തിരുവനന്തപുരം: ഷാര്‍ജയില്‍ മലയാളി യുവതി അതുല്യയുടെ മരണവുമായി ബന്ധപ്പെട്ട് തിരുവനന്തപുരത്ത് അറസ്റ്റിലായ ഭര്‍ത്താവ് ശാസ്താംകോട്ട മനക്കര സ്വദേശി സതീഷിന് ഇടക്കാല ജാമ്യം. കൊല്ലം സെഷന്‍സ് കോടതിയാണ് ജാമ്യം അനുവദിച്ചത്. ഷാര്‍ജയില്‍ നിന്നും ഞായറാഴ്ച പുലര്‍ച്ചെ തിരുവനന്തപുരം വിമാനത്താവളത്തിലെത്തിയപ്പോഴാണ് എമിഗ്രേഷന്‍ വിഭാഗം ഇയാളെ അറസ്റ്റു ചെയ്തത്. അതുല്യയുടെ മരണത്തില്‍ ബന്ധുക്കളുടെ പരാതിയില്‍ കൊല്ലം പൊലിസ് കേസ് രജിസ്റ്റര്‍ ചെയ്തിരുന്നു. 

ALSO READ: ഗസ്സ പിടിച്ചെടുക്കാനുള്ള സയണിസ്റ്റ് നീക്കത്തെ തള്ളി സംയുക്ത അറബ്, ഇസ്‌ലാമിക മന്ത്രിതല സമിതി

ജൂലായ് 19നാണ്  കൊല്ലം തേവലക്കര സ്വദേശിനിയായ അതുല്യയെ  ഷാര്‍ജയിലെ ഫ്‌ളാറ്റിനുള്ളില്‍ മരിച്ച നിലയില്‍ കണ്ടെത്തിയത്. ഇതിന് പിന്നാലെ, അതുല്യയുടെ മരണത്തിന് പിന്നില്‍ അവരുടെ ഭര്‍ത്താവ് സതീഷ് ആണെന്ന ആരോപണമുയര്‍ന്നു. ഇതിനെ ബലപ്പെടുത്ത വിധത്തില്‍  അതുല്യയെ ഭര്‍ത്താവ് സതീഷ് മര്‍ദ്ദിക്കുന്നത് ഉള്‍പ്പെടെ പീഡന ദൃശ്യങ്ങളും പുറത്തു വന്നിരുന്നു. ഭര്‍ത്താവില്‍ നിന്നും നിരന്തര ആക്രമണവും ഉപദ്രവങ്ങളും നേരിടുന്നതായി സുഹൃത്തുക്കള്‍ക്കയച്ച ശബ്ദ സന്ദേശവും പുറത്തു വന്നു. തുടര്‍ന്ന് അതുല്യയുടെ കുടുംബം നല്‍കിയ പരാതിയില്‍ പൊലിസ് സതീഷിനെതിരെ കൊലക്കുറ്റം ചുമത്തി കേസ് എടുക്കുകയായിരുന്നു.

എന്നാല്‍, ഷാര്‍ജയില്‍ നടത്തിയ ഫോറന്‍സിക് പരിശോധനയില്‍ മരണത്തില്‍ അസ്വാഭാവികതയില്ലെന്ന് കണ്ടെത്തി. മൃതദേഹം നാട്ടിലെത്തിച്ച ശേഷം റീ പോസ്റ്റ്‌മോര്‍ട്ടവും നടത്തിയിരുന്നു. ലോക്കല്‍ പൊലിസ് രജിസ്റ്റര്‍ ചെയ്ത കേസ് ഇപ്പോള്‍ ക്രൈംബ്രാഞ്ചാണ് അന്വേഷിക്കുന്നത്. 30-ാം ജന്മദിനത്തിലാണ് അതുല്യയെ മരിച്ചനിലയില്‍ കണ്ടെത്തിയത്. 10 വയസ്സുളള മകളുണ്ട്.

ALSO READ: ഷാര്‍ജയിലെ അതുല്യയുടെ മരണം: ഭര്‍ത്താവ് സതീഷ് തിരുവനന്തപുരം വിമാനത്താവളത്തില്‍ പിടിയില്‍

ALSO READ: ഷാർജയിൽ മലയാളി യുവതിയുടെ ആത്മഹത്യ: ഭർത്താവിനെതിരെ ഗുരുതര ആരോപണങ്ങളുമായി മാതാവ്; കൊലക്കുറ്റം ചുമത്തി കേസെടുത്ത് പൊലിസ്

Satheesh, a native of Sasthamcotta, was arrested at Thiruvananthapuram airport in connection with the death of his wife Athulya in Sharjah.