തിരുവനന്തപുരം: സംസ്ഥാനത്തെ സ്‌കൂള്‍ പാഠ്യപദ്ധതി പരിഷ്‌കരണവുമായി ബന്ധപ്പെട്ട് പാഠപുസ്തക രചനയിലും പരിശീലന മൊഡ്യൂളുകള്‍ തയാറാക്കുന്നതിലും പങ്കെടുത്ത അധ്യാപകർക്ക് അലവന്‍സോ യാത്രാപ്പടിയോ നല്‍കാന്‍ തയാറാകാതെ എസ്.സി.ഇ.ആര്‍.ടി. അലവൻസ് വിതരണം ചെയ്തിട്ട് രണ്ടുവർഷമായി. അഞ്ചുകോടിയുടെ കുടിശ്ശികയാണ് നിലവിലുള്ളത്. അധ്യാപകര്‍, വിഷയവിദഗ്ധര്‍, പാഠപുസ്തക ചെയര്‍മാന്‍ എന്നിവര്‍ക്കാണ്  രണ്ടുവർഷമായി ആനുകൂല്യങ്ങൾ ലഭിക്കാത്തത്.

അധ്യാപകര്‍ക്കുള്ള കൈപ്പുസ്തകം, പരിശീലനത്തിനുള്ള മൊഡ്യൂള്‍ എന്നിവ തയാറാക്കുന്നതും സംസ്ഥാനതലം മുതല്‍ അധ്യാപക പരിശീലനത്തിന് നേതൃത്വം നല്‍കുന്നതുമായ 800ല്‍ അധികം അധ്യാപകരാണ് രണ്ടുവർഷമായി പാഠപുസ്തക രചനയിൽ പങ്കെടുത്തിരുന്നത്. അലവൻസ് അനുവദിക്കാത്തതിൽ പ്രതിഷേധിച്ച് അധ്യാപക സഹായികളുടെ രചനാപ്രവര്‍ത്തനങ്ങളില്‍ നിന്ന് വിട്ടുനിന്ന് അടുത്തിടെ പ്രതിഷേധിച്ചിരുന്നു.  ഇതുകാരണം അധ്യാപക സഹായികള്‍ യഥാസമയം വിതരണം ചെയ്യാനായിട്ടില്ല. ഇത് അക്കാദമിക പ്രവര്‍ത്തനങ്ങളെയും വിദ്യാര്‍ഥികളുടെ പഠന നിലവാരത്തെയും ദോഷകരമായി ബാധിക്കുന്നുണ്ട്.

അക്കാദമികവര്‍ഷം പകുതിയിലേറെ പിന്നിട്ടിട്ടും പത്താം ക്ലാസിലെ ഗണിതശാസ്ത്രത്തിന് അഞ്ച് യൂനിറ്റിന് പകരം മൂന്ന് യൂനിറ്റിന്റെ അധ്യാപക സഹായികള്‍ മാത്രമാണ് പ്രസിദ്ധീകരിച്ചിട്ടുള്ളത്. ഫണ്ട് വാങ്ങിയെടുക്കുന്നതിലും അനുവദിച്ച ഫണ്ടിന്റെ കണക്കുകള്‍ ധനവകുപ്പില്‍ സമര്‍പ്പിക്കുന്നതിലും എസ്.സി.ഇ.ആര്‍.ടിയുടെ ഫിനാന്‍സ് വിഭാഗം അനാസ്ഥ കാണിച്ചതാണ് പ്രതിസന്ധിക്ക് കാരണമായി പറയുന്നത്. സ്റ്റാര്‍സ് (STARS) പ്രൊജക്റ്റില്‍ നിന്ന് മൊഡ്യൂള്‍ നിര്‍മാണത്തിനായി അനുവദിച്ച രണ്ടേകാല്‍ കോടി രൂപ പോലും കഴിഞ്ഞ അഞ്ചുമാസമായി വിതരണം ചെയ്തിട്ടില്ല.

കഴിഞ്ഞ ഏപ്രിലിൽ കുടിശ്ശിക ഘട്ടംഘട്ടമായി വിതരണം ചെയ്യുമെന്ന് എസ്.സി.ഇ.ആര്‍.ടി ഡയരക്ടര്‍ ഉറപ്പുനല്‍കിയിരുന്നെങ്കിലും അഞ്ചുമാസമായിട്ടും പാലിക്കപ്പെട്ടില്ല. കുടിശ്ശികയുമായി ബന്ധപ്പെട്ട് പ്രത്യക്ഷ സമരപരിപാടികളിലേക്കും നിയമനടപടികളിലേക്കും പോകാന്‍ ഒരുങ്ങുകയാണ് പാഠപുസ്തക രചനയില്‍ പങ്കെടുത്ത അധ്യാപകര്‍.