ജർമ്മൻ ആഡംബര വാഹന നിർമ്മാതാക്കളായ പോർഷയുടെ ശ്രദ്ധേയ മോഡലുകളിലൊന്നായ പനമേരയെ (Panamera) രാജ്യത്ത് തിരിച്ചുവിളിക്കുന്നു. സുരക്ഷാ പ്രശ്‌നങ്ങളെ തുടർന്നാണ് കമ്പനിയുടെ നടപടി. ഏറ്റവും കൂടുതൽ ഡിമാൻഡുള്ള ഈ സ്പോർട്സ് കാറിലെ എയർബാഗുമായി ബന്ധപ്പെട്ട സുരക്ഷാ തകരാറാണ് വാഹനങ്ങൾ തിരിച്ചുവിളിക്കാൻ കാരണം. 2023 ജൂലൈ 19-നും 2025 സെപ്റ്റംബർ രണ്ടിനും ഇടയിൽ നിർമ്മിച്ച പനമേരയുടെ 158 യൂണിറ്റ് കാറുകളെയാണ് ഈ നിർമ്മാണ തകരാർ ബാധിച്ചിരിക്കുന്നത്. 

ALSO READ: സൈക്കിളും കാറും തുടങ്ങി ജെറ്റും റോക്കറ്റും വരെ; ജപ്പാൻ മൊബിലിറ്റി ഷോയിൽ നിറഞ്ഞ് നിന്ന് ഹോണ്ട

എന്താണ് തകരാർ? 

പ്രധാന പ്രശ്‌നം: ഡോർ ട്രിം പാനലിലെ ക്രാഷ് സെൻസറുകൾക്കായി നൽകിയിട്ടുള്ള കേബിളിംഗിലെ പിഴവാണ് തകരാറിന് കാരണം.

സുരക്ഷാ ഭീഷണി: അപകടമുണ്ടാകുന്ന സാഹചര്യത്തിൽ എയർബാഗ് വിന്യസിക്കാൻ സാധാരണ എടുക്കുന്നതിനേക്കാൾ കൂടുതൽ സമയം എടുത്തേക്കാം. ഇത് യാത്രക്കാർക്ക് ഗുരുതരമായ പരുക്കുകൾ ഉണ്ടാക്കാൻ സാധ്യതയുണ്ടെന്ന് പോർഷ കണ്ടെത്തിയിട്ടുണ്ട്. 

പരിഹാരം: എത്രയും പെട്ടെന്ന് വാഹനങ്ങൾ പോർഷയുടെ അംഗീകൃത ഷോറൂമുകളിൽ എത്തിക്കാനാണ് കമ്പനി ഉടമകളോട് ആവശ്യപ്പെട്ടിരിക്കുന്നത്. പ്രശ്‌നം സൗജന്യമായി പരിഹരിച്ച് നൽകും. സമാനമായ എയർബാഗ് സുരക്ഷാ പ്രശ്‌നത്തെ തുടർന്ന് ഓസ്‌ട്രേലിയയിൽ 142 പോർഷ പനമേര യൂണിറ്റുകൾ അടുത്തിടെ തിരിച്ചുവിളിച്ചതിന് പിന്നാലെയാണ് ഇന്ത്യയിലും സമാനമായ നടപടി. 

വാഹനം തിരിച്ചുവിളിച്ചിട്ടുണ്ടോ എന്ന് എങ്ങനെ അറിയാം?

ഉടമകൾക്ക് recall.porsche.com എന്ന വെബ്‌സൈറ്റിൽ ലോഗിൻ ചെയ്‌ത്, കാറിന്റെ VIN (വാഹനം തിരിച്ചറിയൽ നമ്പർ) നൽകി തകരാർ ബാധിച്ച കാറുകളുടെ പട്ടികയിൽ തങ്ങളുടെ വാഹനം ഉൾപ്പെട്ടിട്ടുണ്ടോ എന്ന് പരിശോധിക്കാവുന്നതാണ്. ഈ വർഷം ഇന്ത്യയിൽ പോർഷ പ്രഖ്യാപിക്കുന്ന രണ്ടാമത്തെ തിരിച്ചുവിളിക്കലാണിത്. മാർച്ചിൽ പോർഷ 991 മോഡലുകളെ സമാനമായ സുരക്ഷാ തകരാറിനെ തുടർന്ന് തിരിച്ചുവിളിച്ചിരുന്നു. ഇത്തരം തിരിച്ചുവിളിക്കലുകൾ വാഹന വിപണിയിൽ പതിവാണെന്നും, നിർമ്മാണ തകരാറുകൾ കമ്പനി സ്വമേധയാ പരിഹരിച്ച് നൽകുമെന്നും അധികൃതർ അറിയിച്ചു.

കേന്ദ്ര സർക്കാർ ജിഎസ്‌ടി വെട്ടിക്കുറച്ചതിനെ തുടർന്ന് പോർഷ തങ്ങളുടെ മോഡലുകളുടെ വില കുറച്ചു. 14 ലക്ഷം രൂപ വരെയാണ് വിവിധ മോഡലുകൾക്ക് വില കുറച്ചത്.

Porsche has issued a voluntary recall for 158 units of the Panamera in India due to a safety-critical airbag fault. The issue involves incorrectly assigned cabling for the door crash sensors, which could potentially cause a delayed deployment of the side airbags in an accident, thus increasing the risk of injury. The affected models were manufactured between July 2023 and September 2025, and the company will fix the defect free of charge.