മസ്‌കറ്റ്: നാണയ ചരിത്രത്തില്‍ ഒമാന്‍ തന്റെ ആദ്യ പോളിമാര്‍ 'ഒര് റിയാല്‍' ബാങ്ക്‌നോട്ട് അവതരിപ്പിച്ചു. 2026 ജനുവരി മുതല്‍ ഈ പുതിയ നോട്ടുകള്‍ പൊതുജനങ്ങള്‍ക്ക് പ്രചാരണത്തിലുണ്ടാകുമെന്ന് ഒമാന്‍ സെന്‍ട്രല്‍ ബാങ്ക് അറിയിച്ചു.നിലവില്‍ ഉപയോഗത്തിലുളള പേപ്പര്‍ നോട്ടുകളൊപ്പം തന്നെ പോളിമര്‍ നോട്ടും നിയമപരമായ നാണയമായി ഉപയോഗിക്കാം. 

പുതിയ നോട്ടുകള്‍ പുറത്തിറക്കുന്നതിലൂടെ നോട്ടുകളുടെ ദീര്‍ഘായുസ്സും സുരക്ഷയും വര്‍ധിപ്പിക്കാനാണ് ലക്ഷ്യമിടുന്നതെന്ന് അധികൃതര്‍ വ്യക്തമാക്കി. സാധാരണ പേപ്പര്‍ നോട്ടുകളേക്കാള്‍ കൂടുതല്‍ കാലം ഉപയോഗിക്കാവുന്നതാണ് പോളിമാര്‍ നോട്ടുകള്‍.വെളളം,മണ്ണ് തുടങ്ങിയവ മൂലമുളള കേടുപാടുകള്‍ക്ക് ഇവ കൂടുതല്‍ പ്രതിരോധശേഷിയുളളതുമാണ്.ഇതോടെ നോട്ടുകള്‍ പെട്ടെന്ന് നശിക്കുന്നതും പുനഃപ്രസിദ്ധീകരണ ചെലവും കുറയുമെന്നാണ് വിലയിരുത്തല്‍. 

ഡിസൈനിലും ഒമാന്‍ പ്രത്യേക ശ്രദ്ധ നല്‍കിയിട്ടുണ്ട്. നോട്ടിന്റെ മുന്‍വശത്ത് ഒമാന്‍ ബോട്ടാനിക് ഗാര്‍ഡന്‍ ഉള്‍പ്പെടുത്തിയിട്ടുണ്ട്. പിന്നിലെ ഭാഗത്ത് രാജ്യത്തിന്റെ വികസനവും പൈതൃകവും പ്രതിഫലിപ്പിക്കുന്ന ചിത്രങ്ങളാണ് നല്‍കിയത്. ആധുനിക ഒമാന്റെ വളര്‍ച്ചയും സംസ്‌കാരപരമായ അടയാളങ്ങളും ഒരുമിച്ച് കാണിക്കുന്ന രീതിയിലാണ് രൂപകല്‍പന.

സുരക്ഷാ സവിശേഷതകളും പുതിയ നോട്ടില്‍ കൂടുതല്‍ ശക്തമാക്കിയിട്ടുണ്ട്. നിറം മാറുന്ന സുരക്ഷാ അടയാളങ്ങള്‍, സുതാര്യ ഭാഗങ്ങള്‍, സെന്‍ട്രല്‍ ബാങ്കിന്റെ പ്രത്യേക മുദ്രകള്‍ എന്നിവ ഉള്‍പ്പെടുത്തിയിട്ടുണ്ട്. ഇതോടെ വ്യാജ നോട്ടുകള്‍ നിര്‍മ്മിക്കുന്നതിനുള്ള സാധ്യത ഗണ്യമായി കുറയും എന്നാണ് പ്രതീക്ഷ.

2026 ജനുവരിയില്‍ സെന്‍ട്രല്‍ ബാങ്ക് ശാഖകള്‍ വഴിയും തിരഞ്ഞെടുത്ത സ്ഥാപനങ്ങള്‍ വഴിയും ഈ നോട്ടുകള്‍ ലഭ്യമാകും. പൊതുജനങ്ങള്‍ക്ക് പുറമെ ശേഖരകര്‍ക്ക് പ്രത്യേക പാക്കറ്റുകളിലും നോട്ടുകള്‍ ലഭ്യമാക്കാനുള്ള ക്രമീകരണങ്ങളും ഉണ്ടാകും.

ഒമാന്റെ നാണയ സംവിധാനത്തില്‍ ഇത് ഒരു ശ്രദ്ധേയമായ മാറ്റമായി കണക്കാക്കപ്പെടുന്നു. 

 oman to introduce its first polymer one riyal banknote from january 2026. the central bank of oman says the new note will improve durability, security, and modernize the currency system.