അമേരിക്ക നാമനിര്‍ദ്ദേശം ചെയ്ത 'പ്രധാന നാറ്റോ ഇതര സഖ്യകക്ഷി'യും വാഷിംഗ്ടണിന്റെ ഏറ്റവും അടുത്ത ഗള്‍ഫ് പങ്കാളികളില്‍ ഒരാളുമായ ഖത്തറിനെതിരെ ഇസ്‌റാഈല്‍ കഴിഞ്ഞ ആഴ്ച നടത്തിയ ആക്രമണത്തിന് മണിക്കൂറുകള്‍ക്കകം ഇസ്‌റാഈല്‍ അനുകൂല നിരൂപകരുടെ ശ്രദ്ധ തിരിഞ്ഞത് തുര്‍ക്കിയിലേക്കായിരുന്നു. 

ഇസ്‌റാഈലിന്റെ അടുത്ത ലക്ഷ്യം തുര്‍ക്കി ആയിരിക്കുമെന്നാണ് ആക്രമണത്തിന് പിന്നാലെ 
വലതുപക്ഷ ചായ്വുള്ള അമേരിക്കന്‍ എന്റര്‍പ്രൈസ് ഇന്‍സ്റ്റിറ്റ്യൂട്ടിലെ സീനിയര്‍ ഫെലോ ആയ മൈക്കല്‍ റൂബിന്‍ അഭിപ്രായപ്പെട്ടത്. സംരക്ഷണത്തിനായി അത് നാറ്റോ അംഗത്വത്തെ ആശ്രയിക്കരുതെന്ന മുന്നറിയിപ്പും മൈക്കല്‍ റൂബിന്‍ നല്‍കി.

'ഇന്ന് ഖത്തര്‍, നാളെ തുര്‍ക്കി' എന്ന് ഇസ്‌റാഈലി അക്കാദമിക്, രാഷ്ട്രീയ വ്യക്തിത്വമായ മെയര്‍ മസ്രി സോഷ്യല്‍ മീഡിയയില്‍ പോസ്റ്റ് ചെയ്യുകയും ചെയ്തു. ഇതിന് രൂക്ഷമായ ഭാഷയിലാണ് അങ്കാറ പ്രതികരിച്ചത്. ഇന്നേവനരെ പ്രയോഗിച്ചിട്ടില്ലാത്തത്രയും രൂക്ഷമായ ഭാഷയിലായിരുന്നു പ്രസിഡന്റ് റജബ് ത്വയ്യിബ് എര്‍ദോഗന്റെ മുതിര്‍ന്ന ഉപദേഷ്ടാവിന്റെ ആ സോഷ്യല്‍ മീഡിയ പോസ്റ്റ്. 
'സയണിസ്റ്റ് ഇസ്‌റാഈലിന്റെ നായയ്ക്ക് ... ഭൂപടത്തില്‍ നിന്ന് നിങ്ങളെ മായ്ക്കുന്നതോടെ ലോകം സമാധാനം കണ്ടെത്തും. ഇക്കാര്യം ഉടന്‍ സംഭവിക്കും'  അദ്ദേഹം കുറിച്ചു.

മാസങ്ങളായി, ഇസ്‌റാഈല്‍ അനുകൂല മാധ്യമങ്ങള്‍ തുര്‍ക്കിക്കെതിരായ വാചാടോപങ്ങള്‍ നിരന്തരം വര്‍ദ്ധിപ്പിച്ചുകൊണ്ടിരിക്കുകയാണ്. 'ഇസ്‌റാഈലിന്റെ ഏറ്റവും അപകടകാരിയായ ശത്രു' എന്നാണ് തുര്‍ക്കിയെ അവര്‍ ചിത്രീകരിക്കുന്നത്.  

ALSO READ: തിരിച്ചടിച്ച് ഹമാസ്, ഖസ്സാം ബ്രിഗേഡിന്റെ ഒളിയാക്രമണത്തില്‍ പൊട്ടിത്തെറിച്ച് ഇസ്‌റാഈല്‍ മെര്‍ക്കേവ ടാങ്കുകള്‍, വീഡിയോ

കിഴക്കന്‍ മെഡിറ്ററേനിയനിലെ തുര്‍ക്കിയുടെ സാന്നിധ്യത്തെ 'ഭീഷണി'യായും ഇസ്‌റാഈലി നിരൂപകര്‍ വിലയിരുത്തുന്നു.  യുദ്ധാനന്തര സിറിയയെ പുനര്‍നിര്‍മ്മിക്കുന്നതിലുള്ള അതിന്റെ പങ്ക് 'ഉയര്‍ന്നു വരുന്ന പുതിയ അപകടമായും അവര്‍ ചിത്രീകരിക്കുന്നു. 

