ദുബൈ: ഈ വർഷത്തിലെ ഏറ്റവും തിരക്കേറിയ മാസങ്ങളിലൊന്നിന് തയ്യാറെടുക്കുകയാണ് എമിറേറ്റ്‌സ് എയർലൈൻസ്. വിനോദസഞ്ചാര സീസൺ, പ്രാദേശികമായി നടക്കുന്ന വലിയ പരിപാടികൾ, അടുത്തിടെ മാറ്റം വരുത്തിയ KHDA സ്കൂൾ അവധിക്കാലം എന്നിവയാണ് വിമാനത്താവളങ്ങളിലെ ഈ തിരക്കിന് കാരണം. ഈ തിരക്കേറിയ സീസണിൽ എയർലൈൻ യാത്രക്കാർക്ക് നൽകിയിരിക്കുന്ന ചില നിർദേശങ്ങളെക്കുറിച്ചാണ് ഇവിടെ വിശദീകരിക്കുന്നത്. 

യാത്രകൾ നേരത്തെ പ്ലാൻ ചെയ്യണം

ദുബൈ എയർപോർട്ടിലേക്ക് വരുന്ന റോഡുകളിൽ ഗതാഗതക്കുരുക്ക്, പാർക്കിംഗ് സ്ഥലങ്ങളിൽ തിരക്ക്, ചെക്കിൻ നടപടികളിൽ കാലതാമസം എന്നിവ യാത്രക്കാർ പ്രതീക്ഷിക്കണമെന്ന് എമിറേറ്റ്‌സ് വ്യക്തമാക്കി.

നിർദേശങ്ങൾ

• യാത്ര പുറപ്പെടുന്നതിന് 3 മണിക്കൂർ മുമ്പ് വിമാനത്താവളത്തിൽ എത്തുക.
• ടേക്-ഓഫിന് 90 മിനിറ്റ് മുമ്പ് ഇമിഗ്രേഷൻ നടപടികൾ പൂർത്തിയാക്കുക.
• ഒരു മണിക്കൂർ മുമ്പ് ബോർഡിംഗ് ഗേറ്റിൽ എത്തിച്ചേരുക.

തയ്യാറെടുപ്പുകൾ നേരത്തെ പൂർത്തിയാക്കുന്ന യാത്രക്കാർക്ക് എയർപോർട്ടിലെ ലോഞ്ചുകൾ, റെസ്റ്റോറന്റുകൾ, മറ്റ് സൗകര്യങ്ങൾ എന്നിവ ആസ്വദിക്കാൻ കൂടുതൽ സമയം ലഭിക്കുമെന്നും യാത്ര സുഗമമാകുമെന്നും എയർലൈൻ വ്യക്തമാക്കി.

ALSO READ: രൂപയ്ക്ക് വീണ്ടും തിരിച്ചടി; മൂന്നാം ദിവസവും ഇടിവ്; മറ്റ് വിദേശ കറന്‍സികളുമായുള്ള ഇന്നത്തെ വിനിമയ നിരക്ക് ഇങ്ങനെ | Indian Rupee in 2025 November 14

ഡിജിറ്റൽ സൗകര്യങ്ങൾ ഉപയോഗിക്കുക

തിരക്ക് കുറയ്ക്കുന്നതിനായി ചില ഡിജിറ്റൽ സൗകര്യങ്ങൾ പ്രയോജനപ്പെടുത്താൻ എമിറേറ്റ്‌സ് ഉപഭോക്താക്കളോട് ആവശ്യപ്പെടുന്നു. 

എമിറേറ്റ്‌സ് ആപ്പ്: പുറപ്പെടുന്നതിന് 48 മണിക്കൂർ മുമ്പ് ആപ്പ് വഴി ചെക്ക്-ഇൻ ചെയ്യുക, ഡിജിറ്റൽ ബോർഡിംഗ് പാസുകൾ നേടുക.

ബയോമെട്രിക് രജിസ്ട്രേഷൻ: ഇതിലൂടെ സ്മാർട്ട് ഗേറ്റുകൾ ഉപയോഗിക്കാനും ചെക്ക്-ഇൻ, ഗേറ്റുകൾ, ലോഞ്ചുകൾ എന്നിവിടങ്ങളിൽ വേഗത്തിൽ കടന്നു പോകാനും സാധിക്കും.

