ന്യൂഡൽഹി: ഇരുപതോളം വിദ്യാർഥിനികളെ ലൈംഗികമായി പീഡിപ്പിച്ച കേസിൽ ഒളിവിൽ കഴിയുന്ന ‘ആൾദൈവം’ ചൈതന്യാനന്ദ സരസ്വതിയെക്കുറിച്ചുള്ള ഞെട്ടിക്കുന്ന വിവരങ്ങൾ പുറത്തുവരുന്നു. ഡൽഹി ആസ്ഥാനമായി പ്രവർത്തിച്ചിരുന്ന ചൈതന്യാനന്ദ സരസ്വതി, താൻ പ്രശസ്ത എഴുത്തുകാരനും മാനേജ്മെന്റ് ഗുരുവുമാണെന്ന് അവകാശപ്പെട്ടിരുന്നു. എന്നാൽ, അദ്ദേഹത്തിന്റെ അക്കാദമിക് യോഗ്യതകളും മറ്റ് അവകാശവാദങ്ങളും വ്യാജമാണെന്നാണ് ഡൽഹി പൊലിസിന്റെ സംശയം.

ALSO READ: മോശമായ സ്പർശനം, അശ്ലീല സന്ദേശങ്ങൾ; സ്വാമി ചൈതന്യാനന്ദ സരസ്വതിക്കെതിരെ 17 വിദ്യാർത്ഥിനികളുടെ ലൈംഗികാതിക്രമ പരാതി

അക്കാദമിക് ഗവേഷണ പ്ലാറ്റ്ഫോമുകളിലെ പ്രൊഫൈലിൽ, ഷിക്കാഗോ സർവകലാശാലയിലെ ബൂത്ത് സ്കൂൾ ഓഫ് ബിസിനസിൽ നിന്ന് എംബിഎയും പിഎച്ച്‌ഡിയും നേടിയതായി ചൈതന്യാനന്ദ അവകാശപ്പെടുന്നു. കൂടാതെ, പോസ്റ്റ്-ഡോക്ടറൽ ഗവേഷണവും ഡി.ലിറ്റ് ബിരുദവും പൂർത്തിയാക്കിയതായും, ഇന്ത്യയിലും വിദേശത്തുമുള്ള സർവകലാശാലകളിൽ നിന്ന് ഏഴ് ഓണററി ഡി.ലിറ്റ് ബിരുദങ്ങൾ ലഭിച്ചതായും അവകാശവാദമുണ്ട്. ഇ-കൊമേഴ്സ് പ്ലാറ്റ്ഫോമുകളിൽ ലഭ്യമായ അദ്ദേഹത്തിന്റെ പുസ്തകങ്ങളിലും ഈ വിവരങ്ങൾ ആവർത്തിക്കുന്നു.
28 പുസ്തകങ്ങളും 143 ഗവേഷണ പ്രബന്ധങ്ങളും രചിച്ച ‘അന്താരാഷ്ട്ര പ്രശസ്തനായ എഴുത്തുകാരൻ’ എന്നാണ് ചൈതന്യാനന്ദ തന്റെ പുസ്തകങ്ങളുടെ പുറംചട്ടയിൽ സ്വയം വിശേഷിപ്പിക്കുന്നത്. ‘ഫോർഗെറ്റ് ക്ലാസ്റൂം ലേണിംഗ്’ എന്ന പുസ്തകത്തിന് ആപ്പിൾ സ്ഥാപകൻ സ്റ്റീവ് ജോബ്സ് ആമുഖം എഴുതിയതായി പുസ്തകത്തിന്റെ മുൻപേജിൽ ഉദ്ധരിക്കുന്നു. ഈ പുസ്തകം ‘മാനേജ്മെന്റിന്റെ പ്രായോഗിക ലോകത്തേക്കുള്ള അഭൂതപൂർവമായ വഴികാട്ടി’ എന്നാണ് ജോബ്സ് വിശേഷിപ്പിച്ചതായി അവകാശപ്പെടുന്നു.

