മുംബൈ: കായിക ലോകത്തുനിന്ന് പണംവാരി ഇന്ത്യൻ ക്രിക്കറ്റ് ബോർഡ് ബി.സി.സി.ഐ. ഇന്ത്യൻ പ്രീമിയർ ലീഗാണ് (ഐ.പി.എൽ) ലോകത്തെ ഏറ്റവും സമ്പന്നമായ ബി.സി.സി.ഐയുടെ ഖജനാവ് വീണ്ടും നിറച്ചത്. 2023-24 സാമ്പത്തിക വർഷം ബി.സി.സി.ഐ നേടിയ വരുമാനത്തിന്റെ 59 ശതമാനം സംഭാവന ചെയ്തത് ഐ.പി.എല്ലാണെന്നാണ് റിപ്പോർട്ട്. ലോകത്തിലെ ഏറ്റവും മികച്ച ടി20 ലീഗിന്റെ വർധിച്ചുവരുന്ന ജനപ്രീതി ബി.സി.സി.ഐക്ക് നേട്ടമാകുകയാണ്. റെഡിഫ്യൂഷനെ ഉദ്ധരിച്ച് ദി ഹിന്ദു, ടൈംസ് ഓഫ് ഇന്ത്യ ഉൾപ്പെടെയുള്ള മാധ്യമങ്ങളാണ് ഇക്കാര്യം റിപ്പോർട്ട് ചെയ്തത്. 

റിപ്പോർട്ട് അനുസരിച്ച് 2023-24 സാമ്പത്തിക വർഷത്തിലെ ബി.സി.സി.ഐയുടെ വരുമാനം 9,741.7 കോടി രൂപയാണ്. ഇതിൽ 5,761 കോടി രൂപയും ഐ.പി.എല്ലിന്റെ സംഭാവനയാണെന്ന് റിപ്പോർട്ട് വ്യക്തമാക്കുന്നു. അന്താരാഷ്ട്ര ടൂർണമെന്റുകളുടെ സംപ്രേക്ഷണാവകാശം ഉൾപ്പെടെ ഐ.പി.എൽ ഇതര മീഡിയ റൈറ്റ്‌സ് വിറ്റതിൽ നിന്ന് 361 കോടിയാണ് ബി.സി.സി.ഐ നേടിയത്.

ALSO READ: പരമ്പര തൂക്കാൻ ഇന്ത്യ, വിജയവഴിയേറാൻ ഇംഗ്ലണ്ട്; ലോഡ്‌സിൽ തീപാറും, രണ്ടാം എകദിനം ഇന്ന്

ഇന്ത്യയുടെ മുൻനിര ആഭ്യന്തര റെഡ്‌ബോൾ ടൂർണമെന്റായ രഞ്ജി ട്രോഫി ഉൾപ്പെടെയുള്ള ആഭ്യന്തര മത്സരങ്ങൾ വാണിജ്യവൽക്കരിക്കുന്നതുവഴി വലിയ സാധ്യതകളാണ് ബി.സി.സി.ഐക്ക് മുന്നിലുള്ളതെന്നും എന്നാൽ ബോർഡ് ഇപ്പോഴും അവയുടെ പൂർണ വരുമാന ശേഷി തിരിച്ചറിഞ്ഞിട്ടില്ലെന്നും റീഡിഫ്യൂഷൻ മേധാവി സന്ദീപ് ഗോയൽ പറഞ്ഞു.നിലവിൽ ബി.സി.സി.ഐക്ക് 30000 കോടി രൂപയുടെ കരുതൽ ധനമുണ്ട്. ഇതിന് പ്രതിവർഷം പലിശയിനത്തിൽ മാത്രം 1000 കോടി ബോർഡിന് ലഭിക്കുന്നു. സ്‌പോൺസർഷിപ്പുകൾ, മീഡിയ ഡീലുകൾ, മത്സരദിന വരുമാനം എന്നിവ കണക്കിലെടുത്താൽ പ്രതിവർഷം 1012 ശതമാനം വളർച്ചയ്ക്കും സാധ്യതയുണ്ടെന്നും ഗോയൽ കൂട്ടിച്ചേർത്തു. കഴിഞ്ഞ ഐ.പി.എൽ സീസണിനുശേഷം അമേരിക്കൻ ഇൻവെസ്റ്റ്‌മെന്റ് ബാങ്കായ 'ഹുളിഹാൻ ലോക്കി' നടത്തിയ പഠനത്തിൽ ലീഗിന്റെ ബിസിനസ് മൂല്യം 1.56 ലക്ഷം കോടി രൂപയായി ഉയർന്നതായി കണ്ടെത്തിയിരുന്നു. 

കഴിഞ്ഞ സീസണിൽ ഇത് 1.34 ലക്ഷം കോടി രൂപയായിരുന്നു. ഇതിനൊപ്പം ബ്രാൻഡ് മൂല്യം 32,721 കോടി രൂപയായി ഉയർന്നു. കഴിഞ്ഞ സീസണിലെ 27,958 കോടി രൂപയിൽനിന്നാണ് ഈ വളർച്ച.ഐ.പി.എലിന്റെ ടൈറ്റിൽ സ്‌പോൺസർഷിപ്പ് കരാർ ടാറ്റ ഗ്രൂപ്പ് 2028 വരെ നീട്ടിയതിലൂടെ 2500 കോടി രൂപയാണ് ബി.സി.സി.ഐക്ക് ലഭിച്ചത്. ഇതിനൊപ്പം അസോസിയേറ്റ് സ്‌പോൺസർമാരിൽനിന്ന് 1485 കോടി രൂപയും. കഴിഞ്ഞ തവണത്തെക്കാൾ 25 ശതമാനത്തിന്റെ വർധനയാണ് അസോസിയേറ്റ് സ്‌പോൺസർഷിപ്പിലുണ്ടായത്.