ദുബൈ: എമിറേറ്റ്‌സ് എയർലൈൻസ് നാളെ 40-ാം വാർഷികം ആഘോഷിക്കുകയാണ്. ഈ സാഹചര്യത്തിൽ എമിറേറ്റ്സിനെ അഭിന്ദിച്ച് രം​ഗത്തെത്തിയിരിക്കുകയാണ് യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം. "നാല് പതിറ്റാണ്ടുകൾ കൊണ്ട് ലോകമെമ്പാടുമുള്ള 860 ദശലക്ഷത്തിലധികം (86 കോടി) ജനങ്ങളെ വഹിച്ച ദേശീയ അഭിമാനം" എന്നാണ് ശൈഖ് മുഹമ്മദ് എമിറേറ്റിനെ വിശേഷിപ്പിച്ചത്.

വെള്ളിയാഴ്ച 'എക്സ്' ൽ ശൈഖ് മുഹമ്മദ് അറബിയിൽ ഒരു കുറിപ്പ് പങ്കുവെച്ചു. കുറിപ്പിൽ ഇങ്ങനെ പറയുന്നു. 

“40 വർഷങ്ങൾക്ക് മുമ്പ്, 1985 ഒക്ടോബർ 25-ന് എമിറേറ്റ്‌സ് എയർലൈൻസിൻ്റെ ആദ്യ വിമാനം പറന്നുയർന്നു. ഞങ്ങളുടെ വലിയ സ്വപ്നങ്ങളെയും പേറിയാണ് ആ യാത്ര തുടങ്ങിയത്. ഇന്ന്, എമിറേറ്റ്‌സ് ലോകത്തിലെ മുൻനിര എയർലൈനുകളിലൊന്നായി വളർന്നു. 152 നഗരങ്ങളുമായി നമ്മെ നേരിട്ട് ബന്ധിപ്പിക്കുന്നു. ആളുകളെ വഹിക്കുന്നതിനൊപ്പം അവരുടെ സ്വപ്നങ്ങളും അഭിലാഷങ്ങളും ദുബൈയിലേക്കും അവിടുന്ന് ലോകമെമ്പാടും എത്തിക്കുന്നു.” അദ്ദേഹം കുറിച്ചു. 

ALSO READ: അബൂദബി: ഷെയ്ഖ് സായിദ് ബിൻ സുൽത്താൻ റോഡിൽ വേരിയബിൾ സ്പീഡ് ലിമിറ്റ് സംവിധാനം; ഒക്ടോബർ 27 മുതൽ പ്രാബല്യത്തിൽ

ഈ 40 വർഷ കാലയളവിൽ എമിറേറ്റ്‌സ് 860 ദശലക്ഷത്തിലധികം യാത്രക്കാരെ ഭൂഖണ്ഡങ്ങൾ താണ്ടി എത്തിച്ചതായി അദ്ദേഹം വ്യക്തമാക്കി. “എമിറേറ്റ്‌സ് ഞങ്ങളുടെ ദേശീയ അഭിമാനത്തിൻ്റെ ചിഹ്നങ്ങളിൽ ഒന്നാണ്. ഞങ്ങളുടെ വികസന യാത്രയുടെ ഏറ്റവും പ്രധാനപ്പെട്ട ചാലകശക്തിയും ലോകത്തിലെ ഏറ്റവും പ്രധാനപ്പെട്ട വിമാനക്കമ്പനികളിലൊന്നുമാണിത്.” അദ്ദേഹം കൂട്ടിച്ചേർത്തു.

എമിറേറ്റ്‌സ് എയർലൈൻസിൻ്റെയും ഗ്രൂപ്പിൻ്റെയും ചെയർമാനും ചീഫ് എക്‌സിക്യൂട്ടീവുമായ ശൈഖ് അഹമ്മദ് ബിൻ സയീദ് അൽ മക്തൂമിനും എമിറേറ്റ്‌സിനെ സജീവമായി നിലനിർത്താൻ രാവും പകലും പ്രവർത്തിക്കുന്ന ജീവനക്കാർക്കും ശൈഖ് മുഹമ്മദ് ബിൻ റാഷിദ് നന്ദി രേഖപ്പെടുത്തി.

The Vice President and Prime Minister of the UAE and Ruler of Dubai, Sheikh Mohammed bin Rashid Al Maktoum, congratulated Emirates on its 40th anniversary, describing the airline as a "national pride" that has carried over 860 million people worldwide in four decades.