മനാമ: ബഹ്‌റൈന്റെ വിവിധ ഭാഗങ്ങളില്‍ ഇന്നലെ വൈകീട്ടോടെ ലഭിച്ചത് ഇടിയോട് കൂടിയ ശക്തമായ കാറ്റും മഴയും. വൈകുന്നേരം 6.15ഓടെ ആരംഭിച്ച മഴ പുലര്‍ച്ചെ വരെ നീണ്ടുനിന്നതായി ഗതാഗത, വാര്‍ത്താവിനിമയ മന്ത്രാലയത്തിന് കീഴിലുള്ള കാലാവസ്ഥാ വകുപ്പ് അറിയിച്ചു. ഇടിമിന്നലിന്റെ അകമ്പടിയോടെ പെയ്ത മഴയ്‌ക്കൊപ്പം മണിക്കൂറില്‍ 25 നോട്ട്‌സ് വരെ വേഗതയില്‍ ശക്തമായ വടക്കുകിഴക്കന്‍ കാറ്റും വീശിയടിച്ചു. അന്തരീക്ഷ ഈര്‍പ്പം 90 ശതമാനം വരെ ഉയര്‍ന്നതായും റിപ്പോര്‍ട്ടുണ്ട്. പതിറ്റാണ്ടുകളായി കാണാത്ത വിധമുള്ള ശക്തമായ ഇടിമിന്നലാണ് ഇന്നലെ രാജ്യത്ത് അനുഭവപ്പെട്ടത്.
മോശം കാലാവസ്ഥയെത്തുടര്‍ന്ന് ഡ്രൈവര്‍മാര്‍ക്ക് ആഭ്യന്തര മന്ത്രാലയം കര്‍ശന ജാഗ്രതാ നിര്‍ദേശം നല്‍കി. അശ്രദ്ധമായ ഡ്രൈവിങ് ഒഴിവാക്കാനും അനുവദനീയമായ വേഗത മാത്രം പാലിക്കാനും വാഹനങ്ങള്‍ക്കിടയില്‍ സുരക്ഷിതമായ അകലം സൂക്ഷിക്കാനും അധികൃതര്‍ ആവശ്യപ്പെട്ടു. സുരക്ഷിതമാണെന്ന് ഉറപ്പുള്ളപ്പോള്‍ മാത്രമേ ഓവര്‍ടേക്ക് ചെയ്യാന്‍ പാടുള്ളൂ. ശക്തമായ കാറ്റില്‍ കടലില്‍ തിരമാലകള്‍ രണ്ട് മീറ്ററിലധികം ഉയരാന്‍ സാധ്യതയുള്ളതിനാല്‍ മത്സ്യത്തൊഴിലാളികളും കടല്‍യാത്രക്കാരും പ്രത്യേക ജാഗ്രത പാലിക്കണമെന്നും മുന്നറിയിപ്പുണ്ട്.
ഇന്നലെ പകല്‍ ഉയര്‍ന്ന താപനില 29 ഡിഗ്രി സെല്‍ഷ്യസ് വരെ എത്തിയെങ്കിലും വൈകുന്നേരത്തോടെ പെയ്ത മഴയോടെ ഇത് 21 ഡിഗ്രിയായി കുറഞ്ഞു. ഇന്ന് തെക്കുകിഴക്കന്‍ കാറ്റ് മണിക്കൂറില്‍ 30 നോട്ട്‌സ് വരെ വേഗതയില്‍ വീശാന്‍ സാധ്യതയുള്ളതിനാല്‍ സമാനമായ കാലാവസ്ഥ തുടരുമെന്നാണ് പ്രതീക്ഷിക്കുന്നത്. താപനില 22 ഡിഗ്രിക്കും 30 ഡിഗ്രിക്കും ഇടയിലായിരിക്കും. നാളെ മേഘാവൃതമായ അന്തരീക്ഷമായിരിക്കുമെന്നും വടക്കന്‍ കാറ്റിന്റെ വേഗത 17 നോട്ട്‌സായി കുറയുമെന്നും കാലാവസ്ഥാ വകുപ്പ് അറിയിച്ചു. 

English Summary: Thunder and rain of varying intensity battered parts of the kingdom yesterday evening, prompting authorities to warn people against reckless driving due to inclement conditions. The rains began at around 6.15pm and lasted until early in the morning.