കേരള ക്രിക്കറ്റ് ലീഗിന്റെ രണ്ടാം സീസൺ ആവേശകരമായി നടന്നുകൊണ്ടിരിക്കുകയാണ്. ലീഗിൽ ഇതിനോടകം തന്നെ ഒരുപാട് താരങ്ങൾ മികച്ച പ്രകടനം നടത്തി ശ്രദ്ധ നേടിയിട്ടുണ്ട്. ലീഗിൽ കളിക്കുന്ന താരങ്ങളെക്കുറിച്ച് സൂപ്പർ താരം സഞ്ജു സാംസൺ പറഞ്ഞ വാക്കുകൾ ആണ് ഇപ്പോൾ ഏറെ ശ്രദ്ധ നേടുന്നത്. കേരള ക്രിക്കറ്റിൽ ഒരുപാട് കഴിവുള്ള താരങ്ങൾ ഉണ്ടെന്നും അധികം വൈകാതെ മറ്റൊരു മലയാളി താരം കൂടി ഈ രാജ്യത്തിനുവേണ്ടി കളിക്കുന്നത് കാണാൻ സാധിക്കും എന്നുമാണ് സഞ്ജു പറഞ്ഞത്.

"കേരള ക്രിക്കറ്റിൽ ഇത്രയധികം കഴിവുള്ള താരങ്ങൾ ഉള്ളത് ഞെട്ടിക്കുന്ന കാര്യമാണ്. ഒന്ന് രണ്ട് വർഷത്തിനുള്ളിൽ മറ്റൊരു മലയാളി താരം ഇന്ത്യക്കായി കളിക്കുന്നത് കാണാൻ നമുക്ക് സാധിക്കും.  അങ്ങനെ സംഭവിക്കുമെന്ന് ഉറപ്പാണ്" സഞ്ജു സാംസൺ പറഞ്ഞു. 

ലീഗ് തുടങ്ങുന്നതിന് മുമ്പ് വരാനിരിക്കുന്ന അഞ്ച് വർഷത്തിനുള്ളിൽ ഇന്ത്യയിലെ ഏറ്റവും മികച്ച ടൂർണമെന്റായി കെസിഎൽ മാറുമെന്നും സഞ്ജു പറഞ്ഞിരുന്നു. രണ്ടാം സീസണിന്റെ ഗ്രാൻഡ് ലോഞ്ച് പരുപാടിയിലാണ് സഞ്ജു ഇക്കാര്യം പറഞ്ഞത്. 

''കേരളത്തിലെ താരങ്ങളുടെ കഴിവുകളാണ് കേരള ക്രിക്കറ്റ് ലീഗിന്റെ ഭാവി. ഇന്ത്യൻ ക്രിക്കറ്റ് ടീം ഡ്രസിങ് റൂമിൽ കേരളത്തിലെ താരങ്ങളുടെ കഴിവിനെക്കുറിച്ച് വലിയ മതിപ്പുണ്ട്. കേരള ക്രിക്കറ്റ് അസോസിയേഷൻ കെസിഎൽ എന്ന ഈ വേദി ഒരുക്കിയത് താരങ്ങളുടെ കഴിവുകൾ പുറത്തെടുക്കാനാണ്.  അടുത്ത അഞ്ച് വർഷത്തിനുള്ളിൽ ഇന്ത്യൻ ആഭ്യന്തര ക്രിക്കറ്റിൽ ഏറ്റവും മികച്ച ലീഗായി കേരള ക്രിക്കറ്റ് ലീഗ് മാറുമെന്നാണ് ഞാൻ പ്രതീക്ഷിക്കുന്നത്'' സഞ്ജു പറഞ്ഞു.

കേരള ക്രിക്കറ്റ് ലീഗിൽ സഞ്ജു മികച്ച പ്രകടനമാണ് പുറത്തെടുക്കുന്നത്. ഏരീസ് കൊല്ലം സെയ്‌ലേഴ്‌സിനെതിരെ സെഞ്ച്വറി നേടി സഞ്ജു തിളങ്ങിയിരുന്നു. 51 പന്തിൽ നിന്നും 14 ഫോറുകളും ഏഴ് സിക്സുകളും അടക്കം 121 റൺസ് നേടിയാണ് സഞ്ജു തിളങ്ങിയത്. മത്സരത്തിലെ പ്ലേയർ ഓഫ് ദി മാച്ചായും സഞ്ജു തെരഞ്ഞെടുക്കപ്പെട്ടു. താരലേലത്തിൽ സഞ്ജുവിനെ 26.80 ലക്ഷം രൂപക്കാണ് സഞ്ജുവിനെ കൊച്ചി ബ്ലൂ ടൈഗേഴ്‌സ് സ്വന്തമാക്കിയത്. ടൂർണമെന്റിന്റെ ചരിത്രത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന തുകയാണിത്. 

The second season of the Kerala Cricket League is underway with excitement. Many players have already performed well in the league and gained attention. Sanju Samson talks about the players playing in the league are currently garnering a lot of attention.