വാഷിങ്ടണ്‍: ഇന്ത്യക്കെതിരെ വീണ്ടും നികുതി ഭീഷണിയുമായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. റഷ്യന്‍ എണ്ണ വാങ്ങിയാല്‍ 25 ശതമാനം നികുതിക്ക് പുറമെ അധിക നികുതി ചുമത്തുമെന്ന് ട്രൂത്ത് സോഷ്യലില്‍ പങ്കുവെച്ച പോസ്റ്റില്‍ ട്രംപ് പറഞ്ഞു. എന്നാല്‍ എത്ര ശതമാനമാണ് അധിക തീരുവയായി ചുമത്താന്‍ പോകുന്നതെന്ന് ട്രംപ് വ്യക്തമാക്കിയിട്ടില്ല. 

റഷ്യന്‍ എണ്ണ വാങ്ങുന്ന ഇന്ത്യ അത് അമിത ലാഭത്തിന് വിപണിയില്‍ വില്‍ക്കുന്നുവെന്നും റഷ്യ യുക്രെയിനില്‍ എത്രപേരെ കൊന്നൊടുക്കിയെന്നത് ഇന്ത്യക്ക് പ്രശ്‌നമല്ലെന്നും ട്രംപ് പറഞ്ഞു. 

നേരത്തെ റഷ്യയില്‍ നിന്ന് എണ്ണ വാങ്ങിക്കൊണ്ട് യുക്രൈനില്‍ നടക്കുന്ന യുദ്ധത്തിന് ഇന്ത്യ സഹായം നല്‍കുകയാണെന്ന് ആരോപിച്ച് വൈറ്റ് ഹൗസിലെ മുതിര്‍ന്ന ഉദ്യോഗസ്ഥനും രംഗത്തെത്തിയിരുന്നു. ഇതിന് പിന്നാലെയാണ് ട്രംപിന്റെ താരിഫ് ഭീഷണി. 

ALSO READ: 'മതിയാക്ക് ഈ യുദ്ധം' - ട്രംപിന് മൊസാദിന്റെ ഉൾപ്പടെ 600-ലധികം മുൻ ഇസ്‌റാഈലി സുരക്ഷാ മേധാവികളുടെ കത്ത്, നെതന്യാഹുവിന്റെ ഓഫീസിന് മുന്നിലും പ്രതിഷേധം  

ഇന്ത്യയില്‍ നിന്ന് യുഎസില്‍ ഇറക്കുമതി ചെയ്യുന്ന ഉല്‍പ്പന്നങ്ങള്‍ക്ക് 25 ശതമാനം നികുതിയും, അധിക പിഴയും ട്രംപ് ചുമത്തിയിരുന്നു. റഷ്യയില്‍ നിന്നുള്ള ക്രൂഡോയില്‍ ഇറക്കുമതി ഇന്ത്യ കൂട്ടിയതോടെയാണ് അധിക പിഴ ഏര്‍പ്പെടുത്തിയത്. ഇന്ത്യയില്‍ നിന്നുള്ള ടെക്‌സ്‌റ്റൈല്‍സ് അടക്കം പല ഉത്പന്നങ്ങളുടെയും കയറ്റുമതിയെ ഇത് കാര്യമായി ബാധിക്കുമെന്നാണ് വിലയിരുത്തല്‍.
  
അതേസമയം റഷ്യയില്‍ നിന്ന് എണ്ണ വാങ്ങുന്നത് അവസാനിപ്പിക്കാന്‍ ഇന്ത്യ ഇതുവരെ തീരുമാനിച്ചിട്ടില്ല. എങ്കിലും 
നേരിട്ട് ട്രംപുമായി കൊമ്പുകോര്‍ക്കേണ്ടതില്ല എന്ന നിലപാടിലാണ് കേന്ദ്ര സര്‍ക്കാര്‍. യുഎസുമായുള്ള വ്യാപാര കരാറില്‍ സംയമനം പാലിക്കാനാണ് തീരുമാനം. അമേരിക്കയില്‍ നിന്ന് കൂടുതല്‍ അസംസ്‌കൃത എണ്ണ ഇറക്കുമതി ചെയ്‌തേക്കും. അതേസമയം കാര്‍ഷിക, ക്ഷീര ഉത്പന്നങ്ങളുടെ കാര്യത്തില്‍ വിട്ടുവീഴ്ച വേണ്ട എന്ന നിലപാടിലാണ് ഇന്ത്യ. വ്യാപാര കരാറിന് ഈ മാസം അവസാനം അന്തിമരൂപം ആയേക്കുമെന്നാണ് റിപ്പോര്‍ട്ട്.