മംഗളൂരു: കഞ്ചാവ് വില്‍പ്പന കേസില്‍ മംഗളൂരുവില്‍ 11 മലയാളി വിദ്യാര്‍ഥികള്‍ പിടിയില്‍. ആദ്യത്ത് ശ്രീകാന്ത്, മുഹമ്മദ് അഫ്രിന്‍, മുഹമ്മദ് സ്മാനിദ്, നിബിന്‍ കുര്യന്‍, കെകെ മുഹമ്മദ്, മുഹമ്മദ് ഹനാന്‍, മുഹമ്മദ് ഷാമില്‍, അരുണ്‍ തോമസ്, സി മുഹമ്മദ് നിഹാല്‍, വി മുഹമ്മദ് ജസീല്‍, പി സിദാന്‍ എന്നിവരെയാണ് സൗത്ത് പൊലിസ് സ്റ്റേഷന്‍ ക്രൈം ഡിറ്റക്ഷന്‍ സ്‌ക്വാഡ് അറസ്റ്റ് ചെയ്തത്. രഹസ്യ വിവരത്തെ തുടര്‍ന്ന് നടത്തിയ അന്വേഷണത്തിലാണ് വിദ്യാര്‍ഥികള്‍ പിടിയിലായത്. 

നഗരത്തിലെ കോളജിലെ രണ്ടാം വര്‍ഷ ബിബിഎ വിദ്യാര്‍ഥികളാണ് അറസ്റ്റിലായത്. റെയ്ഡിനിടെ ഏഴ് പാക്കറ്റുകളില്‍ നിറച്ച 12.264 കിലോ കഞ്ചാവ് ഇവരുടെ പക്കല്‍ നിന്നും പിടികൂടി. മാര്‍ക്കറ്റില്‍ ഏകദേശം രണ്ടര ലക്ഷത്തിന് അടുത്താണ് ഇതിന്റെ വിലയെന്ന് പൊലിസ് പറഞ്ഞു. വിദ്യാര്‍ഥികളുടെ പക്കല്‍ നിന്നും പണമുള്‍പ്പെടെ മൂന്നര ലക്ഷം രൂപയുടെ മുതല്‍ പിടിച്ചെടുത്തെന്നും പൊലിസ് അറിയിച്ചു. 

അതേസമയം കേരളത്തില്‍ നിന്നുള്ള ഒരുകൂട്ടം വിദ്യാര്‍ഥികള്‍ അത്താവറിലെ കപ്രിഗുഡ്ഡെ പള്ളിക്ക് സമീപമുള്ള കിങ് കോര്‍ട്ട് അപ്പാര്‍ട്ട്‌മെന്റ് കേന്ദ്രീകരിച്ച് കഞ്ചാവ് വില്‍പ്പന നടത്തുന്നുണ്ടെന്ന വിവരമാണ് പൊലിസിന് ലഭിച്ചത്. ക്രൈം ഡിറ്റക്ഷന്‍ സ്‌ക്വാഡ് ഹെഡ് പൊലിസ് കോണ്‍സ്റ്റബിള്‍ പുത്തരം സിഎച്ച്, കോണ്‍സ്റ്റബിള്‍ മല്ലിക് ജോണ്‍ എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.

ALSO READ: തമിഴ്നാട്ടിൽ വിജയ്‌യുടെ റാലിക്കിടെ വൻ ദുരന്തം: മരണസംഖ്യ 31 ആയി; മരിച്ചവരിൽ കുട്ടികളും