കോഴിക്കോട്: നരിക്കുനി, പുല്ലാളൂർ പരപ്പാറ ചെരച്ചോറമീത്തൽ റിയാസിന്റെ ഭാര്യ സുനീറ (40) ഇടിമിന്നലേറ്റ് മരിച്ചു. വീടിന്റെ വരാന്തയിൽ ഇരിക്കവേയാണ് അപകടം സംഭവിച്ചത്. മൃതദേഹം കോഴിക്കോട് മെഡിക്കൽ കോളേജ് ആശുപത്രിയിലാണ്. അതേസമയം കോഴിക്കോട് ജില്ലയിലെ മലയോര മേഖലകളിലും നഗരപ്രദേശങ്ങളിലും വൈകിട്ട് കനത്ത മഴ പെയ്തു. പലയിടങ്ങളിൽ വെള്ളക്കെട്ട് രൂപപ്പെട്ടിട്ടുണ്ട്. ഇടിമിന്നലിനെ തുടർന്ന് ജില്ലയിൽ രണ്ടിലേറെ വീടുകൾക്ക് കേടുപാടുകളും സംഭവിച്ചതായി റിപ്പോർട്ട് സൂചിപ്പിക്കുന്നു.

കേന്ദ്ര കാലാവസ്ഥ വകുപ്പിന്റെ മുന്നറിയിപ്പ് പ്രകാരം, കേരളത്തിൽ ബുധനാഴ്ച വരെ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വേഗതയിൽ ശക്തമായ കാറ്റിനും സാധ്യതയുണ്ട്. ഇതിന്റെ പശ്ചാത്തലത്തിൽ പൊതുജനങ്ങൾക്ക് ജാഗ്രതാ നിർദേശം പുറപ്പെടുവിച്ചിട്ടുണ്ട്.

ALSO READ: കഴക്കൂട്ടം പീഡനശ്രമം: പ്രതിയെ തിരിച്ചറിഞ്ഞതായി സൂചന, ഇതര സംസ്ഥാനക്കാരനെ കേന്ദ്രീകരിച്ചും അന്വേഷണം 

ഇടിമിന്നൽ: മുൻകരുതലുകൾ

ഇടിമിന്നൽ മനുഷ്യർക്കും മൃഗങ്ങൾക്കും ജീവഹാനി വരുത്തുകയും വൈദ്യുത-ആശയവിനിമയ ശൃംഖലകൾക്കും ഗൃഹോപകരണങ്ങൾക്കും കേടുപാടുകൾ സൃഷ്ടിക്കുകയും ചെയ്യും. അതിനാൽ, കാർമേഘം കണ്ടു തുടങ്ങുമ്പോൾ മുതൽ താഴെ പറയുന്ന മുൻകരുതലുകൾ സ്വീകരിക്കണം

സുരക്ഷിത സ്ഥലം തേടുക: ഇടിമിന്നലിന്റെ ആദ്യ ലക്ഷണം കണ്ടാൽ ഉടൻ കെട്ടിടത്തിനുള്ളിലേക്ക് മാറുക. തുറസായ സ്ഥലങ്ങളിൽ നിൽക്കുന്നത് അപകടകരമാണ്

വീടിനുള്ളിൽ ജാഗ്രത: ജനലുകളും വാതിലുകളും അടച്ചിടുക. ഭിത്തിയിലോ തറയിലോ സ്പർശിക്കാതിരിക്കാൻ ശ്രദ്ധിക്കുക. വൈദ്യുതോപകരണങ്ങളുടെ ബന്ധം വിച്ഛേദിക്കുക.

