കൊളംബോ: ഏഷ്യാ കപ്പ് ക്രിക്കറ്റ് ടൂർണമെന്റിൽ പുരുഷ ടീം കിരീടം ചൂടിയതിന്റെ ആഘോഷം മാറും മുൻപ് ഇന്ത്യൻ വനിതാ ക്രിക്കറ്റ് ടീം ഏകദിന ലോകകപ്പ് പോരാട്ടങ്ങൾക്കായി ഇന്ന് കളത്തിലിറങ്ങുന്നു. ഇന്ന് ഉച്ചക്ക് ശേഷം മൂന്ന് മണിക്ക് നടക്കുന്ന ഉദ്ഘാടന മത്സരത്തിൽ ശ്രീലങ്കയെയാണ് ഇന്ത്യൻ വനിതകൾ നേരിടുന്നത്. 

ശ്രീലങ്കയും ഇന്ത്യയും സംയുക്താമയാണ് ടൂർണമെന്റിന് വേദിയൊരുക്കുന്നത്. പ്രാഥമികഘട്ട മത്സരങ്ങൾ ശ്രീലങ്കയിലും ബാക്കി മത്സരങ്ങൾ ഇന്ത്യയിലുമാണ് നടക്കുന്നത്. ആസ്‌ത്രേലിയ, ബംഗ്ലാദേശ്, ഇംഗ്ലണ്ട്, ന്യൂസിലൻഡ്, പാകിസ്ഥാൻ, ദക്ഷിണാഫ്രിക്ക, ശ്രീലങ്ക തുടങ്ങിയ ടീമുകളാണ് ലോക കിരീടം തേടി കളത്തിലിറങ്ങുന്നത്. 

ഞായറാഴ്ച ഇന്ത്യ, പാകിസ്ഥാൻ വനിതകളെയും നേരിടുന്നുണ്ട്. ലോകകപ്പിന് മുന്നോടിയായി ഇന്ത്യൻ വനിതകൾ ആസ്‌ത്രേലിയക്കെതിരേ ഏകദിന പരമ്പര കളിച്ചിരുന്നു. പരമ്പര 2-1ന് നഷ്ടായെങ്കിലും ഓസീസിനെതിരേ മികച്ച പ്രകടനം നടത്താൻ ഇന്ത്യൻ വനിതകൾക്ക് കഴിഞ്ഞു. അതിന് ശേഷം ഇംഗ്ലണ്ടുമായി ഇന്ത്യ വാം അപ് മത്സരം കളിച്ചെങ്കിലും മത്സരത്തിൽ ഇന്ത്യ 152 റൺസിന്റെ വലിയ തോൽവി ഏറ്റുവാങ്ങിയുരുന്നു. എന്നിരുന്നാലും ടൂർണമെന്റിലെ ആദ്യ മത്സരത്തിൽ ആതിഥേയരെ തോൽപ്പിച്ച് അരങ്ങേറ്റം ഗംഭീരമാക്കാൻ വേണ്ടിയാണ് ഹർമൻപ്രീത് കൗറും സംഘവും കളത്തിലിറങ്ങുന്നത്. 

ഓപണർ സ്മൃതി മന്ഥനയുടെ ഫോം തന്നെയാണ് ഇന്ത്യക്ക് പ്രതീക്ഷ. ബൗളർമാരും അവസരത്തിനൊത്ത് ഉയർന്നാൽ ആദ്യ മത്സരത്തിൽ വെന്നിക്കൊടി പാറിക്കാൻ കഴിയുമെന്ന പ്രതീക്ഷയിലാണ് ഇന്ത്യൻ സംഘം.