തിരുവനന്തപുരം: മോഷണക്കേസില്‍ പൊലിസ് പിടികൂടി സ്റ്റേഷനിലേക്ക് കൊണ്ടുവരവെ കൈവിലങ്ങുമായി രക്ഷപ്പെട്ട പ്രതികളായ പിതാവും മകനും പിടിയില്‍. പാലോട് പൊലിസ് രജിസ്റ്റര്‍ ചെയ്ത കേസിലെ പ്രതികളായ അയൂബ് ഖാന്‍, മകന്‍ സെയ്തലവി എന്നിവരെയാണ് വയനാട് മേപ്പാടിയില്‍ നിന്നും പിടികൂടിയത്. 

ഒരാഴ്ച മുമ്പ് പാലോട് പൊലിസ് സ്റ്റേഷന്‍ പരിധിയില്‍ എട്ടോളം വ്യാപാര സ്ഥാപനങ്ങളില്‍ കവര്‍ച്ച നടന്നിരുന്നു. അന്വേഷണത്തില്‍ ഒരു ചുവപ്പ് കാര്‍ കവര്‍ച്ച നടന്ന ദിവസം പകല്‍ സമയങ്ങളില്‍ സ്ഥാപനങ്ങളുടെ പരിസരത്ത് പലതവണ എത്തി നിരീക്ഷിച്ചതായി കണ്ടെത്തി. ഈ കാര്‍ കേന്ദ്രീകരിച്ചു നടത്തിയ അന്വേഷണത്തിലാണ് അയൂബ് ഖാന്‍, മകന്‍ സെയ്തലവി എന്നിവരാണ് കവര്‍ച്ചയ്ക്ക് പിന്നിലെന്ന് പൊലിസ് തിരിച്ചറിഞ്ഞത്. 

ALSO READ: മൂത്രമൊഴിക്കാനുണ്ടെന്ന് പറഞ്ഞു; വാഹനം നിര്‍ത്തി പുറത്തിറക്കിയതോടെ പൊലിസ് കസ്റ്റഡിയില്‍ നിന്ന് വിലങ്ങുമായി ഇറങ്ങിയോടി പ്രതികള്‍

അന്വേഷണത്തിനിടെ ഇവര്‍ വയനാട് സുല്‍ത്താന്‍ ബത്തേരിയില്‍ ഉണ്ടെന്ന് മനസിലാക്കിയ പൊലിസ് ശനിയാഴ്ച രാത്രിയോടെ ഇവിടെ എത്തി ഇരുവരെയും പിടികൂടുകയും കവര്‍ച്ചയ്ക്കായി ഉപയോഗിച്ച കാര്‍ കസ്റ്റഡിയില്‍ എടുക്കുകയും ചെയ്തിരുന്നു. തിരിച്ചുവരുന്നതിനിടെ കടയ്ക്കല്‍ പൊലിസ് സ്റ്റേഷന്‍ പരിധിയിലെ ചുണ്ട ചെറുകുളം ഭാഗത്തെത്തിയപ്പോള്‍ പ്രതികളിലൊരാള്‍ മൂത്രമൊഴിക്കണമെന്ന് ആവശ്യപ്പെട്ടു. 

ഇതുപ്രകാരം വാഹനം നിര്‍ത്തി പുറത്തേക്കിറങ്ങിയ പ്രതികള്‍ കൈവിലങ്ങുമായി ഇരുട്ടിലേക്ക് ഓടി മറയുകയായിരുന്നു. പ്രദേശത്ത് വ്യാപകമായി പരിശോധന നടത്തിയെങ്കിലും ഞായറാഴ്ച വൈകിയും പ്രതികളെ പിടികൂടാന്‍ കഴിഞ്ഞിരുന്നില്ല. ഉച്ചയോടെ ഡ്രോണുകള്‍ എത്തിച്ചും വ്യാപക പരിശോധന നടത്തിയിരുന്നു. വൈകിട്ടോടെ കൊല്ലത്ത് നിന്നു ഡോഗ് സ്‌ക്വാഡും സ്ഥലത്തെത്തിയിരുന്നു.

English Summary: Two robbery suspects, Ayub Khan and his son Saitalavi, who escaped from Pallode police custody while still in handcuffs, have been captured in Meppadi, Wayanad. The duo had been arrested in connection with a series of theft incidents at around eight shops in the Pallode area last week.