ഡൽഹി: കാഫ നാഷണൽ കപ്പിനുള്ള ഇന്ത്യൻ ടീമിനെ പരിശീലകൻ ഖാലിദ് ജമീൽ പ്രഖ്യാപിച്ചിരിക്കുകയാണ്. ഇന്ത്യൻ ടീമിനൊപ്പം പരിശീലകനായുള്ള ഖാലിദ് ജമീലിന്റെ ആദ്യ ടൂർണമെന്റ് ആണിത്. 23 അംഗ ടീമിനെയാണ് ടൂർണമെന്റിനായി ഖാലിദ് തെരഞ്ഞെടുത്തത്. മോഹൻ ബഗാൻ സൂപ്പർ ജയന്റ്സിലെ ഏഴ് താരങ്ങളെ ഇന്ത്യൻ ടീമിലേക്ക് വിട്ടു നൽകാൻ ക്ലബ്‌ തയ്യാറായില്ല.

താരങ്ങളോടുള്ള ഇന്ത്യൻ ഫുട്ബോൾ ഫെഡറേഷന്റെ സമീപനം ചൂണ്ടിക്കാട്ടിയാണ് മോഹൻ ബഗാൻ താരങ്ങളെ നാഷണൽ ഡ്യൂട്ടിക്കായി അയക്കാതിരുന്നത്. മോഹൻ ബഗാന്റെ ഈ നടപടിയെക്കുറിച്ച് ഖാലിദ് ജമീൽ പ്രതിരിക്കുകയും ചെയ്തു. മോഹൻ ബഗാന്റെ ഈ നടപടി വെല്ലുവിളിയായി എടുക്കുന്നുവെന്നാണ് ഇന്ത്യൻ പരിശീലകൻ വ്യക്തമാക്കിയത്.

"ചില കാരണങ്ങളാൽ ചില ക്ലബ്ബുകൾ താരങ്ങളെ വിട്ടു നൽകുന്നില്ല. ഓഫ് സീസൺ കഴിഞ്ഞാണ് നമ്മൾ ക്യാമ്പിലേക്ക് തിരിച്ചു വരുന്നത്. ഇതൊരു വെല്ലുവിളിയായി ഏറ്റെടുക്കുന്നു. ഇതിൽ ഒരു ബുദ്ധിമുട്ടും ഉള്ളതായി എനിക്ക് തോന്നുന്നില്ല. നമ്മുടെ ടീമിൽ നല്ല താരങ്ങൾ ഉണ്ട്. എനിക്ക് ആവശ്യമായ താരങ്ങളെ ടീമിൽ ലഭിച്ചിട്ടുണ്ട്. പുതിയ താരങ്ങൾക്ക് പ്രതിഭ തെളിയിക്കാൻ അവസരം നൽകും" ഖാലിദ് ജമീൽ ടീം പ്രഖ്യാപിച്ചതിന് ശേഷം മാധ്യമങ്ങളോട് പറഞ്ഞു.

ഇന്ത്യക്കായി കളിക്കാനിറങ്ങി താരങ്ങൾ തിരിച്ച് ടീമിലേക്ക് വരുമ്പോൾ പരുക്ക് പറ്റിയിട്ടുണ്ടാവുമെന്നും എന്നാൽ ഈ താരങ്ങൾക്ക് പിന്തുണ ഇന്ത്യൻ ഫുട്ബോൾ ഫെഡറേഷൻ നൽകുന്നില്ലെന്നുമാണ് മോഹൻ ബഗാൻ ഉന്നയിക്കുന്നത്. മലയാളി താരം സഹൽ അബ്ദുൽ സമദ്, വിശാൽ കെയ്ത്ത്, മൻവീർ സിംഗ്, ലാലെങ്മാവിയ, ദീപക്ക് ടാംഗ്രി, ലിസ്റ്റൺ കൊളോകോ, അനിരുദ്ധ ഥാപ എന്നീ താരങ്ങളെയാണ് ഇന്ത്യൻ ടീമിലേക്ക് തെരഞ്ഞെടുത്തിരുന്നത്. എന്നാൽ ഇവരെ മോഹൻ ബഗാൻ വിട്ടുകൊടുക്കാതിരിക്കുകയായിരുന്നു.

താജിക്കിസ്ഥാനിലാണ് ടൂർണമെന്റ് നടക്കുന്നത്. ഗ്രൂപ്പ് ബിയിൽ ആതിഥേയരെ കൂടാതെ ഇറാൻ, അഫ്ഗാനിസ്ഥാൻ, എന്നിവർക്കൊപ്പമാണ് ഇന്ത്യയുള്ളത്. ഓഗസ്റ്റ് 29ന് താജിക്കിസ്ഥാനുമായിട്ടാണ് ഇന്ത്യയുടെ ആദ്യ മത്സരം. ഇറാനാണ് നിലവിലെ ചാംപ്യൻമാർ.

കാഫ നാഷണൽ കപ്പിനുള്ള ഇന്ത്യൻ ടീം

ഗോൾകീപ്പർമാർ: അമരീന്ദർ സിങ്, ഹൃതിക് തിവാർ, ഗുർപ്രീത് സിങ് സന്ധു

ഡിഫൻഡർമാർ: രാഹുൽ ബെക്കെ, റോഷൻ സിങ്, അൻവർ അലി, സന്ദേശ് ജിങ്കാൻ, ചിംഗൽസേന സിങ്, റാൾട്ടെ, മുഹമ്മദ് ഉവായ്

മിഡ്ഫീൽഡർമാർ: നിഖിൽ പ്രഭു, സുരേഷ് സിങ്, ഡാനിഷ് ഫാറൂഖ് ഭട്ട്, ജീക്‌സൻ സിങ്, ബോറിസ് സിങ്, ആഷിക്ക് കരുണിയൻ, ഉദാന്ത സിങ്, മഹേഷ്  സിങ്

ഫോഡർഡുകൾ: ഇർഫാൻ യദ്വാദ്, മാൻവീർ സിങ്, ജിതിൻ, ചാങ്‌തെ, വിക്രം പ്രതാപ് സിങ്.

Indian coach Khalid Jameel reacts to Mohun Bagan Supergiants' decision to not release seven players to the Indian team. The Indian coach made it clear that he is taking Mohun Bagan's action as a challenge.