കൊട്ടാരക്കര: ഓണം റോഡു സുരക്ഷയ്ക്ക് കൊട്ടാരക്കരയില്‍ വ്യത്യസ്ത ബോധവത്കരണ പരിപാടിയുമായി മോട്ടോര്‍ വാഹന വകുപ്പും ഡ്രൈവിങ് സ്‌കൂള്‍ മാനേജ്‌മെന്റുകളും.
കഥകളിയുടെ ജന്മസ്ഥലമായ കൊട്ടാരക്കരയില്‍ വാഹനം ഓടിക്കുന്നവര്‍ക്ക് ഉപദേശങ്ങളും നിര്‍ദേശങ്ങളുമായി എത്തിയത് കഥകളിവേഷധാരിയും യാത്രക്കാര്‍ക്ക് ഉപഹാരമായി കൊട്ടാരക്കരയുടെ തനത്പ്രസാദമായ ഉണ്ണിയപ്പവും. എം.സി റോഡില്‍ പുലമണ്‍ കവലയ്ക്ക് സമീപം ലോവര്‍ കരിക്കത്തായിരുന്നു ബോധവത്കരണ പരിപാടി. 'സുഭിക്ഷ ഓണം സുരക്ഷിത ഓണം' എന്ന മോട്ടോര്‍ വാഹന വകുപ്പിന്റെ പദ്ധതിയുടെ ഭാഗമായിട്ടായിരുന്നു ഇന്നലെ രാവിലെ 9 മുതല്‍ ബോധവത്കരണ പരിപാടി നടന്നത്. ഇതുവഴി വന്ന വാഹനങ്ങള്‍ കൈകാണിച്ച് നിര്‍ത്തി. കഥകളി വേഷധാരിയും മാവേലി വേഷധാരിയും ചേര്‍ന്ന് റോഡ് സുരക്ഷ ലഘു ലേഖകളും നിര്‍ദേശങ്ങളും നല്‍കി.
കൂടെ കൂട്ടിന് മോട്ടോര്‍ വാഹന ഉദ്യോഗസ്ഥരും ഡ്രൈവിങ് സ്‌കൂള്‍ ജീവനക്കാരും ഉണ്ടായിരുന്നു. സംഘാടകര്‍ ഓണസമ്മാനമായി എല്ലാവര്‍ക്കും ഉണ്ണിയപ്പം വിതരണം ചെയ്തു. ഹെല്‍മറ്റ് ധരിച്ച് വന്നവര്‍ക്കും ഹെല്‍മറ്റ് ധരിക്കാതെ വന്നവര്‍ക്കും നല്‍കിയ ഉപദേശങ്ങള്‍ വേറിട്ട അനുഭവമായതായി യാത്രക്കാര്‍ സാക്ഷ്യപ്പെടുത്തി. വ്യത്യസ്തമായ ഈ ബോധവത്കരണ പരിപാടി വാഹനം ഓടിക്കുന്നവരെയും യാത്രക്കാരെയും ഏറെ ആകര്‍ഷിച്ചു. ആര്‍.റ്റി.ഒ തുളസീധരന്‍പിള്ള ഉദ്ഘാടനം ചെയ്തു. മോട്ടോര്‍ വാഹന ഉദ്യോഗസ്ഥരായ മനേഷ്.ഡി, സുനില്‍ചന്ദ്രന്‍, അജി.ബി, സാം ഡബ്ല്യു, രാജേഷ് ജി.ആര്‍ എന്നിവര്‍ പരിപാടിക്ക് നേതൃത്വം നല്‍കി.