കണ്ണൂർ: ക്രിസ്മസ് അവധിക്കൊപ്പം തദ്ദേശതെരഞ്ഞെടുപ്പുകൂടി വന്നതോടെ ഇതരസംസ്ഥാനങ്ങളിൽനിന്നുള്ള മലയാളികൾക്ക് നാട്ടിലെത്താൻ ചെലവേറും. ഡിസംബർ 9, 11 ദിവസങ്ങളിലാണ് തദ്ദേശ തെരഞ്ഞെടുപ്പ്. ഇതിനായി നാട്ടിലെത്തിയാൽ ക്രിസ്മസ് അവധിക്ക് ദിവസങ്ങൾ ബാക്കി നിൽക്കെ തിരിച്ചുപോകേണ്ടി വരും. ഇതോടെ യാത്രാചെലവ് വലിയ ബാധ്യതയാകും. 

ട്രെയിനുകളിലെല്ലാം ടിക്കറ്റ് വെയ്റ്റിങ് ലിസ്റ്റിലാണ്. ഡിസംബർ 20 മുതൽ 25 വരെ ടിക്കറ്റുകൾ ഏതാണ്ട് പൂർണമായി തീർന്നു. സ്ലീപ്പർ, തേർഡ് എ.സി ഇക്കണോമി, തേർഡ് എ.സി, സെക്കൻഡ് എ.സി എന്നിങ്ങനെ ഒരു ക്ലാസിലും കൺഫേം ടിക്കറ്റില്ല. ഏതാണ്ട് എല്ലാ ക്ലാസുകളിലും 50ന് മുകളിലാണ് വെയ്റ്റിങ്.

ബംഗളൂരുവിൽനിന്ന് കണ്ണൂരിലേക്കുള്ള കണ്ണൂർ എക്സ്പ്രസിൽ(16511 ) ഡിസംബർ 20ന് സ്ലീപ്പർ വെയിറ്റിങ് ലിസ്റ്റ് 62 ആയി, 21ന് ആർ.എ.സി, 22ന്-5, 23ന്-109, 24ന്-165 എന്നിങ്ങനെ ആണ് വെയ്റ്റിങ് ലിസ്റ്റ്. യശ്വന്തപുരം കണ്ണൂർ എക്സ്പ്രസിൽ (16527 ) ഡിസംബർ 20ന് -170, 21-119, 22-126, 25-135 എന്നിങ്ങനെ ആണ് വെയ്റ്റിങ് ലിസ്റ്റ്.

ചെന്നൈ-തിരുവനന്തപുരം മെയിൽ, ചെന്നൈ- തിരുവനന്തപുരം സൂപ്പർ ഫാസ്റ്റ് എക്‌സ്പ്രസ്, ചെന്നൈ- ആലപ്പുഴ സൂപ്പർ ഫാസ്റ്റ് എക്‌സ്പ്രസ് എന്നീ ട്രെയിനുകളിലും ടിക്കറ്റ് ബുക്കിങ് അതിവേഗം വെയ്റ്റിങ് ലിസ്റ്റിലേക്ക് നീങ്ങുകയാണ്. മുംബൈ വഴി നാട്ടിലേക്കുള്ള ട്രെയിനുകളിലും ടിക്കറ്റില്ല. 
നേത്രാവതി എക്സ്പ്രസ് (16345)ൽ 20 മുതൽ 25 വരെയുള്ള സർവിസുകളിൽ ഒരു ക്ലാസിലും ടിക്കറ്റ് ലഭിക്കാനില്ല. എൽ.ടി.ടി തിരുവന്തപുരം കൊച്ചുവേളി സൂപ്പർഫാസ്റ്റ് എക്സപ്രസ്(22113) ട്രെയിനിലും ടിക്കറ്റില്ല. 

തിരക്ക് ഇനിയും വർധിക്കുമെന്നതിനാൽ തൽകാലിലും ടിക്കറ്റ് ലഭിക്കൽ എളുപ്പമാകില്ല. ഉത്സവകാലം കണക്കിലെടുത്ത് സ്പെഷൽ ട്രെയിൻ സർവിസുകൾ അനുവദിക്കണമെന്ന് കേരളം ആവശ്യപ്പെടുന്നുണ്ടെങ്കിലും പ്രഖ്യാപനങ്ങൾ ഉണ്ടായിട്ടില്ല.

ട്രെയിനുകളിൽ സീറ്റ് ലഭിക്കാതെ വന്നാൽ ചെന്നൈ, ബംഗളൂരു തുടങ്ങിയ സ്ഥലങ്ങളിൽനിന്ന് നാട്ടിലെത്തുന്നവർ ബസുകളെയാണ് ആശ്രയിക്കുന്നത്. സ്വകാര്യ ബസുകളിൽ ഈ സമയത്ത് ടിക്കറ്റ് നിരക്ക് മൂന്നിരട്ടിയോളം വർധിപ്പിക്കാറുണ്ട്. മറ്റു വഴികളില്ലാത്തതിനാൽ വലിയ ടിക്കറ്റ് നിരക്ക് നൽകിയാണ് മലയാളികൾ നാട്ടിലെത്തുന്നത്. കെ.എസ്.ആർ.ടി.സി ബസുകൾ കൂടുതലും ശബരിമല സർവിസിലാണ്. ഇതുവരെ അവധിക്കാല സർവിസുകൾ പ്രഖ്യാപിച്ചിട്ടുമില്ല.