ങള്‍ ഈ കരാര്‍ പ്രതിഫലിപ്പിക്കുന്നതായും അദ്ദേഹം പറഞ്ഞു. തുടര്‍ന്ന് അദ്ദേഹം വൈറ്റ് ഹൗസില്‍ മാധ്യമപ്രവര്‍ത്തകരുമായും സംസാരിച്ചു.

ആണവായുധങ്ങള്‍ നിര്‍മിക്കാതെ, മറ്റ് പ്രയോജനകരമായ കാര്യങ്ങള്‍ക്കായി ആണവോര്‍ജം ഉപയോഗിക്കുക എന്നതാണ് കരാറിന്റെ കാതല്‍. വൈദ്യുതി ഉല്‍പാദനം, ആരോഗ്യമേഖല, കൃഷി, ജല മാനേജ്‌മെന്റ്, പരിസ്ഥിതി സംരക്ഷണം എന്നിവയിലെല്ലാം ഇത് സാധ്യമാകും.

ALSO READ: 'ഇന്ത്യയിലെ ക്രിസ്ത്യന്‍ വിരുദ്ധ ആക്രമണങ്ങളില്‍ വത്തിക്കാന്‍ ഇടപെടണം'; വത്തിക്കാന്‍ പ്രതിനിധിക്ക് സഭാ നേതാക്കളുടെ നിവേദനം

The US and Bahrain on Wednesday signed a cooperation agreement in the field of peaceful nuclear energy shortly before a meeting in the White House between US President Donald Trump and Prince Salman bin Hamad Al Khalifa, the Bahraini Crown Prince and Prime Minister.