അലഹബാദ്: ജിമ്മുകളിൽ പുരുഷ പരിശീലകർ സ്ത്രീകൾക്ക് പരിശീലനം നൽകുന്നതിൽ ആശങ്ക പ്രകടിപ്പിച്ച് അലഹബാദ് ഹൈക്കോടതി. മതിയായ സുരക്ഷാ സംവിധാനങ്ങളില്ലാതെ പരിശീലനം നൽകുന്നത് സ്ത്രീകളുടെ സുരക്ഷയെയും അന്തസിനെയും ബാധിക്കാമെന്ന് കോടതി ആശങ്ക പ്രകടിപ്പിച്ചു. 

സ്ത്രീ ക്ലയന്റുകൾക്ക് അവരുടെ സുരക്ഷയും അന്തസ്സും ഉറപ്പാക്കാൻ മതിയായ സുരക്ഷാ സംവിധാനങ്ങളില്ലാതെ പുരുഷ ജിം പരിശീലകർ പരിശീലനം നൽകുന്നത് ഏറെ ആശങ്കാജനകമാണ് എന്ന് ഓഗസ്റ്റ് 27 ന് ജിമ്മുമായി ബന്ധപ്പെട്ട ഒരു കേസ് പരിഗണിക്കവെ കോടതി പറഞ്ഞു. ഒരു യുവതി ജിം ട്രെയിനർക്കെതിരെ ജാതി അധിക്ഷേപം നടത്തിയെന്ന് ആരോപിക്കപ്പെട്ട നൽകിയ കേസിൽ പരിശീലകൻ നിതിൻ സൈനി സമർപ്പിച്ച അപ്പീൽ പരിഗണിക്കവെയാണ് ജസ്റ്റിസ് ശേഖർ കുമാർ യാദവ് നിർണായക നിരീക്ഷണം നടത്തിയത്.

ALSO READ: ബിജെപി മുഖ്യമന്ത്രിമാരുടെ കഴിവുകേടിന് നെഹ്‌റുവിനെ കുറ്റം പറയേണ്ട; 11 വർഷം ഭരിച്ചിട്ടും അടിസ്ഥാന സൗകര്യം പോലുമില്ല, മഴയിൽ മുങ്ങി ഇന്ത്യയുടെ മില്ലേനിയം സിറ്റി

പ്രതി ജിമ്മിൽ വരാറുള്ള മറ്റൊരു യുവതിയുടെ അശ്ലീല വീഡിയോകൾ തയ്യാറാക്കിയിട്ടുണ്ടെന്നും ആ സ്ത്രീക്ക് അത്തരം അശ്ലീല ദൃശ്യങ്ങൾ അയച്ചിരുന്നതായും പരാതിക്കാരി വിചാരണ കോടതിയിൽ നൽകിയ മൊഴിയിൽ ആരോപിച്ചു. അപ്പീൽക്കാരൻ നടത്തുന്ന ജിം നിയമപ്രകാരം രജിസ്റ്റർ ചെയ്തിട്ടുണ്ടോ എന്ന് സൂചിപ്പിക്കുന്ന ഒരു സ്വകാര്യ സത്യവാങ്മൂലം ഫയൽ ചെയ്യാൻ കോടതി അന്വേഷണ ഉദ്യോഗസ്ഥരോട് നിർദേശിച്ചു. മീററ്റിലെ ബ്രഹ്മപുരി പൊലിസാണ് കേസ് അന്വേഷിക്കുന്നത്.
 
ഐപിസി സെക്ഷൻ 354 (ഒരു സ്ത്രീയുടെ മാന്യതയെ അപമാനിക്കൽ), 504 (സമാധാന ലംഘനത്തിന് പ്രേരിപ്പിക്കുന്ന മനഃപൂർവമായ അപമാനം) എന്നിവ പ്രകാരം പരിശീലകൻ ചെയ്ത പ്രവർത്തികൾ ശിക്ഷാർഹമായ കുറ്റകൃത്യങ്ങളാകാമെന്ന് ഹൈക്കോടതി പറഞ്ഞു. കേസിന്റെ വാദം കേൾക്കൽ സെപ്റ്റംബർ 8 ലേക്ക് മാറ്റി.