ഇസ്‌റാഈലിന്റെ പ്രാദേശിക കയ്യേറ്റങ്ങള്‍ രൂക്ഷമാവുകയും ഗസ്സക്കെതിരായ യുദ്ധം അവസാനിക്കുന്നതിന്റെ ലക്ഷണമൊന്നും കാണിക്കാതിരിക്കുകയും ചെയ്യുന്ന സാഹചര്യത്തില്‍ അവരുമായുള്ള സാമ്പത്തിക, വ്യാപാര ബന്ധങ്ങള്‍ താല്‍ക്കാലികമായി നിര്‍ത്തിവച്ചുകൊണ്ട് തുര്‍ക്കി വിദേശകാര്യ മന്ത്രി ഹകാന്‍ ഫിദാന്‍ ആഗസ്റ്റില്‍ തിരിച്ചടിച്ചിരുന്നു.

'ഇസ്‌റാഈലിന്റെ ഈ തുര്‍ക്കി വിരുദ്ധ നിലപാടുകള്‍ അങ്കാറ ഗൗരവമായാണ് എടുക്കുന്നത്. ' അറ്റ്‌ലാന്റിക് കൗണ്‍സിലിലെ നോണ്‍-റസിഡന്റ് ഫെലോ ഒമര്‍ ഓസ്‌കിസില്‍സിക് പറഞ്ഞതായി അല്‍ ജസീറ റിപ്പോര്‍ട്ട് ചെയ്യുന്നു. 

'ഇസ്‌റാഈല്‍ ആക്രമണത്തിന് പരിധികളില്ലെന്നും അമേരിക്കന്‍ പിന്തുണ അവര്‍ക്കുണ്ടെന്നും കൂടുതല്‍ കരുതലിലേക്കാണ് തുര്‍ക്കിയെ നയിക്കുന്നത്,' ഓസ്‌കിസില്‍സിക് കൂട്ടിച്ചേര്‍ത്തു.

ഖത്തറിനെതിരായ ആക്രമണങ്ങള്‍ നാറ്റോ സഖ്യകക്ഷിയെന്ന നിലയില്‍ യുഎസ് സുരക്ഷാ ഉറപ്പുകളെക്കുറിച്ചുള്ള അങ്കാറയുടെ സംശയങ്ങളെ അടിവരയിടുന്നു. വാഷിംഗ്ടണുമായി ദോഹയ്ക്ക് പ്രത്യേക സഖ്യകക്ഷി പദവി ഉണ്ടായിരുന്നിട്ടും, ഇസ്‌റാഈലിന് യുഎസില്‍ നിന്ന് പ്രത്യക്ഷമായ ഒരു തിരിച്ചടിയും നേരിടേണ്ടി വന്നില്ല.  ഇത് നാറ്റോ ചാര്‍ട്ടര്‍ അനുശാസിക്കുന്നതുപോലെ തുര്‍ക്കിയെയ്ക്കെതിരായ ഏതൊരു ആക്രമണത്തെയും യു.എസ് സ്വയം ആക്രമണമായി കാണുമോ എന്ന ചോദ്യത്തിനും  കാരണമായിട്ടുണ്ട്. സ്വന്തം ദേശീയ സുരക്ഷാ താല്‍പ്പര്യങ്ങള്‍ക്കായി യുഎസിനെയോ നാറ്റോയെയോ ആശ്രയിക്കാന്‍ കഴിയില്ലെന്ന് തുര്‍ക്കി വളരെ മുമ്പുതന്നെ മനസ്സിലാക്കിയിട്ടുണ്ടെന്നും അദ്ദേഹം ചൂണ്ടിക്കാട്ടുന്നു. 

tensions rise as speculation grows over whether israel may shift its focus to turkey in the evolving middle east conflict. analysts discuss the current state of israel-turkey relations.