നമ്മുടെ വീടുകളുടെ പരിസരത്ത് ദിവസവും കാണുന്ന കാക്കകളെ നമ്മള്‍ പലപ്പോഴും സാധാരണ പക്ഷികളായി മാത്രം കാണാറുണ്ട്. എന്നാല്‍ ഇവയുടെ പെരുമാറ്റത്തിനുള്ളില്‍ ഒളിഞ്ഞിരിക്കുന്ന ബുദ്ധിശക്തി അറിഞ്ഞാല്‍, ആ കാഴ്ചപ്പാട് ഒരിക്കലും പഴയപോലെ തുടരുമെന്ന് തോന്നില്ല.

നിങ്ങള്‍ കാക്കകള്‍ക്ക് സ്ഥിരമായി ഭക്ഷണം നല്‍കുന്ന ഒരാളാണോ? എങ്കില്‍ ഒരിക്കല്‍ എങ്കിലും നിങ്ങളുടെ ജനാലയിലോ മുറ്റത്തോ ഒരു ചെറുകല്ലോ, കുപ്പിമൂടിയോ, തിളങ്ങുന്ന ലോഹക്കഷണമോ കണ്ടിട്ടുണ്ടാകാം. പലര്‍ക്കും ഇത് യാദൃശ്ചികമായൊരു സംഭവം പോലെ തോന്നാം. എന്നാല്‍ ശാസ്ത്രം പറയുന്നത് മറ്റൊന്നാണ് - ഇത് കാക്കകള്‍ മനുഷ്യരുമായി നടത്തുന്ന സൂക്ഷ്മമായ ഒരു 'സാമൂഹിക ഇടപാട്' തന്നെയാണെന്നാണ്.

മനുഷ്യരെ മുഖം കണ്ടു തിരിച്ചറിയുന്ന പക്ഷികള്‍

കോര്‍വിഡ് (Corvid) കുടുംബത്തില്‍പ്പെടുന്ന കാക്കകള്‍ പക്ഷിലോകത്തെ ഏറ്റവും ബുദ്ധിമാനായ ജീവികളിലൊന്നാണ്. മനുഷ്യരുടെ മുഖങ്ങള്‍ വ്യക്തമായി തിരിച്ചറിയാനും, നല്ലവരെയും ദുഷ്ടരെയും വേര്‍തിരിച്ചറിയാനും ഇവയ്ക്ക് കഴിയും. നാഷണല്‍ അക്കാദമി ഓഫ് സയന്‍സസ് പ്രസിദ്ധീകരിച്ച പഠനങ്ങള്‍ പറയുന്നതനുസരിച്ച്, തങ്ങളെ ഉപദ്രവിച്ച മനുഷ്യരെ കാക്കകള്‍ വര്‍ഷങ്ങളോളം ഓര്‍ക്കുകയും അവരോട് പ്രതികാരപരമായ പെരുമാറ്റം കാണിക്കുകയും ചെയ്തിട്ടുണ്ട്. അതുപോലെ തന്നെ, ഭക്ഷണം നല്‍കുന്നവരോട് അവര്‍ ദീര്‍ഘകാല സൗഹൃദം പുലര്‍ത്തുകയും ചെയ്യുന്നു.

'സമ്മാനങ്ങള്‍' എന്നറിയപ്പെടുന്ന കാക്കകളുടെ അടയാളങ്ങള്‍

മനുഷ്യര്‍ക്ക് എളുപ്പത്തില്‍ കാണുന്ന ഇടങ്ങളില്‍ കാക്കകള്‍ ചെറിയ വസ്തുക്കള്‍ കൊണ്ടുവെക്കുന്നത് വെറും കളിയല്ല. ഉപകരണങ്ങള്‍ ഉപയോഗിക്കാനും പ്രശ്‌നങ്ങള്‍ പരിഹരിക്കാനും മുന്‍കൂട്ടി ആസൂത്രണം ചെയ്യാനും കഴിവുള്ള ഇവ, ഭക്ഷണം ലഭിക്കുന്ന സ്ഥലങ്ങളില്‍ ഇത്തരം വസ്തുക്കള്‍ ഉപേക്ഷിക്കുന്നത് ഒരുതരം സാമൂഹിക വിനിമയമായാണ് ഗവേഷകര്‍ വിലയിരുത്തുന്നത്.

