ന്യൂഡല്‍ഹി: ഇന്ത്യ ഒരു മതേതര രാജ്യമാണെന്നും ന്യൂനപക്ഷങ്ങള്‍ ഈ രാജ്യത്ത് ഏറ്റവും സുരക്ഷിതരാണെന്നും കേന്ദ്ര ന്യൂനപക്ഷകാര്യ മന്ത്രി കിരണ്‍ റിജിജു. രാജ്യത്ത് എല്ലാം നഷ്ടപ്പെട്ട് ഇന്ത്യയ്ക്ക് പുറത്തേക്ക് കുടിയേറേണ്ടിവന്ന ന്യൂനപക്ഷ സമുദായത്തിലെ ഒരംഗംപോലുമില്ലെന്നും അദ്ദേഹം പറഞ്ഞു. ന്യൂനപക്ഷങ്ങള്‍ പീഡിപ്പിക്കപ്പെടുന്നു, തല്ലിക്കൊല്ലപ്പെടുന്നു, ഇന്ത്യയില്‍ സുരക്ഷിതരല്ല എന്നുള്ള നിരന്തര പ്രചാരണം കോണ്‍ഗ്രസ് പാര്‍ട്ടിയുടെ പിന്തുണയുള്ള ഇടതുപക്ഷ ആവാസവ്യവസ്ഥ നടത്തുന്നുണ്ടെന്ന ആരോപിച്ച അദ്ദേഹം, ഇത്തരം ആഖ്യാനങ്ങള്‍ രാജ്യത്തെ സഹായിക്കുന്നില്ലെന്നും പറഞ്ഞു. വാര്‍ത്താ ഏജന്‍സിയായ പി.ടി.ഐുമായി സംസാരിക്കുകയായിരുന്നു കേന്ദ്രമന്ത്രി.

ന്യൂനപക്ഷമായാലും ഭൂരിപക്ഷ സമുദായമായാലും എല്ലാവരും നിയമത്തിന് മുന്നില്‍ തുല്യരാണെന്നും അദ്ദേഹം പറഞ്ഞു. ഇപ്പോള്‍ ഭൂരിപക്ഷ സമുദായത്തിന് എന്ത് ലഭിച്ചാലും ന്യൂനപക്ഷ സമുദായങ്ങള്‍ക്കും അത് ലഭിക്കുമെന്ന് എനിക്ക് വ്യക്തമായി പറയാന്‍ കഴിയും. എന്നാല്‍ ന്യൂനപക്ഷങ്ങള്‍ക്ക് ലഭിക്കുന്ന ചില കാര്യങ്ങള്‍ ഭൂരിപക്ഷ സമുദായത്തിന് ലഭിക്കുന്നില്ല. 

ചൈനീസ് അധിനിവേശം കാരണം തിബത്തില്‍ ചില പ്രശ്‌നങ്ങള്‍ ഉണ്ടായപ്പോള്‍ തിബത്തുകാര്‍ ഇന്ത്യയിലേക്ക് വന്നു.  മ്യാന്‍മറില്‍നിന്ന് ജനാധിപത്യവാദികളും ഇന്ത്യയിലേക്ക് വന്നു. ശ്രീലങ്കയിലെ ആഭ്യന്തരയുദ്ധസമയത്ത് ലങ്കന്‍ തമിഴര്‍ വന്നു.  ബംഗ്ലാദേശില്‍ ന്യൂനപക്ഷങ്ങള്‍ പീഡിപ്പിക്കപ്പെട്ടപ്പോള്‍ അവരും വന്നു. പാകിസ്ഥാനില്‍ നിന്നും അഫ്ഗാനിസ്ഥാനില്‍ നിന്നും പലരും വന്നു. ഇന്ത്യന്‍ ഭരണഘടനയിലും ഇന്ത്യയിലെ ജനങ്ങളിലും വിശ്വാസമുള്ളതിനാലാണ് അവരെല്ലാം ഇന്ത്യയില്‍ അഭയം തേടാന്‍ ആഗ്രഹിച്ചത്. കോണ്‍ഗ്രസ് അധികാരത്തിലിരുന്നപ്പോഴുണ്ടായ ഒറ്റപ്പെട്ട സംഭവങ്ങളും കലാപങ്ങളും മാറ്റിനിര്‍ത്തിയാല്‍ ന്യൂനപക്ഷങ്ങളാണ് ഇന്ത്യയില്‍ ഏറ്റവും സുരക്ഷിതര്‍- അദ്ദേഹം അവകാശപ്പെട്ടു. ഹിന്ദു ഭൂരിപക്ഷമുള്ളതിനാല്‍ എല്ലാ ന്യൂനപക്ഷങ്ങളും ഈ രാജ്യത്ത് സമ്പൂര്‍ണ്ണ സ്വാതന്ത്ര്യവും സംരക്ഷണവും ആസ്വദിക്കുന്നു. ഇന്ത്യയില്‍ തങ്ങള്‍ സുരക്ഷിതരല്ലെന്ന് പറയുന്ന ഏതൊരാളും ഒരു രാഷ്ട്രമെന്ന നിലയില്‍ ഇന്ത്യയ്ക്ക് ഏറ്റവും വലിയ ദ്രോഹമാണ് ചെയ്യുന്നതെന്നും മന്ത്രി പറഞ്ഞു.

ALSO READ: കൂടുന്ന മനുഷ്യാവകാശ ലംഘനം; പ്രത്യേക പരിഗണനനല്‍കേണ്ട രാജ്യങ്ങളുടെ കൂട്ടത്തില്‍ ഇന്ത്യയെയും ഉള്‍പ്പെടുത്തണമെന്ന് യുഎസ് ജനപ്രതിനിധി സഭാംഗങ്ങള്‍

ALSO READ: 20 ശത്രു സൈനികര്‍ വളഞ്ഞിട്ടും കീഴടങ്ങാതെ തനിച്ച് പോരാടി; ശഹീദ് ഗുലാം മുഹമ്മദിന്റെ വീരസ്മരണ പുതുക്കി രാജ്യം | Shaheed Ghulam Mohammad Khan

India is a secular nation and minorities are safest in this country, Union Minister Kiren Rijiju has said, asserting that minorities are enjoying absolute freedom and protection because of the Hindu majority.