ദുബൈ: ഈ വർഷം ആദ്യം ദുബൈയിൽ നടപ്പാക്കിയ ട്രക്ക് ഗതാഗത നിയന്ത്രണങ്ങൾ ലക്ഷ്യം കണ്ടതായി അധികൃതർ. എമിറേറ്റിലെ രണ്ട് പ്രധാന ഹൈവേകളിലെ ശരാശരി വാഹന വേഗതയിൽ കാര്യമായ വർദ്ധനവുണ്ടായതായി റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയും (ആർടിഎ) ദുബൈ പോലീസും പുറത്തുവിട്ട പുതിയ കണക്കുകൾ വ്യക്തമാക്കുന്നു.

ALSO READ: 'പങ്കാളിത്ത കരാറിൽ ' ഒപ്പിട്ടില്ലെങ്കിൽ പരീക്ഷാഫലം തടഞ്ഞുവയ്ക്കും; രക്ഷിതാക്കൾക്ക് മുന്നറിയിപ്പുമായി യുഎഇയിലെ സ്കൂളുകൾ 

വൈകുന്നേരത്തെ തിരക്കേറിയ സമയങ്ങളിൽ ഭാരമേറിയ വാഹനങ്ങൾക്ക് ഏർപ്പെടുത്തിയ നിയന്ത്രണങ്ങളെത്തുടർന്ന് ഗതാഗതത്തിന്റെ ഒഴുക്കിലും യാത്രാ സമയത്തിലും വ്യക്തമായ പുരോഗതിയാണ് അധികൃതർ രേഖപ്പെടുത്തിയത്.

• എമിറേറ്റ്സ് റോഡ്: ഗതാഗത വേഗത മണിക്കൂറിൽ 26 കിലോമീറ്റർ വരെ വർദ്ധിച്ചു.
• ഷെയ്ഖ് മുഹമ്മദ് ബിൻ സായിദ് റോഡ്: വേഗത മണിക്കൂറിൽ 19 കിലോമീറ്റർ വരെ വർദ്ധിച്ചു.

റോഡ് സുരക്ഷ വർദ്ധിപ്പിക്കുന്നതിനും തിരക്ക് കുറയ്ക്കുന്നതിനുമുള്ള വിപുലമായ പദ്ധതിയുടെ ഭാഗമായാണ് 2025 ജനുവരി 1 മുതൽ നിയന്ത്രണങ്ങൾ പ്രാബല്യത്തിൽ വന്നത്. നിയന്ത്രണത്തിന്റെ ഭാ​ഗമായി അൽ അവീർ റോഡിനും ഷാർജ അതിർത്തിക്കും ഇടയിലുള്ള എമിറേറ്റ്സ് റോഡിൽ വൈകുന്നേരം 5.30 മുതൽ രാത്രി 8 വരെ ട്രക്ക് ഗതാഗതം നിരോധിച്ചിരുന്നു.

അപകടങ്ങൾ പകുതിയായി കുറഞ്ഞു

പുതിയതായി ഏർപ്പെടുത്തിയ നടപടികളുടെ ഫലമായി എമിറേറ്റ്സ് റോഡിലും ഷെയ്ഖ് മുഹമ്മദ് ബിൻ സായിദ് റോഡിലും നടക്കുന്ന അപകടങ്ങളുടെ എണ്ണം പകുതിയായി കുറഞ്ഞതായി കണക്കുകൾ പറയുന്നു. 2024-ൽ രേഖപ്പെടുത്തിയ 75 കേസുകളുമായി താരതമ്യം ചെയ്യുമ്പോൾ, 2025-ൽ റിപ്പോർട്ട് ചെയ്യപ്പെട്ടത് വെറും 37 കേസുകൾ മാത്രമാണ്.

ഇതിനുപുറമേ, സമയക്രമങ്ങൾ പാലിക്കുന്നതിൽ എമിറേറ്റ്സ് റോഡിൽ 7.7 ശതമാനവും ഷെയ്ഖ് മുഹമ്മദ് ബിൻ സായിദ് റോഡിൽ 5 ശതമാനവും വർദ്ധനവ് രേഖപ്പെടുത്തി. നിയന്ത്രിത സമയങ്ങളിൽ നൽകിയിരുന്ന ഗതാഗത പെർമിറ്റുകളിൽ 97 ശതമാനം കുറവ് വന്നതും ഈ വിജയത്തിന് തെളിവാണ്.

ALSO READ: റോഡ് സുരക്ഷ ഉറപ്പാക്കാൻ പരിശോധനകൾ ശക്തമാക്കി ഷാർജ പൊലിസ്; 73 കാറുകളും 25 ബൈക്കുകളും കണ്ടുകെട്ടി 

തന്ത്രപരമായ നീക്കമെന്ന് ആർടിഎ

"തിരക്കേറിയ സമയങ്ങളിൽ ട്രക്ക് പരിധി വിപുലീകരിച്ച് സുഗമവും സുരക്ഷിതവുമായ ഗതാഗതം സാധ്യമാക്കാനുള്ള ദീർഘകാല തന്ത്രവുമായി ഈ തീരുമാനം യോജിക്കുന്നു," ആർടിഎയുടെ ട്രാഫിക് ആൻഡ് റോഡ്‌സ് ഏജൻസി സിഇഒ ഹുസൈൻ അൽ ബന്ന പറഞ്ഞു. അപകടങ്ങളുടെ രീതികൾ, ഇതര പാതകളുടെ ശേഷി എന്നിവ പരിഗണിച്ചുള്ള വിശദമായ എഞ്ചിനീയറിംഗ് പഠനങ്ങളുടെ അടിസ്ഥാനത്തിലാണ് ഈ നിയന്ത്രണം നടപ്പിലാക്കിയതെന്നും അദ്ദേഹം കൂട്ടിച്ചേർത്തു.

ട്രക്കുകളും ലൈറ്റ് വാഹനങ്ങളും തമ്മിൽ ഓവർലാപ്പ് ചെയ്യുന്നത് മൂലമുണ്ടാകുന്ന അപകടങ്ങൾ കുറയ്ക്കുക, സുപ്രധാന ഇടനാഴികളിലെ തിരക്ക് കുറയ്ക്കുക എന്നിവയാണ് പ്രാഥമിക ലക്ഷ്യമെന്ന് ദുബൈ പൊലിസിലെ ഓപ്പറേഷൻസ് അഫയേഴ്‌സ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്രൂയി പറഞ്ഞു.

strict entry restrictions and regulations imposed on trucks in dubai have proven effective, leading to a significant reduction in road accidents involving heavy vehicles