ന്യൂഡൽഹി: കേന്ദ്ര അന്വേഷണ ഏജൻസിയായ സി.ബി.ഐ ഏറ്റെടുത്ത 7,072 അഴിമതിക്കേസുകൾ രാജ്യത്തെ വിവിധ കോടതികളിൽ വിചാരണ കാത്തുകിടക്കുകയാണെന്ന് കേന്ദ്ര വിജിലൻസ് കമ്മിഷൻ (സി.വി.സി) വാർഷിക റിപ്പോർട്ട്. ഇതിൽ 379 കേസുകൾ 20 വർഷത്തിലേറെ പഴക്കമുള്ളവയാണെന്നും റിപ്പോർട്ട് വ്യക്തമാക്കുന്നു. 

2024 ഡിസംബർ 31 വരെയുള്ള കണക്കു പ്രകാരം മൊത്തം കേസുകളിൽ 1,506 കേസുകളും മൂന്ന് വർഷത്തോളമായി വിചാരണ നടപടി തുടങ്ങാത്തവയാണ്. 791 കേസുകൾ മൂന്നു വർഷത്തിൽ കൂടുതലുള്ളവയും 2,115 കേസുകൾ അഞ്ചു മുതൽ പത്തുവർഷം വരെയായി വിചാരണാ നടപടി തുടങ്ങാത്തവയുമാണ്. 2,281 അഴിമതിക്കേസുകൾ 10 മുതൽ 20 വർഷം വരെയായി കെട്ടിക്കിടക്കുന്നവയാണ്. 399 കേസുകൾ 20 വർഷത്തിൽ കൂടുതലായുള്ളവയും.

ഇതോടൊപ്പം 13,100 കേസുകളിലെ അപ്പീലുകളും പുനപ്പരിശോധനാ ഹരജികളും വിവിധ ഹൈക്കോടതികളും സുപ്രിം കോടതിയിലും കെട്ടിക്കിടക്കുകയാണ്. ഇവയിൽ 606 കേസുകൾ 20 വർഷത്തിലേറെ പഴക്കമുള്ളവയാണ്. 1,227 കേസുകൾ 15 വർഷത്തിൽ കൂടുതലുള്ളവയും 2,989 കേസുകൾ 10 വർഷത്തിലേറെയുള്ളതുമാണ്.

2024ൽ വിധി പറഞ്ഞ 644 ൽ 392 കേസുകളിൽ പ്രതികൾക്ക് ശിക്ഷ വിധിച്ചു. 154 കേസുകളിലെ പ്രതികളെ കോടതി കുറ്റവിമുക്തരാക്കി. 77 കേസുകൾ സി.ബി.ഐ സ്വന്തം നിലയിൽ തീർപ്പാക്കി. കഴിഞ്ഞ വർഷം വിചാരണ ചെയ്ത് വിധി പറഞ്ഞ കേസുകളിൽ 69.14 ശതമാനമാണ് ശിക്ഷാ നിരക്കെന്നും വിജിലൻസ് കമ്മിഷൻ റിപ്പോർട്ടിൽ പറയുന്നു. 

കേസ് രജിസ്റ്റർ ചെയ്ത് ഒരു വർഷത്തിനുള്ളിൽ അന്വേഷണം പൂർത്തിയാക്കണമെന്നാണ് സി.ബി.ഐ ചട്ടം. എന്നാൽ ആവശ്യമായ തുടർഅനുമതി ലഭിച്ചാൽ അന്വേഷണം നീട്ടാനാകും. എന്നാൽ പല കേസുകളിലും സമയബന്ധിതമായി അന്വേഷണം പൂർത്തിയാക്കാൻ സി.ബി.ഐയ്ക്ക് കഴിയുന്നില്ലെന്നും സി.വി.സി റിപ്പോർട്ടിൽ പറയുന്നു.