തിരുവനന്തപുരം: ശബരിമല സ്വർണപ്പാളി വിവാദത്തെ തുടർന്നുണ്ടായ പ്രതിപക്ഷ പ്രതിഷേധങ്ങളാൽ നിയമസഭാ സമ്മേളനം തുടർച്ചയായി സ്തംഭിച്ച സാഹചര്യത്തിൽ, നാളെ  സമ്മേളനം അവസാനിപ്പിക്കാൻ നീക്കം. മറ്റന്നാൾ വരെ നീട്ടാൻ നിശ്ചയിച്ചിരുന്ന സഭാ സമ്മേളനം ഒരു ദിവസം നേരത്തെ അവസാനിപ്പിക്കാനാണ് ആലോചന. ഇതുസംബന്ധിച്ച അന്തിമ തീരുമാനം നാളെ രാവിലെ ഉണ്ടാകുമെന്നാണ് വിവരം.

കഴിഞ്ഞ മൂന്ന് ദിവസങ്ങളായി ശബരിമല സ്വർണപ്പാളി വിവാദത്തിൽ പ്രതിപക്ഷം നടത്തുന്ന ശക്തമായ പ്രതിഷേധങ്ങളാണ് സഭാ നടപടികൾ തടസ്സപ്പെടുത്തുന്നത്. വിഷയത്തിൽ മുഖ്യമന്ത്രി പിണറായി വിജയനെതിരെ രൂക്ഷ വിമർശനവുമായി പ്രതിപക്ഷ നേതാവ് വി.ഡി. സതീശൻ ഇന്ന് രംഗത്തെത്തി. "മൂന്ന് ദിവസമായി ഞങ്ങൾ നിയമസഭയിൽ സമരം നടത്തുകയാണ്. ഈ സമയം മുഖ്യമന്ത്രി എവിടെയായിരുന്നു? ഒരു പത്രസമ്മേളനം നടത്തി സർക്കാർ തങ്ങളുടെ വിശദീകരണം നൽകേണ്ടതല്ലേ? അത് ചെയ്തോ?" എന്ന് സതീശൻ ചോദിച്ചു.

നിയമസഭയ്ക്ക് അകത്തും പുറത്തും പ്രതിഷേധം തുടരുമെന്നും ഈ വിഷയത്തിൽ ഇനി ചർച്ച ആവശ്യമില്ലെന്നും അദ്ദേഹം വ്യക്തമാക്കി. "ദ്വാരപാലക ശിൽപം മാത്രമല്ല, കട്ടിളപ്പാളിയും വാതിലും അടക്കം അടിച്ചുമാറ്റിയിരിക്കുന്നു. രണ്ടാമതായി, സർക്കാർ ഉണ്ണികൃഷ്ണൻ പോറ്റിയെ വിളിച്ചുവരുത്തി. വീണ്ടും കവർച്ചയ്ക്ക് വേണ്ടിയാണ്. ഇത്തവണ അയ്യപ്പ വിഗ്രഹം കൂടി കൊണ്ടുപോകാനായിരുന്നു പദ്ധതി," എന്നും വി.ഡി. സതീശൻ ആരോപിച്ചു.നാളെയും പ്രതിപക്ഷത്തിന്റെ പ്രതിഷേധം തുടരാനാണ് സാധ്യത, ഇത് സഭാ നടപടികളെ വീണ്ടും സ്തംഭിപ്പിച്ചേക്കും.