മനാമ: രാജ്യത്തെ സർക്കാരുമായി ബന്ധപ്പെട്ട സ്ഥാപനങ്ങളിൽ വിദേശ ജീവനക്കാരെ നിയമിക്കുന്നതിന് കർശന നിയന്ത്രണം ഏർപ്പെടുത്താൻ നീക്കം. ഇനിമുതൽ, ബഹ്‌റൈനൈസേഷൻ (സ്വദേശിവൽക്കരണം) നിയമങ്ങൾ എത്രത്തോളം പാലിക്കുന്നു എന്നതിനെ ആശ്രയിച്ചിരിക്കും വിദേശികളുടെ വർക്ക് വിസ പുതുക്കൽ ഉൾപ്പെടെയുള്ള കാര്യങ്ങൾ. എംപി ഡോ. മുനീർ സറൂർ അവതരിപ്പിച്ച ഈ സുപ്രധാന നിയമനിർമ്മാണ നിർദ്ദേശം നിലവിൽ പാർലമെന്റിന്റെ സർവീസസ് കമ്മിറ്റിയുടെ പരിഗണനയിലാണ്.

ALSO READ: യുഎഇയിൽ മധുര ​ഗന്ധജ്വരം; വൈറലായി ബബിൾ ഗത്തിന്റെയും ചീസ് കേക്കിന്റെയും മണമുള്ള പെർഫ്യൂമുകൾ  

വിസ പുതുക്കൽ ഇനി കമ്പനിയുടെ പ്രകടനത്തിനനുസരിച്ച്

ഭരണപരവും നേതൃപരവുമായ തസ്തികകളിൽ യോഗ്യരായ ബഹ്‌റൈൻ പൗരന്മാർക്ക് മുൻഗണന നൽകാനാണ് പദ്ധതിയിലൂടെ ലക്ഷ്യമിടുന്നത്. ഉന്നത തസ്തികകളിൽ വിദേശികൾ ദീർഘകാലം തുടരുന്നത് സ്വദേശികളുടെ വളർച്ചയ്ക്ക് തടസ്സമുണ്ടാക്കുന്നു എന്ന് നിർദ്ദേശത്തിൽ ചൂണ്ടിക്കാട്ടുന്നു.

പ്രധാന വ്യവസ്ഥകൾ:

വിസയും പുരോഗതിയും: വിദേശ ജീവനക്കാരുടെ വിസ പുതുക്കുന്നത്, കമ്പനി ബഹ്‌റൈനൈസേഷൻ ലക്ഷ്യങ്ങൾ കൈവരിക്കുന്നതിലെ പ്രകടനത്തെ ആശ്രയിച്ചിരിക്കും. അനുയോജ്യരായ സ്വദേശികൾ ലഭ്യമല്ലാത്ത സാഹചര്യങ്ങളിൽ മാത്രമേ താത്കാലിക ഇളവുകൾ അനുവദിക്കൂ.

ദേശീയ ഡാറ്റാബേസ്: ഒഴിവുകൾ ഉണ്ടാകുമ്പോൾ, ആദ്യം പരിഗണിക്കുന്നതിനായി യോഗ്യതയുള്ള ബഹ്‌റൈനികളുടെ അനുഭവപരിചയവും വൈദഗ്ധ്യവും രേഖപ്പെടുത്തിയ ഒരു ദേശീയ ഡാറ്റാബേസ് സ്ഥാപിക്കും.

റിപ്ലേസ്‌മെന്റ് പ്ലാൻ: ഓരോ സ്ഥാപനവും മധ്യനിര മാനേജ്‌മെന്റ് മുതൽ ഉയർന്ന തസ്തികകൾ വരെ സ്വദേശിവൽക്കരണ അനുപാതം വർദ്ധിപ്പിക്കുന്നതിനായി വ്യക്തമായ വാർഷിക ലക്ഷ്യങ്ങളുള്ള ഒരു പദ്ധതി (Internal Replacement Plan) നിലനിർത്തണം.

ALSO READ: 'ഞാൻ എന്നിലേക്ക് തിരികെ എത്തിയത് ഇവിടെ വെച്ച്, ഇത് ശരിയായ ദിശയിൽ സഞ്ചരിക്കുന്ന ന​ഗരം'; ദുബൈ ന​ഗരത്തെ പ്രശംസിച്ച് ചേതൻ ഭ​ഗത് 

നിയമം പാലിക്കുന്നവർക്ക് പ്രോത്സാഹനം

നിയമം കൃത്യമായി പാലിക്കുന്ന സ്ഥാപനങ്ങൾക്ക് സർക്കാർ പ്രോത്സാഹനങ്ങൾ വാഗ്ദാനം ചെയ്യുന്നുണ്ട്. വിദഗ്ദ്ധരായ സാങ്കേതിക തൊഴിലാളികളെ എളുപ്പത്തിൽ നിയമിക്കാനുള്ള സൗകര്യവും തിരഞ്ഞെടുക്കപ്പെട്ട സർക്കാർ ഫീസുകളിൽ ഇളവും ഇതിൽ ഉൾപ്പെടുന്നു. പദ്ധതിയുടെ നടത്തിപ്പ് നിരീക്ഷിക്കാനും ഭരണപരവും നേതൃപരവുമായ തസ്തികകളിലെ സ്വദേശിവൽക്കരണം സംബന്ധിച്ച് വാർഷിക റിപ്പോർട്ടുകൾ പ്രസിദ്ധീകരിക്കാനും ഒരു ദേശീയ ഫോളോ-അപ്പ് കമ്മിറ്റിയും രൂപീകരിക്കും.

പരിശീലനം ലഭിച്ച സ്വദേശികൾ തൊഴിൽ വിപണിയിലുണ്ട്. പക്ഷേ അവർക്ക് മുന്നോട്ട് പോകാൻ വഴിയില്ലായിരുന്നു. ഈ നീക്കം വിദേശികളോടുള്ള വെല്ലുവിളിയല്ല, രാജ്യത്തെ പൗരന്മാരിലുള്ള വിശ്വാസത്തിന്റെ പ്രതിഫലനമാണ്. പഴയപടി മുന്നോട്ട് പോകാൻ ഇനി കമ്പനികൾക്ക് കഴിയില്ല. അധികൃതർ വ്യക്തമാക്കി. പ്രധാന സാമ്പത്തിക മേഖലകളുടെ നേതൃത്വം സ്വദേശികൾക്ക് കൈമാറുക എന്ന പൊതു ലക്ഷ്യം നേടാനുള്ള നിർണായക ചുവടുവെപ്പായാണ് ഈ നിയമനിർമ്മാണ നീക്കത്തെ വിദഗ്ധർ കാണുന്നത്.

bahrain's parliament is reviewing a proposal to make work visa renewal for expatriates in state-linked firms dependent on strict bahrainisation targets, prioritizing qualified nationals for leadership and administrative roles.