ഫോൺ ഉപയോഗം: ലാൻഡ്‌ലൈൻ ഫോൺ ഉപയോഗിക്കുന്നത് ഒഴിവാക്കുക. മൊബൈൽ ഫോൺ ഉപയോഗിക്കുന്നതിൽ തടസമില്ല.
തുറസായ സ്ഥലങ്ങളിൽ: കുട്ടികൾ ഉൾപ്പെടെ, ടെറസിലോ മൈതാനങ്ങളിലോ കളിക്കുന്നത് ഒഴിവാക്കുക. വൃക്ഷങ്ങളുടെ ചുവട്ടിൽ നിൽക്കരുത്. വാഹനങ്ങൾ മരച്ചുവട്ടിൽ പാർക്ക് ചെയ്യുകയുമരുത്.

വാഹന യാത്ര: ഇടിമിന്നലുള്ളപ്പോൾ വാഹനത്തിനുള്ളിൽ തുടരുക. സൈക്കിൾ, ബൈക്ക്, ട്രാക്ടർ എന്നിവയിലെ യാത്ര ഒഴിവാക്കി സുരക്ഷിതമായ കെട്ടിടത്തിൽ അഭയം തേടുക.

ജലാശയങ്ങൾ: മിന്നലുള്ള സമയത്ത് ജലാശയങ്ങളിൽ മീൻപിടിക്കാനോ കുളിക്കാനോ ഇറങ്ങരുത്. മത്സ്യബന്ധനവും ബോട്ടിങും ഉടൻ നിർത്തി കരയിലേക്ക് മാറുക

ALSO READ: അതിശക്തമായ മഴയ്ക്ക് സാധ്യത: വിവിധ ജില്ലകളില്‍ ഇന്നും നാളെയും ഓറഞ്ച്, യെല്ലോ അലര്‍ട്ട്, ജാഗ്രതാ നിര്‍ദേശം

മറ്റ് മുൻകരുതലുകൾ 

മഴക്കാറ് കണ്ടാൽ തുണി എടുക്കാൻ ടെറസിലേക്കോ മുറ്റത്തേക്കോ പോകരുത്. കുളിക്കുന്നതും ടാപ്പിൽ നിന്ന് വെള്ളം ശേഖരിക്കുന്നതും ഒഴിവാക്കുക. പട്ടം പറത്തുന്നതും നിർത്തിവയ്ക്കുക.

അടിയന്തര സാഹചര്യങ്ങൾ 

ഇടിമിന്നലേറ്റാൽ പൊള്ളൽ, കാഴ്ചയോ കേൾവിയോ നഷ്ടപ്പെടൽ, ഹൃദയാഘാതം എന്നിവ സംഭവിക്കാം. മിന്നലേറ്റ വ്യക്തിയുടെ ശരീരത്തിൽ വൈദ്യുതി അവശേഷിക്കില്ല. അതിനാൽ, ഉടൻ പ്രഥമ ശുശ്രൂഷ നൽകി വൈദ്യസഹായം എത്തിക്കണം. ആദ്യ 30 സെക്കൻഡ് ജീവൻ രക്ഷിക്കാനുള്ള നിർണായക നിമിഷങ്ങളാണ്.

സുരക്ഷാ ഉപകരണങ്ങൾ: കെട്ടിടങ്ങൾക്ക് മിന്നൽ രക്ഷാ ചാലകവും വൈദ്യുതോപകരണങ്ങൾക്ക് സർജ് പ്രൊട്ടക്ടറും ഘടിപ്പിക്കുന്നത് സുരക്ഷ വർധിപ്പിക്കും. ഇടിമിന്നലിന്റെ അപകടസാധ്യത കണക്കിലെടുത്ത് പൊതുജനങ്ങൾ ജാഗ്രത പാലിക്കണമെന്ന് അധികൃതർ അറിയിച്ചു.

A young woman, Suneera, wife of Riyas, died after being struck by lightning while sitting on the verandah of her home in Pullaloor, Kozhikode. Heavy rain and thunderstorms lashed the district, causing waterlogging and damage to several houses. The weather department has issued a caution advisory, predicting isolated thunderstorms and strong winds up to 40 kmph until Wednesday. Public urged to take precautions.