തിരുവനന്തപുരം: സ്വാശ്രയ കോളജുകളിലെ ഫീസ് വര്‍ധനവില്‍ പ്രതിഷേധിച്ച് കെ.എസ്.യു പ്രവര്‍ത്തകര്‍ നടത്തിയ സെക്രട്ടേറിയറ്റ് മാര്‍ച്ചില്‍ സംഘര്‍ഷം. പൊലിസും സമരക്കാരും തമ്മില്‍ ഉന്തുംതള്ളുമുണ്ടായതിനെ തുടര്‍ന്ന് പൊലിസ് നടത്തിയ ജലപീരങ്കി പ്രയോഗത്തില്‍ മൂന്ന് കെ.എസ്.യു പ്രവര്‍ത്തകര്‍ക്ക് പരുക്കേറ്റു.

ഇന്നലെ രാവിലെ 11.30ഓടെ പ്രസ്‌ക്ലബ് പരിസരത്തു നിന്ന് ആരംഭിച്ച മാര്‍ച്ച് സെക്രട്ടേറിയറ്റിനു മുന്നില്‍ പൊലിസ് തടഞ്ഞു. തുടര്‍ന്ന് പ്രവര്‍ത്തകര്‍ റോഡില്‍ കുത്തിയിരുന്ന് ധര്‍ണ തുടങ്ങി. കെ.പി.സി.സി ജനറല്‍ സെക്രട്ടറി പി.സി വിഷ്ണുനാഥ് ധര്‍ണ ഉദ്ഘാടനം ചെയ്തു. മാനേജ്‌മെന്റുകളുമായി ഒത്തുചേര്‍ന്ന് സര്‍ക്കാര്‍ സ്വാശ്രയ മേഖലയെ കച്ചവടവല്‍ക്കരിക്കുകയാണെന്ന് വിഷ്ണുനാഥ് ആരോപിച്ചു. നേതാക്കള്‍ പ്രസംഗിച്ചു കഴിഞ്ഞപ്പോള്‍ പ്രവര്‍ത്തകര്‍ക്കിടയില്‍ നിന്ന് പൊലിസിനു നേരെ ആക്രമണ ശ്രമമുണ്ടായതോടെയാണ് സംഘര്‍ഷത്തിനു തുടക്കമായത്. പ്രവര്‍ത്തകരും പൊലിസും തമ്മില്‍ ഉന്തും തള്ളുമുണ്ടായി.  ഇതോടെ പ്രവര്‍ത്തകര്‍ക്കു നേരെ ജലപീരങ്കി പ്രയോഗമുണ്ടായി.  പ്രകോപിതരായി ബാരിക്കേഡിന് അടുത്തേക്ക് നീങ്ങിയ പ്രവര്‍ത്തകര്‍ക്കു നേരെ വീണ്ടും പൊലിസ് ജലപീരങ്കി പ്രയോഗിച്ചു.

ഇതിനിടയില്‍ ലാത്തിയടി കൊണ്ടണ്ട് നിഹാല്‍, നദീല്‍, റിങ്കു പടിപ്പുര എന്നിവര്‍ക്ക് പരുക്കേറ്റു. റിങ്കുവിന് ബാരിക്കേഡിന്റെ കമ്പി കൊണ്ടണ്ട് കാലിലും കൈയിലും മുറിവേറ്റു. മറ്റു രണ്ടണ്ടു പേര്‍ക്കും കാലിനാണ് പരുക്ക്. മാര്‍ച്ചിന് നേതൃത്വം നല്‍കിയ യുവ എം.എല്‍.എമാരെ പൊലിസ് കൈയേറ്റം ചെയ്യുന്നതു തടയാനെത്തിയപ്പോഴാണ് പ്രവര്‍ത്തകരെ പൊലിസ് ആക്രമിച്ചത്. എം.എല്‍.എമാരായ ഷാഫി പറമ്പില്‍, ഹൈബി ഈഡന്‍, റോജി എം. ജോണ്‍, എം. വിന്‍സെന്റ് തുടങ്ങിയവരെയാണ് പൊലിസ് കൈയേറ്റം ചെയ്തത്.

വീണ്ടും സംഘര്‍ഷാവസ്ഥയുണ്ടണ്ടായെങ്കിലും നേതാക്കള്‍ ഇടപെട്ട് രംഗം ശാന്തമാക്കുകയായിരുന്നു. തുടര്‍ന്ന്  പ്രവര്‍ത്തകര്‍ പ്രകടനം നടത്തി പിരിഞ്ഞു പോയി. കെ.പി.സി.സി സെക്രട്ടറി എം.എം നസീര്‍, യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ്, കെ.എസ്.യു നേതാക്കളായ എസ്. ശരത്, എ.എം രോഹിത്, ജെ.എസ് അഖില്‍, സോണി എസ് ജോണ്‍, പി.വൈ ഷാജഹാന്‍, നിയാസ് കുര്യാപ്പള്ളി, ജോബിന്‍ തുടങ്ങിയവര്‍ പങ്കെടുത്തു.