ലണ്ടൻ: ഇംഗ്ലണ്ട് വനിതകൾക്കെതിരേയുള്ള ഇന്ത്യൻ വനിതകളുടെ രണ്ടാം ഏകദിനം ഇന്ന്. ആദ്യ മത്സരത്തിൽ നാലു വിക്കറ്റിന് ഇംഗ്ലണ്ടിനെ തകർത്ത ഇന്ത്യ ഇന്ന് ജയിക്കുകയാണെങ്കിൽ പരമ്പര നേടാൻ കഴിയും. ഇംഗ്ലണ്ടിനെതിരേയുള്ള ടി20 പരമ്പര സ്വന്തമാക്കിയ ആത്മവിശ്വാസത്തിലായിരുന്നു ഇന്ത്യ ആദ്യ ഏകദിനത്തിൽ കളത്തിലിറങ്ങിയത്. 

ആദ്യ മത്സരത്തിൽ ബാറ്റർമാർ പരാജയമായപ്പോൾ ദീപ്തി ശർമയായിരുന്നു ഇന്ത്യയെ വിജയത്തിലെത്തിച്ചത്. 64 പന്തിൽ ഒരു സിക്‌സറും മൂന്ന് ഫോറും ഉൾപ്പെടെ 62 റൺസ് നേടിയ ദീപ്തി ശർമ ഔട്ടാകാതെ നിന്നു. ബൗളിങ്ങിൽ പക്ഷെ ദീപ്തിക്ക് വിക്കറ്റൊന്നും നേടാൻ കഴിഞ്ഞില്ല. ഇന്നത്തെ മത്സരത്തിൽ പ്രതിക റാവലും സ്മൃതി മന്ഥനയും തന്നെയാകും ഓപൺ ചെയ്യുക. ആദ്യ മത്സരത്തിൽ ഇരുവർക്കും കാര്യമായ സംഭാവന നൽകാൻ കഴിഞ്ഞിരുന്നില്ല. 51 പന്തിൽ 36 റൺസായിരുന്നു പ്രതിക നേടിയതെങ്കിൽ 24 പന്തിൽ 28 റൺസായിരുന്നു മന്ഥനയുടെ നേട്ടം. പിന്നീട് ബാറ്റർമാർ പരാജയപ്പെട്ടപ്പോൾ മധ്യനിരയിൽ ദീപ്തിക്കൊപ്പം അമൻജ്യോത് കൗറും ചേർന്നായിരുന്നു ഇന്ത്യയെ വിജയത്തിലെത്തിച്ചത്. ഇന്നത്തെ മത്സരത്തിൽ ജയിക്കുകയാണെങ്കിൽ മൂന്ന് മത്സരങ്ങളുള്ള പരമ്പര 2-0ത്തിന് നേടാൻ ഇന്ത്യക്ക് കഴിയും. 

ALSO READ: ഇന്ത്യക്ക് കനത്ത തിരിച്ചടി; നാലാം ടെസ്റ്റിന് മുമ്പേ സൂപ്പർതാരത്തിന് പരുക്ക് 

''നിലവിൽ ടീമിനെ കുറിച്ചും കളിക്കാരെ കുറിച്ചും ആശങ്കയില്ല, ടി20 പരമ്പരയിലെ ജയം തന്നെയാണ് ടീമിന്റെ മുഖ്യ കരുത്ത്. ആദ്യ ഏകദിനത്തിൽ നടത്തിയ പ്രകടനത്തിൽ പരിശീലകർ ഉൾപ്പെടെയുള്ളവർ സന്തുഷ്ടരാണ്. പ്രതിസന്ധിയിൽ വിക്കറ്റ് നഷ്ടപ്പെടുത്താതിരുന്നാൽ ഇന്നത്തെ മത്സരത്തിലും നമുക്ക് ജയിച്ച് കയറാൻ കഴിയും'' ഇന്ത്യൻ നായിക ഹർമൻപ്രീത് കൗർ വ്യക്തമാക്കി. 

അതേ സമയം സ്വന്തം നാട്ടിൽ നടക്കുന്ന ടി20 പരമ്പര നഷ്ടപ്പെട്ട ഇംഗ്ലണ്ട് ഏകദിനത്തിലെങ്കിലും തിരിച്ചുവന്ന് പരമ്പര നേടാനുള്ള ലക്ഷ്യത്തോടെയാകും കളത്തിലിറങ്ങുക. അതിനാൽ ഇന്ന് ഇന്ത്യക്കെതിരേ ലോഡ്‌സിൽ കനത്ത പോരാട്ടം തന്നെ പ്രതീക്ഷിക്കാം. ആദ്യ മത്സരത്തിൽ കളിച്ച ടീമിൽ മാറ്റമില്ലാതെയാകും ഇംഗ്ലീഷ് ടീമിൽ കളത്തിലിറങ്ങുക. വൈകിട്ട് 3.30 മുതലാണ് മത്സരം തുടങ്ങുന്നത്.

The second ODI between India Women and England Women will be played today. After a convincing four-wicket win in the first match, India Women have a golden opportunity to clinch the ODI series with another victory.