ആദ്യകാലത്ത് ഇത് ആകസ്മികമായി സംഭവിക്കാം. കൗതുകം കൊണ്ട് എടുത്തുവച്ച ഒരു വസ്തു ഭക്ഷണത്തിനരികില്‍ വീണുപോയേക്കാം. എന്നാല്‍ അതിന് പിന്നാലെ മനുഷ്യന്‍ വീണ്ടും ഭക്ഷണം നല്‍കിയാല്‍, ആ പ്രവൃത്തി ആവര്‍ത്തിക്കാന്‍ കാക്കകള്‍ പഠിക്കുന്നു. കാലക്രമേണ, സമീപത്തുള്ള മറ്റു കാക്കകളും ഇത് നിരീക്ഷിച്ച് അനുകരിക്കുകയും, ഒരു പ്രദേശത്തെ കാക്ക സമൂഹത്തിനിടയില്‍ തന്നെ ഈ ശീലം വളരുകയും ചെയ്യുന്നു.

എന്തുകൊണ്ട് തിളങ്ങുന്ന വസ്തുക്കള്‍?

ഉരുളന്‍ കല്ലുകള്‍, ലോഹക്കഷണങ്ങള്‍, വര്‍ണ്ണാഭമായ കുപ്പി മൂടികള്‍ - ഇവയോടാണ് കാക്കകള്‍ക്ക് പ്രത്യേക ഇഷ്ടം. കാരണം ഇവ ദൃഢവും, എളുപ്പത്തില്‍ കൊണ്ടുപോകാവുന്നതും, കാഴ്ചയില്‍ ആകര്‍ഷകവുമാണ്. പ്രത്യേകിച്ച് തിളങ്ങുന്ന വസ്തുക്കള്‍ അവരുടെ സ്വാഭാവിക ജിജ്ഞാസയെ ഉണര്‍ത്തുന്നു.

 ALSO READ: ഗ്യാസ് ലീക്ക് ചെയ്ത് അപകടം ഉണ്ടാവുന്നത് തടയാന്‍ ഇക്കാര്യങ്ങള്‍ നിര്‍ബന്ധമായും ശ്രദ്ധിക്കൂ

നമ്മുടെ ചുറ്റുപാടിലെ നിശബ്ദ നിരീക്ഷകര്‍

നമ്മുടെ തൊടിയിലും മേല്‍ക്കൂരയിലും കാണുന്ന കാക്കകള്‍ വെറും ഭക്ഷണം തേടുന്ന പക്ഷികള്‍ മാത്രമല്ല. അവ അത്ഭുതകരമായ ഓര്‍മ്മശക്തിയും സാമൂഹിക ബോധവും ഉള്ള ബുദ്ധിജീവികളാണ്. നിങ്ങള്‍ നല്‍കുന്ന ഒരു പിടി ചോറിന് മറുപടിയായി അവര്‍ വെച്ചുപോകുന്ന ഒരു ചെറുകല്ല് പോലും, മനുഷ്യനും പ്രകൃതിയും തമ്മിലുള്ള അപൂര്‍വമായ ഒരു സൗഹൃദത്തിന്റെ അടയാളമായി കാണാം.

നിശബ്ദമായി നമ്മെ നിരീക്ഷിക്കുകയും, ഓര്‍ക്കുകയും, പ്രതികരിക്കുകയും ചെയ്യുന്ന കാക്കകള്‍ - പ്രകൃതിയുടെ ഏറ്റവും വിസ്മയകരമായ ബുദ്ധിജീവികളില്‍ ഒന്നാണെന്നതില്‍ സംശയമില്ല. കാക്കയെ കാണുമ്പോള്‍ അത് വെറും പക്ഷിയല്ലെന്ന് ഓര്‍ക്കുക. അത് നിങ്ങളെ നിരീക്ഷിക്കുന്ന, ഓര്‍ക്കുന്ന, തിരിച്ചറിയുന്ന ഒരു ബുദ്ധിജീവിയാണ്.