സിറ്റി ചെക്ക്-ഇൻ ഓപ്ഷനുകൾ

യാത്രക്കാർക്ക് DIFC-യിലെ എമിറേറ്റ്‌സ് സിറ്റി ചെക്ക്-ഇൻ ആൻഡ് ട്രാവൽ സ്റ്റോർ ഉപയോഗിച്ച് വിമാനത്താവളത്തിലെ ക്യൂ ഒഴിവാക്കാൻ സാധിക്കും. ഇവിടെ, വിമാനം പുറപ്പെടുന്നതിന് 24 മണിക്കൂർ മുതൽ 4 മണിക്കൂർ മുമ്പ് വരെ ചെക്ക്-ഇൻ ചെയ്യാനും ലഗേജ് ഏൽപ്പിക്കാനും സൗകര്യമുണ്ട്. സൗജന്യ പാർക്കിംഗും ലഭിക്കും.

പ്രത്യേക ഓഫർ: ഡിസംബർ 15-നും ജനുവരി 15-നും ഇടയിൽ ഇവിടെ ചെക്ക്-ഇൻ ചെയ്യുന്ന കുട്ടികൾ ഉൾപ്പെടെ, ഓരോരുത്തർക്കും 2,500 സ്കൈവാർഡ്സ് മൈലുകൾ ലഭിക്കും. അജ്മാനിലെ എമിറേറ്റ്‌സ് സിറ്റി ചെക്ക്-ഇന്നും 24 മണിക്കൂറും പ്രവർത്തിക്കുന്നുണ്ട്.

തലേദിവസം ലഗേജ് ഏൽപ്പിക്കാനുള്ള സൗകര്യം

ദുബൈയിൽ നിന്ന് പുറപ്പെടുന്നവർക്ക്, യാത്രയുടെ തലേദിവസം വിമാനത്താവളത്തിൽ ലഗേജ് സൗജന്യമായി ഏൽപ്പിക്കാം. ഇത് യാത്രാദിവസത്തെ തിരക്ക് കുറയ്ക്കാൻ സഹായിക്കും.

അതേസമയം, ഫസ്റ്റ് ക്ലാസ് യാത്രക്കാർക്കും പ്ലാറ്റിനം സ്കൈവാർഡ്സ് അംഗങ്ങൾക്കും ഹോം ചെക്ക്-ഇൻ സേവനം സൗജന്യമാണ്. എമിറേറ്റ്‌സ് ഉദ്യോഗസ്ഥർ വീട്ടിലോ ഹോട്ടലിലോ ഓഫിസിലോ എത്തി ചെക്ക്-ഇൻ നടപടികൾ പൂർത്തിയാക്കി ബാഗുകൾ എയർപോർട്ടിലേക്ക് കൊണ്ടുപോകും.

ALSO READ: എഐയെ പേടിക്കേണ്ട, ഗുണപരമായി ഉപയോഗിക്കുകയാണ് വേണ്ടത്: പായല്‍ അറോറ

പുതിയ ലഗേജ് നിയമങ്ങൾ ശ്രദ്ധിക്കുക

യാത്രക്കാർ ബാഗുകൾ പാക്ക് ചെയ്യുന്നതിന് മുമ്പ് പുതിയ നിയമങ്ങൾ പരിശോധിക്കണമെന്ന് എമിറേറ്റ്‌സ് ഓർമ്മിപ്പിക്കുന്നു.

പവർ ബാങ്ക്: 100 വാട്ട് അവറിൽ (watt hours) താഴെയുള്ള ഒരു പവർ ബാങ്ക് മാത്രമേ ഒരാൾക്ക് അനുവദിക്കൂ, അത് ക്യാബിൻ ബാഗേജിൽ തന്നെ കൊണ്ടുപോകണം.

സ്മാർട്ട് ബാഗുകൾ: ഇവയിലെ ബാറ്ററി ഊരി മാറ്റാൻ കഴിയുന്നതാണെങ്കിൽ മാത്രം അനുവദിക്കും.

ഇ-സിഗരറ്റ്: ഇ-സിഗരറ്റുകളും സമാന ഉപകരണങ്ങളും ക്യാബിൻ ബാഗേജിൽ കൊണ്ടുപോകണം.

വരാനിരിക്കുന്ന ആഴ്ചകളിൽ ദുബൈ വിമാനത്താവളത്തിലൂടെ ദശലക്ഷക്കണക്കിന് ആളുകൾ യാത്ര ചെയ്യുമെന്ന് പ്രതീക്ഷിക്കുന്നു. ഈ സാഹചര്യത്തിൽ മുൻകൂട്ടിയുള്ള തയ്യാറെടുപ്പും ആസൂത്രണവും ഈ തിരക്ക് മറികടക്കാൻ സഹായിക്കുമെന്ന് എമിറേറ്റ്‌സ് വ്യക്തമാക്കി.

Emirates Airlines is gearing up for one of its busiest months, with peak tourist season, local events, and school holidays driving up travel numbers. The airline is expecting over 2.3 million departures and 2.5 million arrivals in December.