മുൻ യുഎസ് പ്രസിഡന്റ് ബരാക് ഒബാമ തന്റെ തിരഞ്ഞെടുപ്പ് പ്രചാരണ വേളയിൽ ‘ട്രാൻസ്ഫോർമിങ് പേഴ്സണാലിറ്റി’ എന്ന പുസ്തകത്തെ ആവർത്തിച്ച് പരാമർശിച്ചതായും, 2007-ൽ യൂറോപ്പിലും വടക്കേ അമേരിക്കയിലും ഏറ്റവും കൂടുതൽ വിറ്റഴിക്കപ്പെട്ട പുസ്തകങ്ങളിൽ ഒന്നായിരുന്നു ഇതെന്നും ചൈതന്യാനന്ദയുടെ പ്രൊഫൈലിൽ അവകാശപ്പെടുന്നു. ഐക്യരാഷ്ട്രസഭയുടെ മുൻ സെക്രട്ടറി ജനറൽ ബാൻ കി മൂണിന്റെ അഭിനന്ദന സന്ദേശവും പുസ്തകത്തിൽ ഉൾപ്പെടുത്തിയിട്ടുണ്ട്.

‘ഗ്രന്ഥകർത്താവിനെക്കുറിച്ച്’ എന്ന ഭാഗത്ത്, ചൈതന്യാനന്ദയെ ‘പ്രഗത്ഭനായ പ്രൊഫസർ, പ്രശസ്തനായ എഴുത്തുകാരൻ, പ്രഭാഷകൻ, വിദ്യാഭ്യാസ വിചക്ഷണൻ, ആത്മീയ തത്ത്വചിന്തകൻ, മനുഷ്യസ്നേഹി, ഇന്ത്യയിലും വിദേശത്തും മാനേജ്മെന്റ് അക്കാദമിക് രംഗത്തെ പ്രമുഖ വ്യക്തിത്വം’ എന്നാണ് വിശേഷിപ്പിക്കുന്നത്. എന്നാൽ, ഈ അവകാശവാദങ്ങളിൽ ഭൂരിഭാഗവും വ്യാജമാണെന്ന് പൊലിസ് വിശ്വസിക്കുന്നു.
വസന്ത് കുഞ്ചിലെ ശ്രീ ശാർദ ഇൻസ്റ്റിറ്റ്യൂട്ട് ഓഫ് ഇന്ത്യൻ മാനേജ്മെന്റിന്റെ മുൻ ഡയറക്ടറായിരുന്ന ചൈതന്യാനന്ദ, ഈ സ്ഥാപനത്തിലെ വിദ്യാർഥിനികളെ ലൈംഗികമായി പീഡിപ്പിച്ചെന്ന ആരോപണത്തെ തുടർന്ന് ഒളിവിലാണ്. രാജ്യം വിടുന്നത് തടയാൻ ഡൽഹി പൊലിസ് ലുക്കൗട്ട് സർക്കുലർ പുറപ്പെടുവിച്ചിട്ടുണ്ട്. ഏകദേശം രണ്ട് ദശകത്തോളം ഇയാൾ സ്ത്രീകളെ ഉപദ്രവിച്ചതായും, 2009, 2016 വർഷങ്ങളിൽ പീഡനക്കുറ്റത്തിന് കേസുകൾ രജിസ്റ്റർ ചെയ്തിരുന്നതായും പൊലിസ് വെളിപ്പെടുത്തി.

നിലവിൽ, ചൈതന്യാനന്ദയുടെ അക്കാദമിക് യോഗ്യതകളുടെയും മറ്റ് അവകാശവാദങ്ങളുടെയും സത്യാവസ്ഥ പരിശോധിക്കാൻ വിശദമായ അന്വേഷണം നടക്കുകയാണ്.